Ezequiel 42 - DIOSPA QHELQACHISQ

Sacerdotekunapaj cuartokuna

¹ Chantá chay runa jawa patioman orqhomuwaspa, wichaynejman, chantá wichay ladopi kaj cuartokunaman pusaykuwarqa. Chaykuna ukhu patioman qhawarisqa karqanku, Temploman k'askasqataj.

² Wichaynejman qhawarisqa cuartoqa sayt'unman phishqa chunka metroyoj karqa, anchonmantaj iskay chunka phishqayoj metroyoj.

³ Ukhu patioj punkonqa, maypichus kinsa alto patayoj cuartokuna karqanku, chay ladoman qhawarisqa karqa. Chaykunataj rumiwan solasqa jawa patiopi jina karqa.

⁴ Cuartokunaj ñawpaqenkupi uj corredor karqa, anchonman phishqa metroyoj, sayt'unmantaj phishqa chunka metroyoj. Chayninta ukhuman yaykuna karqa, cuartokunaj punkunkutaj wichaynejman qhawarisqa karqanku.

⁵ Alto patapi cuartokunaqa aswan k'ullku karqanku, chawpipi kajkunamanta nisqaqa, imaraykuchus sapa alto patamanta urapi kajkuna tumpa ithiykusqa karqanku.

⁶ Chay cuartokunaqa kinsa pata altoyojkama, mana patiopi kaj cuartokuna jina sayantayojchu karqanku. Manachayqa patapi kaj cuartokuna aswan k'ullku karqanku, chawpipi kajmanta, urapi kajmantapis.

⁷ Jawa patiopi cuartokunaj ñawpaqenpi perqaqa iskay chunka phishqayoj metro karqa.

⁸ Chay cuartokunaj ñawpaqenpi kaj patioj perqantaj sayt'unman iskay chunka phishqayoj metro karqa. Corredortaj tukuyninpi phishqa chunka metroyoj karqa.

⁹ Inti llojsimuy ladopi kaj punkoqa chay cuartokunaj uranpi karqa, jawa patiomanta yaykunapaj.

¹⁰ Inti llojsimuynej ladopi cuartokuna kallarqataj. Kay cuartokunaqa Temploj uray ladonpi karqanku. Jawa patioj perqanwan khuskapis cuartokuna kallarqankutaj.

¹¹ Chay cuartokunaj corredornin wichaynejpi cuartokunajta jinallataj karqa, sayt'unmanpis anchonmanpis kikillantaj. Yaykunanpis, llojsinanpis kikillantaj karqa.

¹² Uraynejpi kaj cuartokunaman chayanapaj, corredor qallarikushan, chaynejpi punku karqa, chaytaj inti llojsimuynejpi perqaj chimpanpi karqa. Chayninta chay cuartokunaman yaykuna karqa.

¹³ Chantá chay runa niwarqa: Wichaynejpi cuartokuna, jinallataj uraynejpi cuartokunapis, mayqenkunachus patiopi kashanku, chaykuna Diospaj t'aqasqa kanku. Chaypi Tata Diospaj t'aqasqa sacerdotekuna mikhunku Tata Diosman jaywasqa kaj imakunata. Paykunaqa chayllamantaj Diosman jaywasqa imakunata churanku, uywa ñak'asqata, jucharayku jaywasqata ima, chay cheqaqa Diospaj t'aqasqamin kasqanrayku.

¹⁴ Sacerdotekuna Temploman yaykuspaqa, jawa patioman mana llojsinankuchu tiyan, ima p'achawanchus ruwasharqanku, chay p'achata mana orqhokuspaqa. Chay p'achaqa Diospaj t'aqasqamin. Chayrayku maypichus waj runakuna kashanku, chayman rinankupajqa waj p'achata churakunanku tiyan, nispa.

Templo mashkhachus midin

¹⁵ Chantá chay runa Temploj ukhunta midiyta tukusqantawan, inti llojsimuy punkunejta jawaman pusawarqa. Chantá Temploj muyuyninta midiyta qallarerqa.

¹⁶ Midina varawan inti llojsimuynejta miderqa, chaytaj 250 metroyoj karqa.

¹⁷ Wichaynejta midillarqataj, chaytaj 250 metroyoj karqa.

¹⁸ Chantá uraynejtañataj miderqa, chaytaj 250 metroyojllataj karqa.

¹⁹ Chantá inti yaykuynejtañataj midillarqataj, chaypis 250 metroyojllataj karqa.

²⁰ Tawantin ladota miderqa. Temploj muyuyninpi sapa ladoman 250 metroyoj, perqawan muyuykusqa karqa. Chay perqaqa Diospaj T'aqasqa Cheqata t'aqarqa Diospaj mana t'aqasqa cheqamanta.