Éxodo 39 - DIOSPA QHELQACHISQ

Sacerdotekunapaj p'acha

¹ Tata Dios Moisesman kamachisqanman jina, Dioswan Tinkukuna Toldopi Aarón imachus ruwananta ruwananpaj p'achakunata ruwarqanku, anqa telamanta, puka panti telamanta, puka telamantawan.

² Besalelqa unkuta qorimanta ruwallarqataj, anqa telamanta, puka panti telamanta, puka telamanta, linomanta sumaj awasqa telamantawan.

³ Qorita martillowan takaspa, sillp'ayacherqa, chaymantataj ñañu q'aytuta jina ruwarqa. Chantá qorimanta q'aytuwan ima munay pallayniyojta ruwarqa, anqa telapi, puka panti telapi, puka telapi, linomanta sumaj awasqa telapi ima.

⁴ Chantá unkuman iskay watanata churarqa, chaykunataj puraj puntanwan watasqa karqa.

⁵ Unkuta watanapaj chumpipis kikillantaj ruwasqa karqa, qorimanta, anqa telamanta, puka panti telamanta, puka telamanta, linomanta sumaj awasqa telamanta ima, Tata Dios Moisesman kamachisqanman jina.

⁶ Chantá ónice nisqa rumita ch'eqospa, qorimanta jap'ichina pataman churararqanku. Chaymantaj t'illmispa Israelpa churinkunaj sutinkuta churarqanku.

⁷ Chantá Besalelqa, Tata Dios Moisesman kamachisqanman jina, unkoj watanaman chay rumikunata k'askaykucherqa, Israelpa churinkuna yuyarisqa kanankupaj.

⁸ Jinallataj pecherata unkuta jina sumaj k'achituta ruwallarqataj qorimanta, anqa telamanta, puka panti telamanta, puka telamanta, linomanta sumaj awasqa telamanta ima.

⁹ Pecheraqa phatu karqa, sapa kantun chhikachajkama iskay chunka iskayniyoj centimetrokama karqa.

¹⁰ Pecheramanqa lliphipirishaj rumikunata tawa sinruta churarqanku. Ñawpaj kaj sinrupi, sárdico rumi karqa, chaymanta topacio rumi, chaymantataj esmeralda rumi.

¹¹ Iskay kaj sinrupitaj rubí rumi, chaymanta zafiro rumi, chaymantataj diamante rumiwan ima karqa.

¹² Kinsa kaj sinrupitaj jacinto nisqa rumi, chaymanta ágata nisqa rumi, chaymantataj amatista nisqa rumiwan ima karqa.

¹³ Tawa kaj sinrupitaj berilo rumi, ónice rumi, jaspe nisqa rumiwan ima karqa. Chay lliphipirishaj rumikunaqa qoriwan jap'ichisqa karqanku.

¹⁴ Chay rumikunaqa chunka iskayniyoj karqanku, Israelpa churinkuna chunka iskayniyoj kasqanman jina. Sapa uj rumipi uj jatun aylloj sutin t'illmisqa karqa.

¹⁵ Jinallataj pecherapaj sumaj qorimanta ñañu cadenata ruwallarqankutaj, chaytataj watanata jina simp'arqanku.

¹⁶ Chaymantaqa qorimanta iskay jap'ichinata, chantá iskay ninrikunatawan ruwallarqankutaj. Chaytataj pecheraj patannejpi puraj kantunman chhitarqanku.

¹⁷ Chantá qorimanta ñañu cadenata pecheraj ninrinman pasacherqanku.

¹⁸ Jinallataj qorimanta ruwasqa cadenata iskaynin chhitasqaman jap'icherqanku, chantá unkoj ñawpaqenpi watananta jap'icherqanku.

¹⁹ Chaymantaqa qorimanta iskay ninrikunata ruwaspa, chaykunata pecheraj ura kantunman, unkuwan tinkuypi churarqanku.

²⁰ Qorimanta iskay ninritawan ruwaspataj, unkoj ñawpaqenpi watananman churarqanku, siraynin chaynejman, unkoj chumpinmanta patanpi.

²¹ Jinaspataj, pecheraj ninrinta, unkoj ninrintawan anqa q'aytuwan wataykorqanku, pechera unkoj chumpinmanta patanejpi kananpaj, pechera ama unkumanta t'aqasqa kananpaj. Ajinata Tata Dios Moisesman kamachisqanman jina ruwarqanku.

²² Jinallataj unkoj patanpi kaj poncho jina qhatanata, anqa telamanta ruwallarqankutaj.

