Éxodo 8 - DIOSPA QHELQACHISQ

Egiptoman k'aylankula junt'aykun

¹ 1 (7.26) Chantá Tata Dios Moisesta nerqa: Faraonman rispa, nimuy: Tata Dios ajinata nisunki: Aylluyta kachariy, ch'innejman rispa, yupaychamunawankupaj.

² 2 (7.27) Manachus kachariyta munanki chayqa, noqa tukuy Egipto suyuman ashkha k'aylankulakunata kachaykuspa, ñak'arichisaj.

³ 3 (7.28) Mayupi k'aylankulakunaqa kaymanta jinalla manchayta miraykuspa, tukuynejman junt'aykonqanku: Wasiykiman, puñunaykiman, kamachiykikunaj wasinkuman, tukuy runaykikunaj wasinkuman, hornoykiman, masa puñanaykiman ima.

⁴ 4 (7.29) K'aylankulakunaqa qanpa pataykiman, tukuy Egipto llajtayojkunaj patankuman, jinataj kamachiykikunaj patankumanpis phinkiykamonqanku, nispa.

⁵ 5 (1) Chaymanta Tata Dios Moisestañataj nerqa: Aaronta niy mayukunaman, wayq'okunaman, chantá yaku qochakunaman ima varanta oqharinanta, chaykunamanta ashkha k'aylankulakuna llojsimuspa, tukuynin Egipto suyuman junt'aykunankupaj, nispa.

⁶ 6 (2) Chantá Aaronqa Egiptopi tukuy yakuman varanta oqharerqa. Jinajtinkamataj, k'aylankulakunaqa yakumanta llojsiykamuspa, tukuynin Egipto suyuman junt'aykorqanku.

⁷ 7 (3) Chaywanpis yatirikunapis yachasqankuwan kikillantataj ruwaspa, Egipto suyuman k'aylankulakunata astawan rikhuricherqanku.

⁸ 8 (4) Chantá faraón Moisesta, Aarontawan ima wajyachispa, nerqa: Tata Diosmanta mañaychej ari, noqamanta, runaykunamantawan k'aylankulakunata chinkachinanpaj. Noqataj israelitakuna rinankuta saqesaj, rispa uywa ñak'asqa q'olachikunata Tata Diosman jaywamunankupaj, nispa.

⁹ 9 (5) Moisestaj kuticherqa: Niway: Qanrayku, tukuy yanapajniykikunarayku, chantá tukuy runaykikunarayku ima, mayk'ajtaj Tata Diosmanta mañapusunayta munawajri? Ajinata k'aylankulakunaqa qanmanta, wasiykimantapis karunchasqa kanqanku, mayullapiñataj qhepakonqanku, nispa.

¹⁰ 10 (6) Faraontaj nerqa: Q'ayapacha, nispa. Chantá Moisés nerqa: Ajina kanqa, yachanaykipaj Tata Dios jinaqa mana pipis kasqanta.

¹¹ (6-7) K'aylankulakunata qanmanta, wasiykimanta, yanapajniykikunaj wasinkumanta, jinataj runaykikunaj wasinkumanta riponqanku. Chantá mayullapiña kanqanku, nispa.

¹² 12 (8) Jinataj Moiseswan, Aaronwan ima faraonpa ñawpaqenmanta llojserqanku. Moisestaj Tata Diosmanta mañarqa, faraonmanta k'aylankulakunata kachaykusqanta karunchananpaj.

¹³ 13 (9) Tata Diostaj Moisespa mañakusqanman jina ruwarqa. K'aylankulakuna wasikunapi, patiokunapi, jinataj tukuynejpi wañurarqanku.

¹⁴ 14 (10) Egipto llajtayojkunaqa wañusqa k'aylankulakunata qotu qotuta tantarqanku. Wañusqa k'aylankulaj asnasqantaj tukuynejpi karqa.

¹⁵ 15 (11) Jinapis, Tata Diospa nisqanman jina, faraón manaña imapis kasqanta rikuspa, sonqonta astawan rumiyacherqa. Chayraykutaj Moisesta, Aarontawan ima mana kasorqachu.

Egiptoman usa junt'aykun

¹⁶ 16 (12) Tata Dios ujtawan Moisesta nerqa: Aaronta niy, varanta oqharispa, jallp'ata wajtananta. Varanwan wajtajtinkamataj, jallp'a usaman tukuspa, tukuynin Egiptoman junt'aykonqa, nispa.

¹⁷ 17 (13) Paykunataj ajinata ruwarqanku. Aaronqa varanta oqharispa, pampata wajtarqa. Jallp'ata wajtasqantaj usaman tukorqa. Chay usakunataj runata, uywata ima khanirarqa. Tukuynin Egiptopi jallp'aqa usaman tukorqa.

