Ezequiel 3 - DIOSPA QHELQACHISQ

¹ Chantá Tata Dios niwarqa: Runaj churin, kay qhelqasqa p'anqata mikhuykuy, jinaspataj Israel aylluman parlamuy, nispa.

² Jinataj simiyta kicharerqani, paytaj chay qhelqasqa p'anqata mikhuykuchiwarqa.

³ Chaymantataj niwarqa: Runaj churin, kay p'anqa qosqayta mikhuspa, wijsaykiman junt'aykuchiy, nispa. Mikhuykojtiytaj, simiypi abeja misk'i jina manchay misk'i karqa.

⁴ Chantá niwarqa: Rispa, Israel aylluman noqaj nisqayta willamuy.

⁵ Manamin mana rejsisqa parlayniyoj ayllumanchu kachashayki, nitaj mana entiendey atina parlayniyojkunamanchu. Manachayqa Israel aylluman kachashayki.

⁶ Mana ashkha suyukunamanchu kachashayki, nitaj entiendeyta mana atinaykipaj jina parlayniyojkunamanchu. Chaykunaman kachaykiman chaypis, paykuna uyarisunkumanraj.

⁷ Chaywanpis Israel aylloqa mana uyarisuyta munanqankuchu, imaraykuchus noqata mana kasuwayta munankuchu. Israel aylloqa tukuyninku mana kasukoj rumi sonqoyojkuna kanku.

⁸ Noqatajrí qanta ruwasqayki paykuna jina sinch'i sonqoyoj, k'ullutaj kanaykipaj.

⁹ Diamante sutiyoj rumita jina sinch'i kanaykipaj ruwasqayki, chhanka rumimantapis aswan chukitaraj. Ama paykunata manchachikuychu, ni phiña uya qhawasojtinkupis, aswan millay mana kasukoj kajtinkupis, nispa.

¹⁰ Chantapis nillawarqataj: Runaj churin, allinta uyariway, tukuy ima nisqayta sonqoykipi sumajta jap'iy.

¹¹ Rispa, llajta masiykikunata watukamuy, pikunachus Babilonia suyuman apasqa karqanku, chaykunata. Uyarisuchunkupis amapis paykunaman ajinata niy: Kay jinata Tukuyta Kamachej Tata Dios nin, nispa.

¹² Chaymantá Diospa Espíritun oqhariwarqa, qhepaypitaj uj parlamojta uyarerqani, jallp'a ikhakuspa imaynatachus manchayta sonarin, jinaman rijch'akojta. Chay parlamojtaj nerqa: Tata Diospa jatun kaynenqa janaj pachapi yupaychasqa kachun, nispa.

¹³ Chay kawsajkunaj lijrankuna ujkuna ujkunawan wajtanakusqankurayku, jinallataj paykunawan kaj ruedankuna ima jatun sonayta ruwarqanku. Chay sonaytaj sinch'i jallp'a ikhakuy jinapuni uyarikorqa.

¹⁴ Jinapi Diospa Espíritun jap'iwaspa, chaymanta orqhowarqa, noqataj may llakisqa, sonqo p'akisqataj risharqani. Chaywanpis Tata Dios makinwan sinch'ita jap'iwarqa.

¹⁵ Chantá Tel Avivman, Quebar mayoj kantunkama chayarqani, maypichus apasqa israelitakuna tiyakusharqanku, chayman. Chaypitaj paykunawan qanchis p'unchay junt'ata karqani, manataj yacharqanichu imatachus ruwanayta, nitaj imatachus parlanayta.

Diosqa Ezequielta israelitakunata qhawananpaj churan

¹⁶ Qanchis p'unchay tukukuyta Tata Dios parlamuwaspa, niwarqa:

¹⁷ Runaj churin, noqa qanta Israel aylluta qhawanaykipaj soldadota jina churayki. Noqa imatachá nisqayki, chayta noqamanta paykunaman willanki, noqaj sutiypi k'amispa, reparachispataj.

¹⁸ Sichus millayta ruwaj runata nisaj: Qan wañunkipuni, nispa, qantaj mana k'aminkichu, nitaj parlankichu chay runaman millay kawsayninmanta reparachispa chayqa, payqa mana allin ruwasqanrayku wañonqa. Noqatajrí pay wañusqanmanta qanmanta cuentata mañasqayki.

¹⁹ Sichus qan chay runata millayta kawsashasqanmanta reparachispa k'amiwaj, paytaj manapuni mana allin ruwasqanta nitaj millayta purisqanta saqenchu chayqa, pay juchanrayku wañonqa. Qantajrí wañusqanmanta mana juchayoj kanki.

²⁰ Ichapis mayqen cheqan runa allinta ruwaspa puriyta saqespa, millay kajta ruwanman. Sichus noqa payta wañuy pataman churayman, qantaj mana reparachiwajchu chayqa, pay juchanrayku wañonqa. Noqataj ñawpajpi allinta ruwasqanta mana cuentanman churasajchu. Chaywanpis chay runa wañusqanmanta qanmanta cuentata mañasqayki.

²¹ Sitajchus qanqa cheqan runata reparachispa ama juchallinanta k'amiykunki, paytaj kasusunkiman chayqa, pay kawsallanqapuni. Pay reparachisqaykita kasukusqanrayku qan wañunaykimanta qhespichisqa kanki, nispa.

Ezequiel opayapun

²² Chaymantataj Tata Dios makinta patayman churaykuwaspa niwarqa: Sayarispa, pampaman riy, chaypitaj parlasqayki, nispa.

²³ Chantá jatariytawan, pampaman rerqani, chaypitaj Tata Diospa jatun kayninpa lliphipiyninta rikorqani, imaynatachus Quebar mayu kantupi rikorqani, chay jinallatataj. Chantá uyayta pampaman chayachinaykama k'umuykorqani.

²⁴ Chaypacha Diospa Espíritun sonqoyman yaykuspa, sinch'ita sayachiwarqa. Tata Diostaj parlamuwaspa, niwarqa: Wasiykiman rispa, wasiyki ukhupi wisq'aykakamuy.

²⁵ Qantarí, runaj churin, waskhawan wataykusonqanku, ajinamanta paykunawan khuska mana puriyta atinaykipaj.

²⁶ Aswanpis noqa qalluykita watasaj opayanaykipaj. Ajinamanta paykunata mana k'amiyta atinkiñachu, imaraykuchus mana kasukoj k'ullu runakuna kanku.

²⁷ Chaywanpis maypachachus parlasuyta munasaj chaypacha, simiykita kicharisaj, noqaj nisqayta paykunaman willanaykipaj. Chantá nisqayta paykunaman willaytawan, ninki: Tukuyta Kamachej Tata Dios kay jinata nin, nispa. Uyariyta munajqa uyarisonqa, mana uyariyta munajtaj mana uyarisonqachu, imaraykuchus mana kasukoj ayllu kanku, nispa.