Éxodo 4 - DIOSPA QHELQACHISQ

¹ Chantá Moisés Tata Diosman kuticherqa: Israelitakuna mana nisqayta jap'ikonqankuchu, nitaj kasuwanqankuchu. Aswanpis niwanqanku: Tata Diosqa mana qanman rikhurisunkichu, nispa.

² Tata Diostaj kuticherqa: Imatataj jap'ishankiri? nispa. Moisestaj nerqa: Uj varata jap'ishani, nispa.

³ Chantá Tata Dios Moisesta nerqa: Varaykita pampaman choqay, nispa. Paytaj pampaman choqarqa. Pampaman choqajtinkamataj, varaqa katariman tukorqa. Moisestaj mancharikuspa, katarimanta ayqeyta munarqa.

⁴ Tata Diostajrí Moisesta nerqa: Chupanmanta jap'iy, nispa. Moisestaj kasuspa, katarita chupanmanta jap'iykorqa, jap'ejtinkamataj, katareqa varaman tukuporqa.

⁵ Tata Diostaj nillarqapuni: Chayta rikuspa, paykuna yachanqanku ñawpa tataykichejkunaj Tata Diosnin, Abrahampata, Isaacpata, chantá Jacobpata ima, qanman rikhurisqayta, nispa.

⁶ Chantá Tata Dios ujtawan Moisesta nillarqataj: Makiykita ojllayniykiman churaykuy, nispa. Moisestaj makinta ojllayninman churaykorqa. Makinta orqhospataj, rit'i jina yurajllata, llejti onqoywan kasqanta rikorqa.

⁷ Chaymanta Tata Dios nillarqataj: Ujtawan makiykita ojllayniykiman churaykuy, nispa. Moisestaj ujtawan makinta ojllayninman churaykorqa. Makinta orqhospataj, tukuy ukhun jina mana imanasqata rikorqa.

⁸ Chantá Tata Dios ujtawan nerqa: Sichus kay ñawpaj kaj rikuchisqaykita rikuspa mana nisqaykita jap'ikonqankuchu, nitaj kasusonqankuchu chayqa, kay qhepan kaj rikuchisqaykita rikuspa, nisqaykita jap'ikonqanku.

⁹ Sichus chay iskay señalkunata rikuspa, mana nisqaykita jap'ikonqankuchu, nitaj uyarisonqankuchu chayqa, yakuta mayumanta oqharimuspa, jallp'aman jich'anki. Jallp'aman jich'asqayki yakutaj yawarman tukonqa, nispa.

¹⁰ Moisestajrí kuticherqa: Ay, Dios Tatáy, noqaqa mana sumajta parlayta yachanichu, mana qan parlawasqaykillamantachu, ni qaynallamantachu, nitaj kunallanmantachu. Noqaqa unaypuni jina karqani. Parlashajtiytaj, qalloyqa watakullawan, nispa.

¹¹ Tata Diostaj kuticherqa: Chantá pitaj runata simiyojta ruwarqari? Manachu noqa Tata Dios runata opayachini, joq'arayachini, ñawsayachini, chayrí qhawarichini?

¹² Chayrayku Egiptoman riy. Parlashajtiyki, noqamin qanwan kasaj, jinataj noqa yachachisqayki imatachus parlanaykita, nispa.

¹³ Moisestajrí kuticherqa: Ay, Diosníy, wajllata kachawaj karqa ari, nispa.

¹⁴ Jinapi Tata Diosqa Moisespaj phiñarikuspa, nerqa: Leví jatun ayllumanta wawqeyki Aarón yanapasunanpaj kashan. Noqa yachani pay sumajta parlayta yachasqanta. Payqa ñapis taripasoj jamushanña, rikususpataj, manchayta kusikonqa.

¹⁵ Egiptopiña kashajtiykichej qan payman parlaspa, imatachus ninanta sumajta yachachinki. Noqataj paywan kasaj, jinallataj qanwanpis. Chantá imatachus ruwanaykichejta noqallataj yachachisqaykichej.

