Ezequiel 11 - DIOSPA QHELQACHISQ

Kurajkuna juchachasqa kanqanku

¹ Chaymanta Diospa Espirítun pataman oqhariwaspa, Tata Diospa Templonman apawarqa, inti llojsimuy punkunejman. Chay punkupi iskay chunka phishqayoj runakuna kasharqanku. Paykunawan khuskataj Azurpa churin Jazaniasta rikorqani, chantá Benaiaspa churin Pelatiastawan. Paykunaqa llajtapi kurajkuna karqanku.

² Chantá Tata Dios niwarqa: Runaj churin, kay kurajkuna mana allin kajta ruwayta yuyashanku, Jerusalén llajtapi tiyakojkunatataj millayta ruwanankupaj umachashanku.

³ Paykuna ninku: Kay llajta manaña urmanqachu, chayrayku wasikunata ruwakunalla. Kay llajtaqa manka jina kanqa, noqanchejtaj chay mankapi aycha jina waqaychasqa kasunchej, nispa.

⁴ Chayrayku runaj churin, sutiypi paykunaj contranpi sut'inchay, nispa.

⁵ Chantá Tata Diospa Espíritun noqaman jamuspa, niwarqa: Tata Diosqa israelitakunaman nin: Kay jinata qankuna yuyashankichej, noqatajrí yuyaychakusqaykichejta yachani.

⁶ Kay llajtapi qankuna manchay ashkha runata wañuracherqankichej, ñankunatapis runaj ayanwan junt'acherqankichej.

⁷ Chayrayku noqa, Tukuyta Kamachej Tata Dios sut'ita niykichej: Jerusalenqa manka jina kanqa, aychantajrí mana qankunachu kankichej. Manachayqa aycha kanqa, pikunatachus qankuna wañuracherqankichej, chaykuna. Aswanpis qankunata noqa chay mankamanta orqhosqaykichej.

⁸ Maqanakupi wañuytachu manchachikunkichej? Noqamin ruwasaj qankuna maqanakupi wañuchisqa kanaykichejta. Noqa Tukuyta Kamachej Tata Diosmin chayta nini.

⁹ Kay llajtamanta qankunata orqhospa, waj llajtayojkunaman jaywaykusqaykichej. Paykunanejtamin jasut'isqaykichej.

¹⁰ Espadawan wañuchisqa kankichej. Israelpa mojonnin kantunpi juchachasqaykichej, chaypachataj noqa Tata Dios kasqayta yachankichej.

¹¹ Kay llajtaqa qankunapaj mana manka jinachu kanqa, nitaj qankuna aycha jina chaypi waqaychasqachu kankichej. Astawanpis noqa Israelpa mojonninpi juchachasqaykichej.

¹² Chaypachataj noqa Tata Dios kasqayta yachankichej. Ajinata noqaqa ruwasqaykichej, imaraykuchus qankunaqa mana kamachisqayman jinachu kawsarqankichej nitaj nisqaytapis kasorqankichejchu. Manachayqa muyuyniykichejpi kaj suyukunaj usunkuta ruwarqankichej, nispa.

¹³ Tata Diospa sutinpi paykunaman chayta parlashajtillayraj, Benaiaspa churin Pelatías wañorqa. Noqataj pampakama k'umuykorqani, jatunmanta qhaparispataj, nerqani: Ay, Tukuyta Kamachej Tata Dios, pisi puchoj israelitakunatapis tukuynintachu wañurachinki? nispa.

Dios mosoj tratota ruwananmanta willan

¹⁴ Chantá Tata Dios parlamuwaspa, nillawarqataj:

¹⁵ Runaj churin, Jerusalenpi qhepakoj runakuna qanmanta, aylluykimanta, apasqa kajkunamanta ima kay jinata ninku: Paykuna Tata Diosmanta karunchakunku. Chayrayku Tata Dios noqaykuman kay suyuta qowayku chaymanta dueño kanaykupaj, nispa.

¹⁶ Chayrayku apasqa kajkunaman sutiypi niy: Noqa Tukuyta Kamachej Tata Diosmin qankunata waj suyukunaman, karu llajtakunamanwan ch'eqeracherqaykichej. Chaywanpis noqa, maymanchus ch'eqerachisqaykichej, chay suyukunapi waqaychaspa yanapasqaykichej, nispa.

¹⁷ Noqaj sutiypi paykunaman nillaytaj: Kay jinata Tata Dios nin: Noqa Tukuyta Kamachej Tata Diosmin paykunata tantaykamusaj waj suyukunamanta, karu llajtakunamanta ima, maykunamanchá paykunata ch'eqeracherqani, chaykunamanta. Israelitakuna, qankunata tantaykamuspa, suyuykichejta kutichipusqaykichej.

¹⁸ Israelitakuna llajtankuman kutimpuspa, kay jallp'api millay ruwanata chantá lanti yupaychanata ima chinkachenqanku.

¹⁹ Noqa paykunamanta rumi sonqo kayninkuta orqhospa, mosoj yuyayta, mosoj sonqotawan qosaj.

²⁰ Chantá paykuna kamachisqayman jina kawsanqanku, nisqayman jinataj purenqanku, junt'anqankutaj. Paykunaqa aylluy kanqanku, noqataj paykunaj Diosninku kasaj.

²¹ Chantapis pikunachus millayta ruwaspallapuni purenqanku, chantá millay lantikunata yupaychanqanku chayqa, chay runakunata ruwasqankuman jina jasut'isaj. Noqa Tukuyta Kamachej Tata Diosmin chayta nini.

Diospa jatun kayninpa lliphipiynin Jerusalenmanta karunchakun

²² Chaymanta qhepaman querubinkuna phawarerqanku, ruedakunataj paykunawan khuska pataman oqharikorqanku. Israelpa Diosninpa jatun kayninpa lliphipiynintaj paykunaj patankupi kasharqa.

²³ Chantá Tata Diospa jatun kayninpa lliphipiynin llajta chawpimanta oqharikuspa, karuman riporqa, inti llojsimuy cheqapi kaj loma patapitaj sayaykorqa.

²⁴ Chaymanta Diospa Espíritun oqhariwaspa, Babiloniaman kutirichiwarqa, maypichus Israelmanta apasqa kajkuna tiyakusharqayku, chayman. Chantá mosqoypi jina rikusqayqa chinkaporqa.

²⁵ Noqataj, pikunachus Israel suyumanta apasqa karqanku, chaykunamantaj Tata Diospa tukuy rikuchiwasqanta willarqani.