Éxodo 6 - DIOSPA QHELQACHISQ

¹ Chantá Tata Dios Moisespa mañakusqanta uyarispa, nerqa: Faraonwan imatachus ruwasqayta kunan rikunki. Sinch'ita payta mat'iykojtiyraj, pay kacharisonqachej. Arí, pay kikin ripunaykichejta nisonqachej, nispa.

Tata Diosqa Moisesta ujtawan kachan

² Chaymanta Tata Diosqa Moisesta ujtawan nillarqataj: Noqamin Tata Dios kani.

³ Noqaqa Tukuy Atiyniyoj Dios sutiywan Abrahamwan, Isaacwan, Jacobwan ima rejsichikorqani. Tata Dios sutiywanrí mana paykunaman rejsichikorqanichu.

⁴ Chantapis, paykunawan uj tratota ruwarqani, Canaán suyuta qonaypaj. Paykunarí chay suyupi waj llajtayoj jina tiyakorqanku.

⁵ Kunantaj Egipto llajtayojkuna israelitakunata ñak'arichisqankurayku, israelitakunaj ayqosqankuta uyarispa, noqaqa aylluywan trato ruwasqaymanta yuyarikuni.

⁶ Chayrayku qan israelitakunata ninki: Diosqa kay jinata nisunkichej: Noqamin Tata Dios kani. Noqataj Egiptopi sinch'i ruwanamanta orqhosqaykichej, wata runa kasqaykichejmantapis pagota qospa kacharichisqaykichej. Ajinamanta jatun atiyniywan Egipto llajtayojkunata sinch'ita ñak'arichispa, kay suyumanta pusakapusqaykichej.

⁷ Noqa qankunata aylluypaj jap'ikapusqaykichej, noqataj Diosniykichej kasaj. Ajinamanta yachankichej noqa Tata Diosniykichej Egiptopi wata runa kanaykichejmanta kacharichisqayta.

⁸ Chantá mayqen jallp'atachus Abrahamman, Isaacman, Jacobman ima tiluspa qonayta nerqani, chay jallp'aman noqa pusasqaykichej. Chay jallp'atataj qankunaman qopusqaykichej. Noqamin Tata Dios kani, nispa.

⁹ Chantá Moisés israelitakunaman chay tukuyta willarqa. Paykunatajrí mana kasuta ruwarqankuchu, imaraykuchus wata runa jina sinch'i ruwanapi kaspa, sonqonku p'akisqa kasharqanku.

¹⁰ Jinapi Tata Dios Moisesta ujtawan nerqa:

¹¹ Rispa, Egipto suyupi kuraj kamachej faraonta nimuy: Israelitakunata kacharipuy suyuykimanta ripunankupaj, nispa.

¹² Moisestajrí kuticherqa: Ni israelitakunapis uyarishawankuchu. Imaynatataj faraón uyariwanqari? Noqaqa mana sumajta parlayta atinichu, nispa.

¹³ Chaywanpis Tata Diosqa Moiseswan, Aaronwan ima parlaspa, kamacherqa israelitakunaman, chantá faraonman ima kay jinata ninankuta: Tata Dios noqaykuta kachamuwayku israelitakunata Egiptomanta orqhonaykupaj, nispa.

Aaronpata Moisespatawan ñawpa tatankukuna

¹⁴ Kaykuna Israelpa wakin ayllukunaj kurajninkukuna karqanku: Israelpa kuraj kaj churin Rubenpa churinkuna karqanku: Janoc, Falú, Jesrón, Carmi ima. Chaykuna Rubenpa wasi ayllun karqanku.

¹⁵ Simeonpata churinkunataj karqanku: Jemuel, Jamín, Oad, Jaquín, Sojar, Saúl ima. Saulpata maman Canaán llajtayoj karqa. Chaykuna Simeonpata wasi ayllun karqanku.

¹⁶ Levijpata churinkunaj sutinku kurajmanta sullk'akama karqa: Gersón, Coat, Merari ima. Leviqa 137 watata kawsarqa.

¹⁷ Gersonpata churinkunataj wasi ayllunkuman jina kaykuna karqanku: Libni, Simey ima.

¹⁸ Coatqa 133 watata kawsarqa. Churinkunataj karqanku: Amirán, Isar, Hebrón, Uziel ima.

¹⁹ Merarij churinkunataj karqanku: Mali, Musi ima. Chaykuna Levijpata wasi ayllun, listasqa kasqankuman jina karqanku.

²⁰ Amiranqa tian Jocabedwan casarakorqa, churinkunataj karqanku Aaronwan, Moiseswan ima. Amiranqa 137 watata kawsarqa.

²¹ Isarpata churinkuna karqanku: Coré, Nefeg, Zicri ima.

²² Uzielpata churinkunataj karqanku: Misael, Elzafán, Sitri ima.

²³ Aaronqa Elisabetwan casarakorqa. Payqa Nasonpata panan, Aminadabpata ususintaj karqa. Aaronqa warminpi tawa wawakunata rejserqa: Nadabta, Abiuta, Eleazarta, Itamarta ima.

²⁴ Coréj churinkuna karqanku: Asir, Elcana, Abiasaf, ima. Chaykuna Coréj wasi ayllun karqanku.

²⁵ Aaronpata ujnin kaj churin Eleazarqa Futielpata ususinwan casarakorqa, paypa churintaj Finés karqa. Paykuna Leví jatun ayllu ukhupi kurajkuna karqanku.

²⁶ Ñawpajpi listasqa karqanku, chay Aaronta, Moisestawan ima Tata Dios kamacherqa israelitakunata soldadokunata jina Egiptomanta orqhomunankuta.

²⁷ Moiseswan, Aaronwan ima kallarqankutaj, pikunachus Egiptopi kuraj kamachej faraonwan parlamorqanku israelitakunata orqhomunankupaj, chaykuna.

Diosqa Moisesta, Aarontawan wajyan

²⁸ Maypachachus Tata Dios Egiptopi Moiseswan parlarqa chaypacha, pay nerqa:

²⁹ Noqamin Tata Dios kani. Kunantaj qan rispa, Egiptopi kuraj kamachej faraonta niy, imatachus noqa nisqayki, chay tukuyta, nispa.

³⁰ Moisestajrí kuticherqa: Noqaqa mana sumajta parlayta atinichu. Imatataj noqata faraón uyariwanqari? nispa.