¹⁶ Qanqa Aaronman parlanki noqapis parlashayman jina, paytaj runakunaman imatachus nisqaykita willanqa.

¹⁷ Jinallataj kay varata apanki, chaywan t'ukuna imakunata ruwanaykipaj, nispa.

Moisés Egiptoman kutirin

¹⁸ Chantá Moisés chaymanta ripuspa, suegron Jetrojpaman kuterqa, nerqataj: Noqaqa Egiptoman wawqeykunata watukoj risaj, kawsakushankurajchus manachus, chayta yachaj, nispa. Jetrotaj nerqa: Jina kajtenqa, rillay ari, allillantaj risuchun, nispa.

¹⁹ Chantá Madianllapiraj Moisés kashajtin, Tata Dios ujtawan payman rikhurispa, nerqa: Egiptoman kutiy, imaraykuchus qanta wañuchiyta munajkunaqa wañunkuña, nispa.

²⁰ Chayrayku Moisés warminta, wawankunatawan ima burroman lloq'aykuchispa, Egiptoman kutirerqa. Jinallataj Diospa qosqan varatapis apallarqataj.

²¹ Chaymanta Tata Diosqa Moisesta nillarqataj: Egiptoman kutispa, faraonpa ñawpaqenpi kamachisusqayman jina t'ukuna ruwanaykita ruwankipuni. Noqatajrí faraonpa sonqonta rumiyachisaj, paytaj israelitakunata mana kachariyta munanqachu.

²² Chantá faraonta ninki: Tata Dios ajinata nisunki: Israelqa noqaj kuraj kaj churiymin.

²³ Ña niykiña, yupaychanawanpaj churiyta kacharinaykita, qantajrí mana rinanta munashankichu. Chayrayku noqaqa kuraj kaj qhari wawaykita wañuchisaj, nispa.

²⁴ Moiseswan, ayllunwan ima ñanta rishajtinku, puñunankupaj jarakunanku wasipi Tata Dios rikhurispa, Moisesta wañuchiyta munarqa.

²⁵ Moisespa warmin Seforatajrí chayta rikuspa, uj q'achi rumita oqhariytawan, qhari wawanpata phichilunpi ch'ulitunta khuchuspa, orqhorqa. Chaywantaj Moisespa khapanman llankhaykuchispa, nerqa: Qanqa wawaypa yawarninwan jark'asqa kanki, nispa.

²⁶ Chantá Tata Dios manaña Moisesta wañuchiyta munarqachu. Seforatajrí: Yawarwan jark'asqa qosay kanki, nispa, parlasharqa wawanta circuncidasqanmanta.

²⁷ Chaykamataj, Tata Dios Aaronta nerqa: Riy ch'innejman wawqeyki Moisesta taripaj, nispa. Paytaj kachaykukuspa, Diospa orqon nisqa, chaynejpi Moisesta taripamorqa. Napaykuspataj, wawqenta much'aykorqa.

²⁸ Chaymanta Moisesqa Aaronman Tata Dios imatachus nisqanta willarqa, chantá t'ukuna imakunata ruwananta kamachisqantawan ima willallarqataj.

²⁹ Chaymantataj Moiseswan Aaronwan rispa, Egiptoman kuterqanku, chayaspataj, israelitakunaj tukuynin kurajninkukunata tantacherqanku.

³⁰ Aarontaj paykunaman willarqa, Tata Dios imatachus Moisesman nisqa, chay tukuyta. Moisestaj Diospa kamachisqanman jina, kurajkunaj rikunankuta t'ukunapaj jina señalkunatapis ruwallarqataj.

³¹ Jinapi israelitakuna paykunaj nisqankuta jap'ikorqanku. Chantá Tata Dios israelitakunamanta yuyarikusqanta, ñak'arisqankutapis rikusqanta ima yachaspa, tukuyninku qonqoriykukorqanku, Diostataj yupaycharqanku.