Ezequiel 12 - DIOSPA QHELQACHISQ

Ezequiel waj suyuman apasqa kanankumanta willan

¹ Ujtawan Tata Dios parlamuwaspa, niwarqa:

² Runaj churin, mana kasukoj runakuna chawpipi tiyakushanki. Paykunaqa ñawiyoj kaspapis, mana rikunkuchu. Ninriyoj kaspapis, mana uyarinkuchu, imaraykuchus contrayta oqharikoj runakuna kanku.

³ Chayrayku, runaj churin, qanqa waj suyuman apasqa kanaykipaj jina wakichikuy. Tukuypa rikunanta chawpi p'unchayta wasiykimanta llojsispa, wajnejman ripunki. Ichapis ajinamanta mana kasukoj runa kasqankuta reparakonqanku.

⁴ Chawpi p'unchayta tukuy rikushasojtinku, waj suyuman apasqa runapis kawaj jina tukuy imaykita orqhoy. Tardenpitaj tukuypa rikunanta waj suyuman apasqa runa jina llojsiy.

⁵ Chantá tukuyninkoj rikunanta perqapi uj jusk'uta ruway, chaynintataj tukuy imaykita q'epirisqa llojsinki.

⁶ Laqhayaykojtintaj, tukuyninkoj rikunanta q'epiykita oqhariykukuspa puririy. Ama llajtata rikunaykipajtaj uyaykita qhatakuy. Ajinata ruwasqaykirayku Israel ayllupaj uj señal kanki, nispa.

⁷ Jinataj Tata Diospa kamachiwasqanman jina, noqa q'epichakorqani. P'unchaytaj q'epiyta q'epiriykukuspa, llojserqani, waj suyuman apasqa runapis kashayman jina. Tardentaj perqata jusk'orqani. Laqhayaykojtintaj, tukuy imayta q'epiriykukuspa, llojserqani tukuyninkutaj qhawashawarqanku.

⁸ Q'ayantin paqarintaj Tata Dios parlamuwaspa, ujtawan niwarqa:

⁹ Runaj churin, contrayta oqharikoj Israel ayllu manachu tapurisunku: Imatá ruwashankiri? nispa.

¹⁰ Chantá paykunata ninki: Tukuyta Kamachej Tata Dios kayta nin: Kay sut'inchayqa Jerusalenpi kuraj kamachejpaj, chantá kay suyupi tiyakushanku, chay tukuy israelitakunapajwan, nispa.

¹¹ Chantá nillankitaj: Noqa qankunapaj señal jina kani. Imaynatachus noqa ruwarqani, kikillantataj qankunapis aswan qhepaman ruwankichej, imaraykuchus waj suyuman apasqa kankichej.

¹² Kuraj kamachejniykichej Sedequías, imatachus apakunan kajta q'epiriykukonqa, laqhayaykojtintaj, perqata jusk'uspa chaynejta llojsenqa. Uyanta qhataykukuspa llojsenqa, llajtata ama rikunanpaj nitaj pipis payta rejsinanpaj.

¹³ Noqa Diostajrí ch'ipayta paypa patanman choqaykamusaj chaywan payta urmachinaypaj. Chantá Babiloniaman payta apachisaj caldeokunaj suyunkuman. Chaywanpis pay chay suyuta mana rikonqachu, imaraykuchus manaraj chayashaspa, wañonqa.

¹⁴ Chantá payta qhawaj soldadokunata, jinallataj chay waj soldadonkunatapis tawantin ladoman wayrawan jina aparparichisaj. Jinaspataj, espadawan qhepankuta qhatiykusaj.

¹⁵ Maypachachus waj suyuman, waj llajtakunaman ima apachejtiyraj, paykuna yachanqanku noqa Tata Dios kasqayta.

¹⁶ Chaywanpis paykunamanta uj pisita wañuymanta, yarqhaymanta, onqoymantawan ayqechisaj, ajinapi maymanchá renqanku, chay suyukunapi imaymana millay ruwasqankumanta willakunankupaj. Chantaraj noqa Tata Dios kasqayta yachanqanku, nispa.

Jasut'isqa kanankuta nisqa junt'akonqapuni

¹⁷ Ujtawan Tata Dios parlamuwaspa, niwarqa:

¹⁸ Runaj churin, manchariywan kharkatitispa mikhuy. Yakuta ujyashaspapis, manchay llakisqa kasqaykita rikuchiy.

¹⁹ Jinaspataj, kay suyupi tiyakojkunata niy: Tukuyta Kamachej Tata Diosqa Jerusalenpi tiyakojkunaman, israelitakunamanpis kay jinata nin: T'antankuta may manchachikuywan mikhonqanku, yakutataj llakiywan mancha manchalla ujyanqanku. Ajina kanqa, imaraykuchus kallpaman atinikuspa millayta ruwasqankurayku, jallp'anku t'ajraman tukuchisqa kanqa, mana ima poqojtaj.

²⁰ Tukuy llajtakunaqa raqayman tukuchisqa kanqanku, jallp'ataj mana imayoj t'ajra pampa qhepakonqa. Chaypacharaj qankuna noqa Tata Dios kasqayta yachankichej, nispa.

²¹ Jinallataj Tata Dios nillawarqataj:

²² Israelitakuna niyta yachanku: P'unchaykuna pasashan, Diosmanta sut'inchajpa nisqantaj mana junt'akushanchu, nispa. Chayta nispa, imatataj niyta munankuri?

²³ Qantajrí paykunata niy: Tukuyta Kamachej Tata Dios nin: Chaytaqa Israelpi manaña ujtawan parlankichejchu, nispa. Paykunaman nillaytaj: Chayta ninaykichejtaqa kunanmantapacha ninkichej: P'unchay chayamunña mosqoypi jina tukuy sut'inchaykuna junt'akunankupaj, nispa.

²⁴ Israel ayllu ukhupi mosqoypi jina llullata rikuykuna manaña kanqachu nitaj llullata sut'inchaykunapis.

²⁵ Manachayqa noqa Tata Diosmin parlasaj, nisqaytaj usqhayllata junt'akonqa. Mana kasukoj runakuna ñawiykichejwan chayta rikunkichej. Noqa parlasaj, chay nisqaytataj junt'asajpuni. Noqa Tukuyta Kamachej Tata Diosmin chayta nini.

²⁶ Chantá Tata Dios parlamuwaspa, nillawarqataj:

²⁷ Runaj churin, israelitakuna nishanku: Ezequielpa mosqoypi jina rikusqanqa unaymantaraj junt'akonqa, nispa.

²⁸ Chayrayku paykunata niy: Tukuyta Kamachej Tata Dios kay jinata nin: Nisqayqa mana unaymantachu junt'akonqa. Astawanpis imatachus nisqayqa usqhayllata junt'akonqa. Noqa Tukuyta Kamachej Tata Diosmin chayta nini.