Ezequiel 21 - DIOSPA QHELQACHISQ

Tata Dios Jerusalenta jasut'in

¹ 1 (6) Chantá Tata Dios niwarqa:

² 2 (7) Runaj churin, Jerusalennejman kutirispa, Temploj contranta parlay. Israel suyoj contrantapis sut'inchay.

³ 3 (8) Kay jinata ninki: Tata Dios nin: Noqa contraykipi sayaykuni. Juchayojta mana juchayojtapis espadaywan wañurachisaj.

⁴ 4 (9) Arí, juchayojta, mana juchayojta wichaynejmantapacha uraynejkama, ujllapi tukuyninta wañurachinaypaj espadayta jallch'ananmanta orqhosaj.

⁵ 5 (10) Chay jinamanta noqa Tata Dios jallch'ananmanta espadayta orqhosqayta tukuy runakuna yachanqanku, manañataj ujtawan espadayta jallch'aykakapusajchu, nispa.

⁶ 6 (11) Chayrayku, runaj churin, runakunaj ñawpaqenkupi sonqo p'akisqa, phutisqataj, may llakiyta waqay.

⁷ 7 (12) Imamantachus waqasqaykita tapusojtinkutaj, ninki: May jatun llakiy chayamunanta yachaspa waqashani. Chaypacha tukuy runakuna mana kallpayoj, qollpirasqa, manchariywan kanqanku. Makinkupis llawch'iyanqa, tukuy chaki moqonkutaj manchariywan kharkatitenqanku. Chay p'unchay chayamushanña, chaytaj jinapuni kanqa. Noqa Tukuyta Kamachej Tata Diosmin chayta nini.

⁸ 8 (13) Noqa Tata Dios ajinata nini:

⁹ 9 (14) Runaj churin, imachus chayamunanmanta sut'inchay. Noqa Tata Dios ajinata kamachisusqayta niy: Espadayqa filochasqaña, lliphipirishantaj.

¹⁰ 10 (15) Filochasqaña kashan wañuchinapaj, lliphipirishantaj illapakunata kacharinanpaj.

¹¹ 11 (16) Espadaqa llosq'ochasqa, filochasqataj kashan, runata wañuchejpa makinman churanapaj.

¹² 12 (17) Qantajrí, runaj churin, sonqo nanayta qhapariy, waqaytaj, imaraykuchus kayqa aylluyta wañurachinapaj wakichisqa kashan, tukuy Israelta kuraj kamachejkunapaj ima. Paykunaqa aylluywan khuska juchachasqa kanku wañuchisqa kanankupaj. Chayrayku llakiy nanaywan qhasqoykita takakuy.

¹³ 13 (18) Noqa Tukuyta Kamachej Tata Dios chayta nini.

¹⁴ 14 (19) Runaj churin, makiykita t'ajllakuspa sut'inchay. Espadaqa kutin kutinta wajtachun. Chayqa may chhika runakunata wañuchinapaj espada, may manchanapaj espada. Tukuynejman muyuykuspa, runakunata kharkatitichichun.

¹⁵ 15 (20) Chay espadaqa ashkha runata manchachenqa, ashkhatataj wañurachenqa. Tukuy wasi punkupi wañuchej espadata churani. Espadaqa sumaj llosq'ochasqa illapakunata kacharinanpaj, jinataj wañurachinapaj wakichisqa kashan.

¹⁶ 16 (21) Espadaqa paña ladonta, lloq'e ladontataj khuchun. May filochasqa kasqanrayku tukuyta wañurachin.

¹⁷ 17 (22) Noqapis espada tukuyta wañurachinanta saqesaj, phiñakuyniy thasnukunankama. Noqa Tata Diosmin ajinata nini.

¹⁸ 18 (23) Tata Dios kayta nillawarqataj:

¹⁹ 19 (24) Runaj churin, iskay ñankunata dibujay, Babiloniamanta kuraj kamachej espadayoj jamunanpaj. Iskaynin ñankunaqa uj suyullamanta llojsinanku tiyan. Jinallataj uj señalta sapa ñanpa qallariyninpi churay, may llajtamanchus risqanta rikuchinanpaj.

