Ezequiel 18 - DIOSPA QHELQACHISQ

Juchallejqa wañonqa

¹ Tata Dios kayta niwarqa paypa sutinpi Israelman ninaypaj:

² Israelitakuna, qankunaqa sapa kuti kayta ninkichej: Tatakuna k'allku uvata mikhunku, wawankukunataj kirunkuta khipichikunku, nispa.

³ Noqa Tukuyta Kamachej Tata Dios kawsayniyrayku tiluspa nini: Manaña jayk'ajpis Israelpi ajinata nispa parlanqankuñachu.

⁴ Noqajtamin tukuy runakuna kanku, tatapis, jinallataj wawapis. Noqataj kayta nini: Pichus juchallejqa, chaymin wañonqapuni, nispa.

⁵ Cheqan runaqa cheqan kajta ruwan, maychus kajtataj.

⁶ Payqa loma patapi lanti yupaychana jatun mikhuypi mana mikhunchu, nitaj Israelpa qhasi manakaj lantinkunapi atinikunchu. Runa masinpa warminwan mana puñuykunchu, nillataj warminwanpis puñuykunchu killa yawarninpi kashajtin.

⁷ Mana pitapis ñak'arichinchu. Manukojman prenda saqesqanta qopun, manataj pimantapis suwanchu. Yarqhachikojman mikhunata qon, mana p'achayojtataj p'achallichin.

⁸ Qolqeta mana interesniyojta mañan, nitaj ashkhata ganaytachu mask'an. Mana cheqan kaj ruwanamanta t'aqakun, runapura quejanakojtinkupis, cheqan justiciata ruwan.

⁹ Kamachisqayman jina kawsan, jinataj nisqayta kasun maychus kajta ruwananpaj. Chaymin cheqan runaqa, chayraykutaj pay kawsanqa. Noqa Tukuyta Kamachej Tata Dios chayta nini.

¹⁰ Ichapis chay cheqan runaj churin kallpaman atinikuspa, runa wañuchi kanman, chayrí suwa kanman, manataj allin kajta ruwayta munanmanchu.

¹¹ Ichapis pay ruwanman waj millay imakunata, mayqentachus tatan mana ruwarqachu, chaykunata: Lantejpa sutinpi wayk'usqa mikhunata mikhunman, manachayrí runa masinpa warminwan puñuykunman.

¹² Wajcha runakunata, pisi tiyapuyniyojkunata ima ñak'arichinman, suwakunman, manachayrí manumanta ima jap'isqantapis mana kutichipunmanchu. Lantikunatapis yupaychanman, millaytaj ruwanman.

¹³ Manuspaqa, interesniyojta mañanman, ancha ashkhata ganayta mask'aspa. Ajina millayta ruwasqanrayku chay runaqa manapuni kawsanqachu. Chay runaqa wañunanpuni tiyan, wañunanpajtaj paylla juchayoj kanqa.

¹⁴ Ichapis chay millay runaj churin kallanmantaj, paytaj tatanpa tukuy millay ruwasqanta rikushaspapis, mana tatan jinachu ruwanman.

¹⁵ Orqo patapi lantej sutinpi wayk'usqa mikhunata mana mikhunmanchu, nitaj Israel aylloj manakaj lantinkunapitaj atinikunmanchu. Runa masinpa warminwan mana puñuykunmanchu.

¹⁶ Mana pitapis ñak'arichinmanchu, nillataj manumanta ima jap'isqantapis jap'ikapunmanchu. Yarqhachikojman mikhunanmanta qorinman, mana p'achayojtataj p'achallichinman.

¹⁷ Mana cheqa kajta ruwanamanta t'aqakunman. Qolqeta manuspapis, mana interesniyojta manunman nitaj anchata ganayta mask'anmanchu. Nisqayta kasunman, kamachisqayman jinataj purinman. Chay jina runaqa tatanpa juchanmanta mana wañonqachu, manachayqa kawsanqa.

¹⁸ Tatanrí runa masinta ñak'aricherqa, suwakorqa, runakuna ukhupitaj mana allin imakunata ruwarqa. Chayrayku pay millayta ruwasqanmanta wañonqapuni.

