Ezequiel 41 - DIOSPA QHELQACHISQ

¹ Chaymanta qhepaman chay runa Templo ukhuman pusaykuwaspa, sayantankunata miderqa. Sapa sayanta phatunman kinsa metroyoj karqa.

² Punkonqa anchonman phishqa metroyoj karqa. Punkoj perqantaj purajman iskay metroyoj karqanku. Chaymantaqa chawpinta medillarqataj, chaytaj sayt'unman iskay chunka metroyoj, anchonmantaj chunka metroyoj karqa.

³ Chantá aswan ukhunejman pusaykuwaspa, midillarqataj punkoj sapa sayantanta. Sapa uj rakhunman uj metroyoj karqa. Yaykuna punkutaj anchonman kinsa metroyoj karqa. Sayantankunataj sapa uj kinsa metro khuskanniyoj karqanku, jinallataj rakhunmanpis.

⁴ Chaymanta aswan ukhupi kaj cuartotañataj miderqa, chaytaj sayt'unman chunka metroyoj karqa, anchonmanpis kikillantaj. Chantá chay runa niwarqa: Kaymin Diosllapaj T'aqasqa Cheqaqa, nispa.

Perqaman k'askasqa cuartokuna

⁵ Chaymanta chay runa Temploj jawa perqanta midillarqataj, chaytaj phatunman kinsa metroyoj karqa. Temploj muyuyninpitaj cuartokuna karqanku, chaykunataj anchonman iskay metrokama karqanku.

⁶ Chay cuartokunataj kinsa altoyoj ruwasqa karqanku, sapa altopitaj kinsa chunka cuartokuna karqanku. Temploj perqantaj sapa altopi astawan ñañu karqa, chaymantaj cuartokunaj kurkunkunata churarqanku, chay jinamanta Temploj perqanman mana atiykukunankupaj.

⁷ Aswan pata kaj cuartokunaqa aswan ancho karqanku. Chay cuartokunaman wicharinapaj patilla ruwasqa karqa. Jinallataj iskay kajman, kinsa kaj pataman wicharinapaj chay patilla karqa.

⁸ Temploqa alto cimientoyoj karqa. Temploj cimientontaj kinsa metro alto karqa.

⁹ Cuartokunaj jawa perqanqa phatunman iskay metro khuskanniyoj karqanku, uj cuartomanta ujnin cuartokama.

¹⁰ Uj cuartomanta uj cuartokamaqa purajman chunka metroyoj karqa.

¹¹ Cuartokuna patioman llojsinayoj karqanku, ujnin wichaynejman qhawarisqa, ujnintaj uraynejman qhawarisqa karqa. Chay patioqa iskay metro khuskanniyoj karqa.

Inti yaykuynejpi wasi

¹² Inti yaykuynejpi patioman qhawarisqa uj wasi karqa. Chayqa anchonman kinsa chunka phishqayoj metroyoj karqa, sayt'unmantaj tawa chunka phishqayoj metroyoj, perqataj phatunman iskay metro khuskanniyoj karqa.

Templo may jatunchus kasqan

¹³ Chantá chay runa Templotañataj miderqa, chaytaj sayt'unman phishqa chunka metroyoj karqa. Ukhu patio wasiwan, tukuynin perqanwan ima phishqa chunka metroyojllataj karqa.

¹⁴ Temploj uyan chantá inti llojsimuynejman qhawarisqa ukhu patio phishqa chunka metroyoj karqa.

¹⁵ Chantá perqata sayt'unman midillarqataj, Temploj qhepa ladon kajta, mayqenchus ukhu patioj chimpan karqa, chayta. Chantá perqatapis sapa ladoman midillarqataj, chaytaj phishqa chunka metroyoj karqa.

¹⁶ Temploj ukhunpi cuartokuna, corredorpa punkunpis, chantá kinsa altoyoj cuartokunapis pampamantapacha ventanakama maderawan k'askachisqa karqanku.

¹⁷ Templo patamanta ukhu kaj wasikama chay wasej jawanta, tukuynin perqanta, ukhunta, jawantawan chay runa midillarqataj.

¹⁸ Querubinwan, palma sach'a warawawan ima kikin perqapi ruwasqa karqanku. Sapa iskay querubinkunaj chawpinkupi uj palma sach'a karqa. Sapa uj querubintaj iskay uyayoj karqa.

¹⁹ Ujnin uyanqa runaj uyan karqa, palmanejman qhawarisqa, ujnin uyantaj leonpa uyan jina karqa, ujnin ladonpi kajtaj palmanejman qhawarisqallataj karqa. Templo perqaqa chay jina ruwasqawan muyuykusqa karqa.

²⁰ Pampamantapacha punkoj patankama querubinkunawan, palma sach'a warawawan ima ruwasqa karqanku.

²¹ Temploj sayantankunaqa tawa esquinayoj karqanku. Diosllapaj T'aqasqa Cheqaj chimpanpi kikillantaj karqa.

Maderamanta ruwasqa altar

²² Maderamanta ruwasqa altarqa sapa ladoman iskay metroyoj karqa. Uramanta patamantaj uj metro khuskanniyoj karqa. Esquinankuna, pampan, jinataj ladonpis maderamanta karqa. Chay runataj niwarqa: Kay mesaqa Tata Diospa ñawpaqenpi kashan, nispa.

Punkukuna

²³ Templojtawan, Diosllapaj T'aqasqa Cheqajtawan, punkunkoqa iskay ladoman kichakoj karqa.

²⁴ Sapa punkutaj perqa ladoman kicharikorqa.

²⁵ Temploj punkunpis querubinkunawan, palma sach'akunawan warawasqa karqanku, imaynachus Temploj perqankunapi, chantá patioj jawan perqakunapipis karqa, ajina. Yaykunapitaj maderamanta wisq'anayoj karqa.

²⁶ Corredorpi punkoj ladonpi rejillayoj ventanakuna karqanku, puraj ladonpi palma warawayoj. Temploman k'askasqa cuartokunapis rejillayojllataj karqanku.