¹⁸ 18 (14) Jinallataj Egiptomanta yatirikunapis yachasqankuwan usata rikhurichiyta munallarqankutaj, manataj aterqankuchu. Usaqa tukuy runaman, jinallataj uywakunamanpis junt'aykorqa.

¹⁹ 19 (15) Chayrayku yatirikunaqa faraonta nerqanku: Kayqa Diospa ruwasqan, nispa. Faraontajrí, Tata Diospa nisqanman jina, astawan sonqonta rumiyacherqa, manataj Moisesta Aarontawan ima kasorqachu.

Egiptoman ch'uspi junt'aykun

²⁰ 20 (16) Tata Diosqa Moisesta nillarqataj: Q'aya paqarin faraonqa tutamanta mayuman renqa. Qanpis tutamanta jatarispa, riy paywan parlaj. Chantá ajinata ninki: Tata Dios ajinata nisunki: Aylluyta kachariy, ch'innejman rispa yupaychamunawankupaj.

²¹ 21 (17) Manachus kacharinki chayqa, noqa qanman, yanapajniykikunaman, runaykikunaman, wasiykiman ima tukuy imaymana ch'uspita kachaykamusaj. Ch'uspeqa tukuy Egipto llajtayojkunaj wasinkuman junt'aykuspa, pampannintinpi kanqa.

²² 22 (18) Chaywanpis, Gosén cheqanejpi ch'uspi mana kanqachu, imaraykuchus chaynejpi israelitakuna tiyakushanku. Ajinata ruwasqayrayku, noqa Tata Dios kay suyupi kashasqayta yachanki.

²³ 23 (19) Ajinata noqaqa aylluyta, aylluykimanta t'aqasaj. Chay señaltaj q'ayapacha kanqa, nispa.

²⁴ 24 (20) Ajinata Tata Dios ruwarqa. Tukuy imaymana ch'uspi laqhayarishaj phuyu jina aywirimuspa, faraonpa kamachinan wasiman, yanapajninkunaj wasinkuman, chantá tukuy Egipto suyuman junt'aykorqanku. Chay ch'uspikunataj Egipto suyuta sonqo nanayman tukucherqanku.

²⁵ 25 (21) Chaymanta faraonqa Moisesta, Aarontawan ima wajyachispa, nerqa: Riychej, Diosniykichejman uywa ñak'asqata q'olachispa jaywamuychej. Jinapis ama kay suyumanta ripuychejchu, nispa.

²⁶ 26 (22) Moisestajrí kuticherqa: Jinata ruwanaykoqa mana atikunchu, imaraykuchus Tata Diosman imatachus jaywasqaykoqa Egipto llajtayojkunapaj millachikuna kanku. Sichus millachikunapaj qhawasqanku uywakunata Diosman jaywashajta rikuwaykuman chayqa, rumiwanchari ch'anqaykuwaykuman ari.

²⁷ 27 (23) Noqaykoqa Diosniyku kamachiwasqaykuman jina kinsa p'unchay puriyta ch'innejman rinayku tiyan, chaypitaj uywata ñak'aspa, Tata Diosniykuman jaywanayku tiyan, nispa.

²⁸ 28 (24) Faraontaj nerqa: Ch'innejman rispa, Tata Diosniykichejman uywata ñak'aspa jaywamunaykichejpaj kachasqaykichej. Chaywanpis mana ancha karumanchu rinaykichej tiyan. Chantá chaypi kashaspa, noqaraykupis mañapullawaychejtaj ari, nispa.

²⁹ 29 (25) Moisestaj kuticherqa: Kaymanta llojsispa, noqaqa Tata Diosmanta mañapusqayki, kay ch'uspikunata qanmanta, yanapajniykikunamanta, jinallataj llajta masiykikunamanta ima q'ayapacha karunchananta. Qanrí, amaña q'otiyawaykuchu. Aswanpis israelitakunata kachariy Tata Diosman uywata ñak'aspa jaywamunaykupaj, nispa.

³⁰ 30 (26) Chantá Moisés faraonpa ñawpaqenmanta llojsispa, Tata Diosmanta mañaporqa.

³¹ 31 (27) Tata Diostaj Moisés mañakusqanman jina ruwarqa. Tukuynin ch'uspikunata faraonmanta, yanapajninkumanta, runakunaj wasinkumanta ima chinkacherqa. Mana uj ch'uspillapis qhepakorqachu.

³² 32 (28) Chaywanpis faraón uj kutitawan sonqonta rumiyachispa, israelitakunata mana kachariporqachu.