Ezequiel 10 - DIOSPA QHELQACHISQ

Tata Diospa jatun kayninpa lliphipiynin Templomanta ripun

¹ Chay qhepata qhawarispa, noqa rikorqani zafiro sutiyoj k'acha rumimanta ruwasqa kamachina tiyanata. Chay karqa querubinkunaj patankupi janaj jina paykunata qhatasharqa, chay patapi.

² Chantá Tata Diosqa linomanta p'achayoj runata nerqa: Querubinkunaj uranpi kaj ruedakunaj chawpinman yaykuy. Chay querubinkunaj chawpinkumanta nina k'ajata makiyki junt'ata oqharispataj, llajta pataman qhalliy, nispa. Jinataj qhawashajtiy, chay runaqa querubinkunaj chawpinkuman yaykorqa.

³ Chaypacha querubinkunaqa Temploj uray ladonpi kasharqanku, phuyutaj ukhu kaj patioman junt'aykorqa.

⁴ Chantá Tata Diospa jatun kayninpa lliphipiynin querubinkunaj patankumanta oqharikuspa, Diospa Templonman yaykuna chaynejman rerqa. Chantá phuyoqa Diospa Templonman junt'aykorqa, Tata Diospa jatun kayninpa lliphipiynintaj patio junt'ata k'anchaykorqa.

⁵ Querubinkunaj lijrankoj laphaqeyasqantaj jawa patiokama uyarikorqa, Tukuy Atiyniyoj Diospis parlashanman jina.

⁶ Chantá Tata Diosqa linomanta p'achayoj runata kamacherqa: Ruedakunaj chawpinman yaykuspa, querubinkunaj chawpinkumanta ninata oqharimuy, nispa. Chay runataj rispa, ujnin ruedaj qayllanpi sayarqa.

⁷ Ujnin querubintaj makinta jaywarispa, paykunaj chawpinkupi kaj ninamanta uj chhikanta oqhariytawan, linomanta p'achayoj runaj makinman churaykorqa. Chay runataj ninata jap'iytawan, llojsiporqa.

⁸ Chaypacha querubinkunaj lijranku uramanta runaj makin jina rikhurimushajta noqa repararqani.

⁹ Jinallataj querubinkuna chaynejpi noqa tawa ruedakunata rikorqani, sapa ruedataj uj querubinwan khuska kasharqa. Chay ruedakunaqa topacio sutiyoj rumi jina lliphipisharqanku.

¹⁰ Tawantin ruedakunaqa kikin kikillan karqanku, uj rueda uj ruedaj chawpinpipis kashanman jina rijch'akorqa.

¹¹ Querubinkuna puririspaqa, mana tijrakamuspa tawantin ladoman puriyta aterqanku, imajtinchus ñawpajpi kaj querubín maymanchus rej, chayta qhatej kanku.

¹² Ukhunku, wasanku, makinku, lijranku ima ñawikunawan junt'a karqanku, jinallataj tawantin ruedakunapis.

¹³ Chantá ruedakunata carreta nispa sutichashajta uyarillarqanitaj.

¹⁴ Sapa querubín tawa uyayoj karqa: Ñawpaj kajpa uyanqa toroj uyan karqa, iskay kajtaj runaj uyan karqa. Kinsa kaj uyaqa leonpa uyan karqa, tawa kajtaj ankaj uyan karqa.

¹⁵ Chay querubinkunaqa Quebar mayupi kantupi rikusqay, chaykunallataj karqanku. Chantá chay querubinkuna pataman oqharikuspa

¹⁶ purirejtinku, ruedakunapis paykunawan khuska puririllarqataj. Querubinkuna pampamanta phawarejtinkutaj, ruedakunaqa paykunamanta mana kacharikojchu kanku.

¹⁷ Querubinkuna kikinpi sayajtinku, ruedakunapis sayallajtaj kanku. Pataman oqharejtinkutaj, ruedakunapis oqharikullajtaj kanku, imaraykuchus querubinkunaj kawsayninku ruedakunapi karqa.

¹⁸ Chantá Tata Diospa jatun kayninpa lliphipiynin Templomanta pataman oqharikuspa, querubinkunaj patankupi sayarqa.

¹⁹ Qhawashallajtiy, querubinkunaqa lijrankuta kicharispa, pampamanta pataman phawarerqanku. Ruedakunapis paykunawan khuskallataj oqharikorqanku. Sayarqankutaj Tata Diospa Temploj inti llojsimuynin lado punkunpi. Israelpa Diosninpa jatun kayninpa lliphipiynintaj paykunaj patankupi kasharqa.

²⁰ Chay kawsayniyojkunallatataj Israelpa Diosninpa uranpi rikorqani, Quebar mayu kantupi, chantá querubinkuna kasqankuta repararqani.

²¹ Sapa ujninku tawa uyayoj, tawa lijrayojtaj karqanku. Lijranku uramantataj runaj makin jina rikhurimusharqanku.

²² Uyankutaj Quebar mayu chaypi rikorqani, chaykuna jinallataj karqa. Sapa ujtaj cheqanta ñawpajman rej kanku.