Ezequiel 1 - DIOSPA QHELQACHISQ

Ezequiel Diosta tiyananpi tiyashajta rikun

¹ Kinsa chunka kaj watapi, tawa kaj killamanta phishqa kaj p'unchayninpi noqaqa Quebar nisqa mayu kantupi kasharqani, Judamanta Babiloniaman apasqa runakunaj chawpinkupi. Chantá jinallaman janaj pacha kicharikorqa, Tata Diostataj mosqoypi jina rikorqani.

² Chay karqa kuraj kamachej Joaquín phishqa wata tawa killayojña Babiloniaman apasqa kashajtin.

³ Caldeokunaj suyunkupi, Quebar mayu kantupi noqa, Buzij churin sacerdote Ezequielman Tata Dios parlamuwarqa. Chaypitaj Tata Dios makinwan llankhaykuwarqa.

⁴ Chaypacha wichaynejmanta uj jatun muyoj wayra jamushajta rikorqani. Chantá uj jatun phuyumanta nina lawray jina llojserqa, muyuyninpitaj sinch'i k'anchay karqa. Chay nina chawpipitaj uj llosq'ochasqa broncepis kanman jina lliphipisharqa.

⁵ Kikin chay chawpipitaj runaman rijch'akoj tawa kawsajkuna kasharqanku.

⁶ Sapa ujninku tawa uyayoj, tawa lijrayojtaj karqanku.

⁷ Chakinkoqa cheqan karqanku. Chaki sillunkoqa torillokunajta jina karqanku, llosq'ochasqa bronce jinataj lliphipisharqanku.

⁸ Chay kawsayniyojkuna tawa uyayoj, tawa lijrayoj ima karqanku, lijranku urapitaj runa jina makiyoj karqanku.

⁹ Lijrankutaj purajmanta tinkunasqa karqanku. Purispaqa, mana kutirejchu kanku, manachayqa cheqanta ñawpajllaman rej kanku.

¹⁰ Chay tawa kawsajkunaj uyankoqa sapa ujninkojta kay jina karqa: Ñawpaqenpi kaj uya runa uya karqa, paña ladopi kajqa león uya, lloq'enpi kajtaj toro uya, qhepanpi kajtaj anka uya karqa.

¹¹ Iskay lijrankoqa pataman oqharisqa karqanku, chaykunataj puntapura tinkunasqa karqanku, iskaywantaj ukhunkuta qhataykorqanku.

¹² Paykuna cheqanta ñawpajman purej kanku mana qhepaman kutirispa, Diospa Espíritun maymanchá pusaj, chayman.

¹³ Chay kawsajkunaj rijch'akuynin nina k'ajarishajman rijch'akorqa, chayrí lamparakunaj k'anchayninman. Chantá ninaman rijch'akojqa risharqa, jamusharqataj paykunaj chawpinkupi. Nina chawpimanta, nina k'anchashajtin, lliuj lliujkuna llojsisharqa.

¹⁴ Chay kawsajkunataj lliuj lliujpis kankuman jina, kayman jaqayman usqhay usqhayta t'ijurisharqanku.

¹⁵ Qhawashallaspapunitaj, chay kawsajkunaj sapa ladonpi pampapi uj rueda kashasqanta repararqani.

¹⁶ Tawantin ruedaqa kikin kikillan karqanku, topacio sutiyoj lliphipirishaj rumi jinataj lliphipisharqanku. Sapa uj ruedaj chawpinpi waj ruedapis kanman jina rijch'akullarqataj.

¹⁷ Purinankupaj mana tijrakuspa tawantin ladoman kutirej kanku.

¹⁸ Chay tawa ruedakunaj aronkoqa jatuchaj mancharina jina karqanku, sapa arotaj tukuy muyuyninpi ashkha ñawiwan junt'a karqa.

¹⁹ Chay kawsajkuna purejtinkoqa, ruedankunapis paykunawan khuska puririllarqankutaj. Paykuna pampamanta pataman oqharikojtinkutaj, ruedankunapis oqharikullarqankutaj.

²⁰ Chay kawsajkunata maymanchus Diospa Espíritun puririchej, chaynejllamantaj ruedankunapis paykunawan khuska oqharikoj kanku, imaraykuchus chay kawsayniyojkunaj kawsayninkoqa ruedakunawan ujlla karqanku.

²¹ Kawsajkuna purejtinkoqa, ruedankunapis puririllajtaj kanku. Paykuna sayapojtinku, ruedankunapis sayallajtaj kanku. Chay kawsajkuna pampamanta pataman oqharikojtinkutaj, ruedankunapis paykunaj qhepankuta pataman oqharikullarqankutaj, imaraykuchus kawsajkunaj kawsayninkoqa ruedankunawan ujlla karqanku.

²² Chay kawsajkunaj umanku patapi lliphipej cristalwan jina qhatasqa karqa.

²³ Chay qhatasqaj uranpitaj kawsajkunaj lijrankoqa cheqan aysarisqa karqanku. Ujkuna ujkunawan tinkunasqa chay iskaynin lijrankuwantaj sapa ujpis ukhunkuta qhatakorqanku.

²⁴ Purejtinku, lijrankoqa sinch'ita sonarqa. Chay sonaytaj karqa mayupi manchay ashkha yaku jina, chayrí Tukuy Atiyniyoj Diospa qhaparisqan jina, manachayrí ashkha soldadoj ch'ajwasqanku jina. Sayajtinkutaj, lijrankupis urayk'ullarqankutaj.

²⁵ Sayaspa lijrankuta urayk'uchejtinku, qhatasqa patamanta uj sonay uyarikorqa.

²⁶ Chay qhatasqaj patanpitaj uj kamachina tiyanata jina rikorqani. Chay tiyanataj zafiro sutiyoj lliphipirishaj rumimanta ruwasqaman rijch'akorqa. Chay kamachina tiyanapitaj uj runaman rijch'akojta tiyasqata rikorqani.

²⁷ Chay runaman rijch'akojpata ñañu wasanmanta pataman llosq'ochasqa bronceta jina lliphipishajta rikorqani, ninawan muyuykusqatataj. Ñañu wasanmanta uramantaj ninata jina rikorqani. Tukuy muyuyninpitaj k'anchaywan muyuykusqa karqa.

²⁸ Imaynatachus k'uychi phuyu chawpipi p'unchay paramojtin rikhurin, ajina lliphipirishaj muyuyninpi karqa. Tata Diospa jatun kayninpa lliphipiyninta mosqoypi jina rikusqayqa chay jina karqa. Chay jinata rikuspataj, pampakama k'umuykorqani, chaypitaj uj parlamojta uyarerqani.