²⁰ 20 (25) Uj ñan kanqa Amón suyuman, Rabá llajtaman ima kuraj kamachejpa espadan chayananpaj. Ujnin ñantaj kanqa Judá suyoj sumaj jark'achasqa Jerusalén llajtaman kuraj kamachej chayananpaj.

²¹ 21 (26) Babiloniamanta kuraj kamachejqa maynejmantachus iskaynin ñankuna qallarin, chaypi suerteta choqananpaj sayashan. Jinapi flechantapis thalarin, lantinkunata tapurikun, uywakunaj k'iwichankutataj qhawan.

²² 22 (27) Suerte qhawasqantaj paña ladoman llojsin, Jerusalén cheqata señalaspa. Chay señaltaj kayta niyta munan: Kuraj kamachejqa soldadonkunata kamachinan tiyan maqanakuman yaykunankuta, chantá runakunata wañurachiyta qallarinankuta. Paykunataj llajta punkuta thuñina armakunata wakichenqanku, oqharillanqankutaj jallp'a moqokunata, chantá perqata wasaykuna torrekunata ima.

²³ 23 (28) Chaywanpis Jerusalén llajtayojkunapaj chay señalqa llulla sut'inchay jinalla kanqa, imaraykuchus paykuna sumaj tratotaña ruwasqanku Babiloniata kuraj kamachejwan. Kuraj kamachejtajrí paykunata yuyarichenqa millay ruwasqankumanta, jinaytawantaj paykunata jap'enqa, nispa.

²⁴ 24 (29) Chayrayku Tukuyta Kamachej Tata Dios kay jinata israelitakunaman nin: Millay ruwasqaykichej, contrayta oqharikuspa wasanchawasqaykichej ima sut'i kashanku. Tukuy ima ruwasqaykichejpi juchallisqaykichejqa sut'i kashan. Chayrayku jap'isqa kankichej.

²⁵ 25 (30) Qanpajrí, Israelpa kuraj kamachejnin, runa wañuchi millay kamachej, jasut'isqa kanayki p'unchay qayllamunña, millayta ruwanayki tukukunanpaj.

²⁶ 26 (31) Tukuyta Kamachej Tata Dios kay jinata nisunki: Uma mayt'ukunaykita, pilluykita ima orqhokuy, tukuy imataj waj jina kanqa. Pisipaj qhawasqa kajqa pataman oqharisqa kanqa, jatunpaj qhawasqa kajtaj k'umuykuchisqa kanqa.

²⁷ 27 (32) Noqaqa tukuyta thuñisaj, allin thuñisqatapuni saqesaj, ujtawantaj ni pi sayarichenqachu. Babiloniata kuraj kamachej chayamojtin, ajina kanqa. Paymin nisqayta ruwanqa.

Amonitakuna jasut'isqa kanqanku

²⁸ 28 (33) Qanrí, runaj churin, sut'inchaspa niy: Tukuyta Kamachej Tata Diosqa amonitakuna alqochakusqankumanta nin: Espadaqa amonitakunata wañurachinanpaj orqhosqaña, llosq'ochasqataj kashan t'unaykunanpaj.

²⁹ 29 (34) Paykunaj mosqoypi jina rikusqankoqa qhasilla, llullataj. Chay espadaqa urmanqa millayta ruwajkunata wañuchinanpaj, juchachasqa kajkunaj kunkankuta qholurananpajtaj. Paykunata jasut'inaypaj p'unchayqa chayamunña, millayta ruwananku tukukunanpaj.

³⁰ 30 (35) Qan, Babilonia, espadaykita waqaychananman jallch'aykakapuy. Maypichus paqarikorqanki, may suyupichus wiñarqanki, chaypi juchachasqayki.

³¹ 31 (36) Noqaqa phiñakuyniyta manchay lawrashaj ninaman rijch'akojta pataykiman kachaykamusaj. Kallpaman atinikuspa mana sonqoyoj runakunaj makinkuman jaywaykusqayki, thuñinapaj yachasqa kajkunaman.

³² 32 (37) Ruphachisqa, thuñisqataj kanki. Yawarniykitaj llajtantinta mayu jina purirenqa, nitaj pipis ujtawan qanmanta yuyarikonqachu. Noqa Tata Diosmin chaytaqa nini.