Ezequiel 44 - DIOSPA QHELQACHISQ

Inti llojsimuynejpi wisq'asqa punku

¹ Chaymanta chay runa inti llojsimuynejmanta Temploman yaykuna punkuman kutirichiwarqa. Chay punkutaj wisq'asqa kasharqa.

² Chantá Tata Dios niwarqa: Kay punkoqa wisq'asqapuni kanqa. Mana kicharikonqachu, nitaj pipis chayninta yaykonqachu, imaraykuchus noqa Israelpa Tata Diosnin chayninta yaykorqani.

³ Kamachejlla chayninta yaykuyta atin, chaypi tiyarikuspa Tata Diospa ñawpaqenpi t'antata mikhunanpaj. Payqa corredor punkunta yaykonqa, chaynillantataj llojsenqa, nispa.

Temploman yaykuyta atejkuna

⁴ Chaymanta chay runaqa wichaynej punkuman pusawarqa, chaytaj Temploj chimpanpi karqa. Chaypi Tata Diospa jatun kayninpa lliphipiyninta Temploman junt'aykushajta rikorqani, noqataj pampakama k'umuykorqani.

⁵ Chantá Tata Dios niwarqa: Runaj churin, qanman parlasusqayta allinta sonqoykipi unanchay, ñawiykiwan allinta qhaway, ninriykiwantaj allinta uyariy, Tata Diospa Templomanta ima kamachisqatachus qosqayki, chaykunata. Allinta reparay, pikunachus Tata Diospa Temploman yaykuyta llojsiytataj atinku, chaykunata.

⁶ Chantá contrayta oqharikoj Israel aylluman niy: Tukuyta Kamachej Tata Dios kay jinata nisunkichej: Israel, millachikunapaj jina imatachus ruwasqaykichejqa kaykamalla kachun.

⁷ Qankuna Temployta ch'ichichankichej, sonqonkupi, aychankupipis mana circuncidasqa waj llajtayoj runakunata wasiyman pusaykuspa. Paykunata saqenkichej mikhunayta jina, wirata yawartawan jaywanawankuta. Tukuy chay millayta ruwaspa, tratoyta p'akinkichej.

⁸ Temploypi noqata yupaychanapaj imachus ruwanata mana qankuna junt'ankichejchu. Astawanpis waj llajtayojkunata chay imakunata ruwanankupaj churarqankichej.

⁹ Chayrayku noqa Tukuyta Kamachej Tata Dios kay jinata nini: Israel ayllu ukhupi tiyakunku, chay waj llajtayoj runakunamanta mayqenchus sonqonpi, aychanpipis mana circuncidasqa kajqa manapuni Temployman yaykonqachu.

¹⁰ Israel ayllu noqamanta karunchakuspa lantinkunata yupaychajtinku, paykunawan khuska levitakunamanta juchallejkunaqa juchankumanta paganqanku.

¹¹ Levitakunaqa Temploypa punkunta qhawanankupaj churasqa kanqanku, jinallataj Temploypi imachus ruwanata ruwanqanku. Jinallataj paykuna ninapi q'olachispa jaywana uywakunata ñak'anqanku, chantá runakunaj apamusqanku jaywanakunatapis jaywanqanku. Ajinaqa tukuy runata yanapanankupaj wakichisqa kananku tiyan.

¹² Chaywanpis paykuna israelitakunata lantita yupaychanaman tanqasqankurayku, noqa tiluspa nini paykuna juchankumanta jasut'isqa kanankuta. Noqa Tukuyta Kamachej Tata Diosmin chayta nini.

¹³ Manaña sacerdote jina ruwanankuta ñawpaqeypi ruwayta atenqankuchu, nillataj noqapaj t'aqasqa imaykunamanpis qayllanqankuchu. Ajinamanta millay ruwasqankuman jina castigota apanqanku.

¹⁴ Ajinamanta levitakuna Temploypi imatachus sapa kuti ruwana kashan, chayllata ruwanankupaj paykunata churasaj. Temploypi waj ruwaykunatapis ruwallanqankutaj.

Sacerdotekuna

¹⁵ Chaywanpis Sadocpa miraynin levitakunamanta wakin sacerdotekuna Temploypi imachus ruwanankunata allinta junt'arqanku, maypachachus Israel ayllu noqamanta karunchakusharqanku, chaypacha. Chayrayku paykuna ñawpaqeyman qayllamuspa, imachus ruwana kajta ruwanankupaj. Chantá wirata, yawartawan jaywanawankupaj ñawpaqeypipuni kanqanku. Noqa Tukuyta Kamachej Tata Diosmin chayta nini.

