Ezequiel 14 - DIOSPA QHELQACHISQ

Lantita yupaychajkunapaj jasut'i

¹ Chaymanta qhepaman Israelpa kurajninkunamanta wakinkuna noqata watukoj jamuspa, ñawpaqeypi tiyarikorqanku.

² Chantá Tata Dios niwarqa:

³ Runaj churin, kay runakuna lantita yupaychanaman qokunku. Imakunachus juchallichin, chayllapi yuyashanku. Chaychu tapukunawankuta saqeymanri?

⁴ Paykunata niy: Ajinata nin Tukuyta Kamachej Tata Dios: Israel ayllumanta kajkuna, qankuna lantikunata yupaychanaman qokunkichej. Chantá juchallichej imallapi yuyayniykichejta churaspa, Diosmanta sut'inchajman tapurikoj jamunkichej. Chayrayku noqa payman mashkhachus lantiykichejkuna kasqankuman jina kutichisaj, nispa. Ajinata noqa Tata Dios nini.

⁵ Noqa sonqonkuman parlapayasaj kutirimunankupaj, imaraykuchus tukuyninku noqata saqerpayaspa, lantikunaj qhepankuta riporqanku, nispa.

⁶ Chayrayku Israel aylluman niy: Kay jinata nin Tukuyta Kamachej Tata Dios: Lantiykichejkunata, tukuy millay ruwaykunatawan saqerpayaspa, Tata Diosman kutirikuychej, nispa.

⁷ Chantá nillaytaj: Ichapis uj israelita, chayrí Israelpi tiyakoj waj llajtayoj noqamanta karunchakuspa lantikunata yupaychanaman qokunman, chaytajchus imachus juchallichin chayllapi yuyanman. Chaywanpis sichus sut'inchajman jamunman Diosmanta tapurikoj chayqa, noqa kikiy payman kutichisaj.

⁸ Noqa chay runaj contranpi sayaspa, wanananpaj jina jasut'isaj, tukuy runakuna parlanankupaj jina. Aylluy ukhumantataj payta wijch'usaj. Chaypacha qankuna noqa Tata Dios kasqayta yachankichej.

⁹ Sichus Diosmanta uj sut'inchaj llullata parlanqa chayqa, noqa chay sut'inchajta q'otiyarqani. Jinaqa makiyta oqharisaj payta jasut'inaypaj, Israel ayllumantataj chinkachisaj.

¹⁰ Llullallata sut'inchajta tapurikoj runa, jinallataj sut'inchajpis juchankumanta jasut'isqa kanqanku.

¹¹ Ajinamanta Israel aylloqa manaña jayk'ajpis noqamanta t'aqakonqankuchu, nitaj millay imata ruwaspa ch'ichichakonqankuñachu. Paykuna aylluy kanqanku, noqataj paykunaj Diosninku kasaj, nispa nin Tukuyta Kamachej Tata Dios.

Jerusalén jasut'isqapuni kanqa

¹² Tata Dios nillawarqataj:

¹³ Runaj churin, sichus tukuy runakuna noqaj contraypi juchallinkuman, wasanchawankumantaj chayqa, noqa paykunata jasut'inaypaj contrankuta oqharikusaj. Mikhuna tantakusqankuta qhechusaj, chay llajtamantaj yarqhayta apachimusaj. Chay runakunata wañurachisaj, jinallataj uywankunatapis.

¹⁴ Sichus kay kinsa runakuna: Noé, Daniel, Job ima chay llajtapi kashankuman chayqa, noqa paykunallata wañunankumanta qhespichiyman cheqan runakuna kasqankurayku. Noqa Tukuyta Kamachej Tata Diosmin chayta nini.

¹⁵ Ichapis chay suyupi tiyakojkunata wañurachinanpaj phiña k'ita animalkunata kachaykuyman, chay suyutaj ch'inman tukunman, chantá k'ita animalkunata manchachikuspa, pipis chayninta mana pasayta atinmanchu.

¹⁶ Sichus chay kinsa runakuna chay suyupi tiyakushankuman chaypis, paykuna ni churinkukunata nitaj ususisninkunata qhespichiyta atinkumanchu. Paykunalla qhespichisqa kankuman. Llajtarí ch'inman tukuchisqa kanman. Noqa Tukuyta Kamachej Tata Diosmin kawsayniyrayku tiluspa chayta nini.

¹⁷ Ichapis chay suyuman maqanakuyta kachaykuyman, jinataj kamachiyman runakuna, jinallataj uywakunapis wañurachisqa kanankuta.

¹⁸ Sichus chay kinsa runakuna chaypi tiyakushankuman chaypis, paykuna ni churinkukunata, nitaj ususinkukunata qhespichiyta atinkumanchu. Paykunalla qhespichisqa kankuman. Noqa Tukuyta Kamachej Tata Diosmin kawsayniyrayku tiluspa chayta nini.

¹⁹ Ichapis chay suyuman millay onqoykunata kachaykuyman, phiñakuyniypitaj wañuyta kachaykuspa, wañurachiyman runakunata, uywakunatawan ima.

²⁰ Sichus Noé, Daniel, Job ima chaypi tiyakushankuman chaypis, paykuna mana churinkukunata, ususinkukunata ima qhespichiyta atinkumanchu. Paykunalla cheqan runakuna kasqankurayku qhespichisqa kankuman. Noqa Tukuyta Kamachej Tata Diosmin kawsayniyrayku tiluspa nini, nispa.

²¹ Ajinaqa Tukuyta Kamachej Tata Dios nillantaj: Aswan llakiyraj kanqa, imaraykuchus noqa kay tawantin sinch'i jasut'iyta Jerusalenman apachimusaj: Maqanakuta, yarqhayta, phiña k'ita animalkunata, millay onqoykunata ima. Chantá chaykuna runakunata, uywakunata ima wañurachenqanku.

²² Chaywanpis pisilla kawsashaj qhepakonqanku. Churinkukunawan, ususinkukunawan qhespichisqa kanqanku, paykunataj Jerusalenmanta qankunaman jamonqanku. Babiloniaman jamojtinkutaj, qankuna rikunkichej imaynachus kasqankuta, ima sajratatajchus ruwasqanta ima. Chantá Jerusalenman jasut'ita apachimusqaymanta sonqochasqa kankichej.

²³ Paykunaj kawsayninkuta, ruwasqankutawan rikuspa, sonqoykichejta tiyaykuchinkichej. Chaypacha Jerusalenpi imajtinchus tukuy imata ruwasqayta yachankichej. Noqa, Tukuyta Kamachej Tata Dios chayta nini.