²³ Chayqa chawpinpi khallayoj karqa. Khallanqa qara chaleco jina sumaj q'empisqa karqa, ama llik'ikunanpajtaj sirasqa karqa.

²⁴ Poncho jina qhatanaj muyuyninpitaj granadaman rijch'akojta jina ruwaspa churarqanku, anqa q'aytumanta, puka q'aytumanta, puka panti q'aytumanta, chantá sumaj t'ullkusqa linomanta ima.

²⁵ Chaymantaqa sumaj qorimanta campanillakunata ruwallarqankutaj, chaykunatataj qhatanaj muyuyninman, q'aytumanta ruwasqa granadakunatawan chawpinchasqata churarqanku.

²⁶ Tata Dios Moisesman kamachisqanman jina, poncho jina qhatanaj kantunman uj campanillata, chantá uj granadata ima churarqanku. Ajinata poncho jina qhatanaj tukuy muyuyninman churarqanku. Aaronpa p'achan ajina karqa Tata Diospa ñawpaqenpi imachus ruwananta ruwayta atinanpaj.

²⁷ Jinallataj Aaronpaj, chantá churinkunapajwan ima sumajnin kaj linomanta p'achata ruwapullarqankutaj.

²⁸ Kikillantataj mana ninriyoj chhoqo ch'uluta, uma watakunata, chantá calzoncillotapis sumajnin kaj linomanta ruwarqanku.

²⁹ Chumpitapis sumajnin kaj t'ullkusqa linomanta, anqa telamanta, puka panti telamanta, puka telamanta ima ruwarqanku, Tata Dios Moisesman kamachisqanman jina.

³⁰ Jinallataj sumaj qorimanta sillp'a tablitata jina ruwarqanku. Chay qorimanta tablitaqa kuraj kaj sacerdote Diospaj t'aqasqa kasqanmanta señal karqa. Chaymantaj sellopi jina qhelqasqata churarqanku: “Tata Diospaj T'aqasqamin”, nispa.

³¹ Jinaspataj, qorimanta tablitaman anqa q'aytuta churaspa, uma watanaj patanman churarqanku. Ajinata Tata Dios Moisesman kamachisqanman jina ruwarqanku.

Dioswan Tinkukuna Toldota ruwayta tukunku

³² Dioswan Tinkukuna Toldota ajinata ruwayta tukorqanku. Israelitakuna Dioswan Tinkukuna Toldota ruwaspa, Tata Dios Moisesman kamachisqanman jina kikinta ruwarqanku.

³³ Dioswan Tinkukuna Toldota, chantá tukuy imanta Moisesman apamorqanku: Jap'ichinata, tablakunata, k'aspikunata, sayantakunata, chukukunata,

³⁴ qhatanapaj pukaman tiñisqa mocho qarata, tejonmanta qarata, arcata qhatanapaj velotawan.

³⁵ Apamullarqankutaj Diospa kamachisqanwan kaj arcata, k'aspinkunata, arcaj kirpanantawan.

³⁶ Apamullarqankutaj mesata, tukuy imantinta, chantá Diospa ñawpaqenpi churana t'antatawan.

³⁷ Apamullarqankutaj sumaj qorimanta ruwasqa candelerota, lamparakunata tukuy imantinta, k'anchanapaj aceitetawan ima.

³⁸ Apamullarqankutaj, qorimanta ruwasqa altarta, jawina aceiteta, k'achituta q'apashaj inciensota, Dioswan Tinkukuna Toldo punkuman churana cortinatawan.

³⁹ Apamullarqankutaj broncemanta ruwasqa altarta, rejillantinta, iskaynin k'aspinta, tukuy imantintawan. Apamullarqankutaj jatun ch'illamita, churanapaj chukuntawan.

⁴⁰ Apamullarqankutaj patiota jark'achinapaj cortinakunata, sayantakunata, chukukunata, patioj punkunpi churanapaj cortinata, waskhanta, estacankunata, Dioswan Tinkukuna Toldopi imachus ruwanata ruwanapaj, chaykunatawan ima.

⁴¹ Apamullarqankutaj Dioswan Tinkukuna Toldopi ruwajkunapaj p'achakunatapis: Kuraj kaj sacerdote Aarón Diospaj t'aqasqa kasqanmanta p'achakunata, jinataj churinkuna sacerdote jina churakunanku p'achatawan.

⁴² Israelitakunaqa tukuy imata ruwarqanku Tata Dios Moisesman kamachisqanman jina.

⁴³ Moisestaj tukuy chaykunata qhawaspa, rikorqa Tata Diospa kamachisqanman jina ruwasqankuta. Chantá paykunata samincharqa.