¹⁶ Paykuna Temployman yaykonqanku, mesaymantaj qayllamonqanku imachus ruwanan kajta ruwanankupaj, kamachisqaytataj junt'anqanku.

¹⁷ Ukhu patioj punkunta yaykunankupaj, linomanta ruwasqa p'achata churakonqanku. Paykunaqa ukhu patioj punkunpi ruwanankuta junt'ashaspa, millmamanta ruwasqa p'achata mana churakonqankuchu, nillataj Templo ukhupipis.

¹⁸ Chantapis linomanta ruwasqa chhoqo ch'uluta umankuman churakonqanku, jinallataj linomanta ruwasqa calzoncillotapis. Manallataj jump'ichej p'achatapis churakonqankuchu.

¹⁹ Runakuna maypichus kashanku, chay jawa patioman llojsinankupaj ima p'achawanchus Templopi ruwanankuta junt'asharqanku, chaykunata orqhokonqanku. Chantá Temploj jallch'ana cuartonpi chay p'achata saqespa, waj p'achakunata churakonqanku. Ajinamanta Diospaj t'aqasqa chay p'achakunawan mana wajkunaman chimpachenqankuchu noqa Diospaj t'aqasqa kayninkuta.

²⁰ Chujchankuta mana p'ajlata t'ojlukonqankuchu nillataj anchatapis wiñachikonqankuchu, manachayrí patallamanta k'utukonqanku.

²¹ Mayqen sacerdotepis ukhu patioman yaykunan kashajtin, mana vinota ujyanqachu.

²² Mana qosanmanta t'aqasqa warmiwan, chayrí warmisapawanpis casarakonqankuchu. Manachayqa Israel ayllumanta kaj mana qharej chayasqan warmiwan, chayrí wañupoj sacerdotej warminwan casarakonqanku.

²³ Sacerdotekunaqa aylluyman cheqan kajta mana cheqan kajmanta reparayta yachachenqanku. Paykuna israelitakunaman yachachillanqankutaj llimphupaj qhawasqa kajtapis mana llimphupaj qhawasqa kajmanta reparayta.

²⁴ Quejakuna kajtinpis, paykuna juezkuna jina cheqanchanqanku kamachisqayman jina. Jinallataj kamachisqayman, nisqayman jina jatuchaj raymikunaytapis ruwanqanku. Samarikuna p'unchayniykunatataj noqapaj t'aqaspa waqaychanqanku.

²⁵ Sacerdoteqa mana wañusqa runaman qayllanqachu ama Diospa ñawpaqenpi mana llimphupaj qhawasqa kananpaj. Jinapis sichus wañusqa maman kanman, chayrí tatan, chayrí churin, chayrí ususin, wawqen, chayrí mana qosayoj panan kanman chayqa, chay jina kajtillan, qayllaykuyta atenqanku.

²⁶ Ayata llankhaspaqa, llimphuchakunanku tiyan, chaymantapis qanchis p'unchaytawanraj suyanqanku.

²⁷ Maypachachus watej ruwananta junt'ananpaj Temploman, chayrí ukhu patioman yaykonqa chaypacha, ñawpajta juchanmanta uywa ñak'asqata q'olachispa jaywanqa. Noqa Tukuyta Kamachej Tata Dios chayta kamachini.

²⁸ Sacerdotekunaj chayaqenkoqa noqamin kasaj. Mana ni ima jallp'atapis jap'enqankuchu israelitakuna ukhupi, imaraykuchus noqamin chayaqenku kani.

²⁹ Jucha pampachanapaj uywa ñak'asqa jaywanamanta, chantá jucharayku jaywanamantawan paykuna mikhuyta atenqanku. Israelitakuna tukuy imata noqaman qowasqankoqa paykunajta kanqa.

³⁰ Tukuy ima ñawpaj kaj poqoykunamanta, chantá israelitakuna apamuspa jaywasqanku ima, chay tukoyqa sacerdotekuna mikhunankupaj kanqa. Jinallatataj t'antata ruwaspaqa, israelitakuna aswan allin kajninta Temploman apamonqanku. Ajinata ruwajtinku, wasinkupi ni imamanta pisenqankuchu.

³¹ Sacerdotekunaqa payllamanta wañusqa uywaj aychanta mana mikhonqankuchu, nitaj lijrayoj phawajkunaj wañusqa aychankutapis, nillataj ima k'ita animal mithaspa wañuchisqantapis mikhonqankuchu, nispa.