Ezequiel 22 - DIOSPA QHELQACHISQ

Jerusalenpa millay ruwasqan

¹ Tata Dios niwarqa:

² Runaj churin, runa wañuchi llajtataqa manachu juchachanki? Millayta ruwaspa ch'ichichakusqanta manachu sut'iman orqhonki?

³ Chay llajtata ninki: Tukuyta Kamachej Tata Dios kay jinata nisunki: Qanpi tiyakojkunata wañuchej llajta kanki, lantikunatataj yupaychaspa ch'ichichakunaykipaj ruwakunki. Chayrayku jasut'isqa kanayki p'unchay chayamusonqa.

⁴ Runakunata wañuchisqaykirayku juchayoj kanki, lantikunata ruwakusqaykiwantaj ch'ichichakunki. Ajinamanta qanqa jasut'isqa kanayki p'unchayta qayllachimunki, chinkanayki p'unchaytaj chayamunña. Chayrayku tukuy runakuna qanmanta alqochakonqanku, tukuy suyukunapis asipayasonqanku.

⁵ Qayllapi kajkuna, jinallataj karupi kajkunapis qanmanta alqochakonqanku, lantita yupaychasqaykimanta may uyarisqa kasqaykirayku, chantá ch'ajwawan junt'a kasqaykiraykutaj.

⁶ Israelpa kuraj runankunaqa atisqankuta runakunata wañuchinku.

⁷ Jerusalén llajta, qanpi tiyakojkunaqa tatankuta, mamankutapis pisipaj qhawanku. Karu llajtayoj runakunatapis ñak'arichinku. Wajcha wawakunamanta, warmisapakunamantataj ch'uskinku.

⁸ Jinallataj noqapaj t'aqasqa kaj imakunata pisipaj qhawanku, chantá samarina p'unchayniytapis mana kasuta ruwankuchu.

⁹ Qanpi tiyakojkuna runata wañuchinankupaj llullakunku. Orqokunapi lantikunaj sutinkupi mikhuy wayk'usqata mikhumoj rinku, millay khuchiriyotataj ruwanku.

¹⁰ Wakinkunaqa tatankoj warminwan khuchichakunku, wakinkunataj warminku killa yawarninpi kashajtinpis, paywan puñuykunku.

¹¹ Wakinkunataj runa masinkoj warminwan khuchichakunku, chayrí ñojch'anwan, manachayrí tatanpa ususinta alqochanku.

¹² Wakinkunaqa runa masinkuta wañuchinankupaj qolqeta pagachikunku. Qolqetapis ashkha interesniyojta mañarinku. Runa masinkuta ch'awkiyanku, kallpankuman atinikuspa ñak'arichinku ima. Noqamantarí qonqakapunku. Noqa Tukuyta Kamachej Tata Diosmin chaytaqa nini.

¹³ Jerusalén llajta, runaj yawarninta ch'onqasqaykimanta, runakunata wañuchisqaykimantawan phiñasqa kashani.

¹⁴ Maypachachus noqa contraykita jatarisaj chaypacha, churanakunawaykipaj kallpayki kanmanchu? Makiykipis kallpayojllapunichu kanqa? Noqa Tata Diosmin chayta nini, imatachus nisqaytataj junt'asajpuni.

¹⁵ Tukuy llajtakunaman ch'eqerachisqayki, tukuy suyukunamantaj wijch'usqayki. Jinata ruwaspa, ch'ichichakusqaykita llimphuchasaj.

¹⁶ Qan juchallisqaykirayku, tukuy suyukunapi noqamanta mana allintachu parlanqanku. Chantá qanqa yachanki noqa Tata Dios kasqayta, nispa.

¹⁷ Tata Dios nillawarqataj:

¹⁸ Runaj churin, imaynatachus runakuna cobreta, estañota, fierrota, qorita, chayrí qolqe metaltapis k'ajarishaj hornoman churaykojtinku tukuy ch'ichin qhepakun, ajinamin Israel noqapajqa.

¹⁹ Chayrayku noqa Tukuyta Kamachej Tata Dios nini: Tukuyniykichej q'opaman jina tukusqaykichejrayku, Jerusalén llajta chawpipi tantaykusqaykichej.

²⁰ Runakuna qolqeta, bronceta, fierrota, titita, estañota ima tantaykuspa, hornoman churaykunku, ninawantaj enqhaykunku chaykunata unuyachinanpaj. Ajinallatataj noqapis k'araj phiñakuyniypi tantaykusqaykichej, chaypitaj unuyachisqaykichej.

²¹ Noqa tantaykusqaykichej, chantá k'araj phiñakuyniyta pataykichejman kachaykamusaj, chay llajta chawpipitaj unuyachisqa kankichej.

²² Imaynatachus hornopi qolqe metal unuyan, ajinata qankunata unuyachisqaykichej llajta chawpipi. Ajinamanta noqa Tata Dios phiñakuyniyta qankunaman kachaykamusqayta yachankichej, nispa.

²³ Tata Dios nillawarqataj:

²⁴ Runaj churin, Israelta niy: Qanqa ch'ichichasqa jallp'a kanki, ch'aki watawan jasut'isqa, mana yakuyojtaj.

²⁵ Kay suyupi kamachejkunaqa Diosmanta sut'inchajkuna leonkuna jina kanku. Qhaparispa, mithaspataj runakunata wañurachinku. Chay runakunaj qolqe waqaychanankuta, kapuyninkutawan suwanku. Jinallataj ashkha warmej qosankutapis wañurachinku.

²⁶ Kay suyoj sacerdotenkunapis kamachisqayta p'akillankutaj. Noqapaj t'aqasqa imakunata pisipaj qhawanku. Imachus llimphupaj qhawasqa kajta, chayrí ch'ichipaj qhawasqa kajtapis mana reparankuchu. Manataj wajkunaman yachachinkuchu, imachus Diospaj t'aqasqa kasqanta, mana t'aqasqa kajtapis. Jinallatataj samarina p'unchayniyta mana waqaychankuchu nitaj jatunpaj qhawawankuchu.

²⁷ Kay llajtapi kurajkunaqa atojkuna jina jap'isqankuta mithanku, runakunatataj wañuchinku kapuyninkuta suwaspa qhapajyanankupaj.

²⁸ Sut'inchajkunataj imachus cheqan kajta pakanku, imaynatachus uj runa perqata yesowan lluch'in, ajinata. Paykuna cheqan kajta pakanku manakajta sut'inchaspa, mosqoypi jina llulla rikusqankuta willaspataj. Paykuna ninku: Kay jinata Tukuyta Tata Kamachej Dios nin, nispa. Chaywanpis noqa Tata Dios paykunaman ni imatapis nerqanichu.

²⁹ Kay suyupi tiyakojkunapis millayta ruwanaman, suwakuymantaj qokullankutaj. Wajcha runakunata, mana kapuyniyojkunatapis munasqankuta ruwanku. Waj llajtayojkunatapis ñak'arichispa, mana paykunapaj cheqan justiciata ruwankuchu.

³⁰ Chay runakuna ukhupi noqa uj runallatapis mask'arqani, pillapis kay suyoj allinninta mask'aspa, ñawpaqeypi noqamanta mañapunanpaj ajinamanta ama paykunata chinkachinaypaj. Chaywanpis mana ujllatapis tarerqanichu.

³¹ Chayrayku paykunaj patankuman k'araj phiñakuyniyta kachaykamusaj. Jinaspataj, nina lawray jina phiñakuyniywan paykunata chinkachisaj. Millayta ruwasqankuman jina pagachikusaj. Noqa Tukuyta Kamachej Tata Dios ajinata nini.