¹⁹ Qankuna tapukunkichejchari: Imaraykutaj churenqa tatanpa millayta ruwasqanmanta mana juchachasqachuri? nispa. Chureqa tatanpa millayta ruwasqanmanta mana juchachasqachu kanqa, imaraykuchus churenqa maychus kajta, cheqanta ruwarqa. Tukuy nisqayta kasuspataj junt'arqa. Chayrayku pay kawsanqapuni.

²⁰ Pichus juchallikojlla wañonqa. Wawaqa tatanpa millay ruwasqanmanta mana juchachasqachu kanqa, nitaj tatapis wawanpa millay ruwasqamanta juchachasqallatajchu kanqa. Cheqan kaj runaqa cheqan ruwasqanmanta t'inkata jap'enqa. Mana allin puriyniyoj runatajrí millay ruwasqanmanta ñak'arillanata jap'enqa.

Tata Dios cheqan kajtapuni ruwan

²¹ Chaywanpis ichapis millay kawsayniyoj runaqa tukuy millay ruwasqanmanta t'aqakuspa, noqaman kutirikunman, kamachisqayta junt'aspataj, cheqan kajta, maychus kajtataj ruwanman. Pichus chayta ruwajqa kawsanqapuni, manataj wañonqachu.

²² Noqataj tukuy millay ruwasqanmanta mana yuyarikusajchu. Payqa cheqan kajta ruwasqanrayku kawsanqa.

²³ Noqaqa manapuni munanichu millay kajta ruwaj runa wañunanta, manachayqa munani millay ruwasqanmanta kutirimpunanta, kawsanantataj. Noqa Tukuyta Kamachej Tata Dios chaytaqa nini.

²⁴ Sichus cheqanta kawsaj runa cheqan kaj ruwanata saqespa, millayta ruwaj runaj tukuy millay ruwasqanta ruwanman chayqa, payqa manapuni kawsanqachu. Noqa tukuy allin kajta ruwasqanmanta mana yuyarikusajchu. Astawanpis noqata wasanchawasqanrayku, millayta ruwasqanraykutaj pay wañonqa.

²⁵ Qankunarí niwankichej: Tukuyta Kamachej Diospa ruwasqanqa mana cheqanchu, nispa. Israel ayllu, uyariway: Noqaqa manachu cheqanta ruwashani? Aswanpis, manachu qankuna mana allinta ruwaj kankichej?

²⁶ Sichus cheqanta purej runa allin kaj ruwayta saqespa millay kajta ruwan chayqa, millayta ruwasqanrayku wañonqa.

²⁷ Sitajchus mana allinta ruwaj runaqa millayta ruwasqanmanta t'aqakuspa, cheqan kajta, maychus allin kajtataj ruwanman chayqa, pay kawsanqa.

²⁸ Allinta qhawarikuspa, sichus tukuy millay ruwasqanmanta t'aqakun chayqa, pay kawsanqapuni, manataj wañonqachu.

²⁹ Chaywanpis Israel aylloqa nin: Tukuyta Kamachej Diospa ruwasqanqa mana cheqanchu, nispa. Israel, noqaj ruwasqayqa manachu cheqan? Aswanpis, qankunamin mana cheqanta ruwajkuna kankichej.

³⁰ Chayrayku, Israel ayllu, noqaqa sapa ujta ruwasqaykichejman jina juchachasqaykichej. Noqa Tukuyta Kamachej Tata Dios chayta nini. Millay ruwasqaykichejta saqespa, noqaman kutirikamuychej, ajinamanta ama millay ruwasqaykichejmanta chinkachisqa kanaykichejpaj.

³¹ Contraypi tukuy millay ruwasqaykichejmanta t'aqakuychej, mosoj sonqowan p'achallikuychej, mosoj kallpawantaj. Israel ayllu, imaraykutaj wañuyta munankichejri?

³² Noqa manapuni ni pi wañunanta munanichu. Chayrayku millay ruwasqaykichejmanta t'aqakuspa, kawsanaykichejpaj noqaman kutirikamuychej. Noqa Tukuyta Kamachej Tata Dios chayta nini.