Ezequiel 30 - DIOSPA QHELQACHISQ

Egiptopaj yarawi

¹ Tata Dios kay jinata niwarqa:

² Runaj churin, noqamanta sut'inchaspa niy: Tukuyta Kamachej Tata Dios nin: Qhaparispa waqaychej: Ay, chay p'unchay imaynarajchus kanqapis, nispa.

³ Chay p'unchay qayllamushanña. Tata Diospa jasut'inan p'unchayqa qayllapiña. Chay p'unchay phuyusqa p'unchay jina kanqa, tukuy suyukunapajtaj jasut'ina p'unchay kanqa.

⁴ Egiptoj contranpi maqanaku jatarenqa. Chaypi ashkha runakuna wañuchisqa kanqanku, kapuyninkutapis qhechonqanku. Egiptota cimientonmantapacha urmachejtinku, Etiopiamanta kaj runakunaqa kharkatitenqanku.

⁵ Egipto runakunawan khuska espadawan wañurachisqallataj kanqanku: Etiopiamanta, Futmanta, Ludmanta, tukuy Arabiamanta, Libiamanta ima, chay suyukunamanta runakuna. Pikunachus Egiptowan tratota ruwasqanku, chay suyukunamanta kajkunapis wañuchisqallataj kanqanku, nispa.

⁶ Tata Dios kay jinata nillantaj: Egiptota maqanakupi yanapajkunapis wañuchisqallataj kanqanku. Atiyniyoj kasqanmanta jatunchakusqanpis urmallanqataj. Migdol nisqa jap'iymanta Sevene nisqa jap'iykama maqanakupi wañuchisqa kanqanku. Noqa Tukuyta Kamachej Tata Dios ajinata nini.

⁷ Egipto suyoqa tukuy suyumanta nisqaqa astawan ch'inyachisqa kanqa. Llajtankunapis wakin llajtakunamanta nisqaqa aswan thuñisqa kanqanku.

⁸ Maypachachus noqa Egiptoman ninata kachaykusaj, tukuy yanapajninkunatataj t'unaykusaj chaypacha, paykuna yachanqanku noqa Tata Dios kasqayta.

⁹ Chaypacha noqa barcopi kachakunata kachasaj Etiopía suyupi ni imamanta manchachikoj runakunaman. Paykunataj manchayta manchachikonqanku, imaynatachus Egiptota jasut'ishajtiy mancharikorqanku, ajinata. Chay p'unchaytaj chayamunanpiña kashan.

¹⁰ Tukuyta Kamachej Tata Dios kay jinata nillantaj: Babiloniamanta kuraj kamachej Nabucodonosorpa makinnejta Egiptoj qhapaj kapuyninta chinkachisaj.

¹¹ Nabucodonosorqa soldadonkunawan Egipto suyuta thuñiykoj renqanku, pikunachus tukuymanta aswan mana sonqoyoj runakuna kanku, chaykuna. Chantá espadankuwan Egipto llajtayojkunata wañurachispa, Egipto suyuta aya junt'ata saqerparenqanku.

¹² Noqaqa Nilo mayupi yakuta ch'akichisaj, jinaspataj chay suyuta millay runakunaman qosaj, tukuy kapuyninkutataj waj llajtayojkunawan apachispa ch'inyachisaj. Noqa Tata Dios chaytaqa nini.

¹³ Tukuyta Kamachej Tata Dios kay jinata nillantaj: Menfis llajtaj tukuy diosninkuta t'unaykusaj. Egiptopi manaña kuraj kamachej kanqachu. Tukuy suyupitaj manchachikuy junt'a kanqa.

¹⁴ Patros llajtatapis ch'inyachillasajtaj, Soán llajtaman ninata jap'iykuchisaj, Tebas llajtatataj jasut'isaj.

¹⁵ Noqaqa Egiptopi sumaj jark'achasqa Sin nisqa llajtaman k'araj phiñakuyniyta kachaykusaj, Tebas llajtapitaj tukuy runata chinkachisaj.

¹⁶ Egipto suyuta ninawan jap'iykuchisaj. Sin llajtataj sinch'i nanaywan q'ewiykachakonqa. Tebas llajtapis thuñisqa kanqa, Menfis llajtapajtaj llakiy mana tukukuyniyoj kanqa.

¹⁷ Chantá Avén llajtamanta, jinallataj Pibeset llajtamanta ima tukuy waynakuna wañuchisqa kanqanku, warmikunataj apasqa kanqanku.

¹⁸ Egiptoj atiyninta p'akejtiy, atiyninrayku runaykachayninta chinkachejtiytaj, Tafnes nisqa llajtapaj chay p'unchaypi inti laqhayaykonqa. Egipto suyutataj phuyu p'ampaykonqa, tukuy llajtakunapi tiyakojkunataj apasqa kanqanku.

¹⁹ Egiptota jasut'ejtiy, paykuna yachanqanku noqa Tata Dios kasqayta, nispa.

Tata Diosqa faraonpa makinta p'akin

²⁰ Chunka ujniyoj wataña Babiloniaman preso apasqa kasqaykumanta, wata qallariy killapi qanchis p'unchayninpi Tata Dios niwarqa:

²¹ Runaj churin, Egiptopi kuraj kamachej faraonpa makinta p'akini, manataj pipis jampiykuspa wataykoj kanchu, qhaliyapuytawan watej kallpachakuspa espadata jap'inanpaj.

²² Chayrayku noqa Tukuyta Kamachej Tata Dios kay jinata nini: Noqaqa Egiptoj kuraj kamachejnin faraonpa contranta sayarini. Iskaynin makinta p'akirasaj, allin kajta, chantá p'akisqa karqa, chaytawan. Ajinata ruwaspataj, espadata makinmanta kacharichisaj.

²³ Egiptomanta runakunatataj waj suyukunaman ch'eqerachisaj, waj suyukunaman qhallirparisaj.

²⁴ Chantá Babiloniaj kuraj kamachejninpa makinta atiyniyojman tukuchisaj, espadaytataj makinman churasaj. Faraonpa makintatajrí p'akirasaj, paytaj awqanpa ñawpaqenpi maytapuni waqanqa, wañuy patapipis kashanman jina.

²⁵ Babiloniaj kuraj kamachejninpa makinta kallpachasaj, faraonpa makintataj p'akirasaj. Espadayta Babiloniaj kuraj kamachejninpa makinman churajtiytaj, payqa Egiptoj contranpi oqharikonqa. Chantá Egiptopi tiyakojkuna noqa Tata Dios kasqaytaqa yachanqanku.

²⁶ Egiptomanta runakunata waj suyukunaman ch'eqerachisaj, waj llajtakunamantaj paykunata apachisaj. Chaypacha noqa Tata Dios kasqayta yachanqanku.