Éxodo 38 - DIOSPA QHELQACHISQ

Broncemanta altar

¹ Chantá Besalel acacia maderamanta uywa ñak'asqata q'olachispa jaywanapaj altarta ruwallarqataj. Sayt'unman iskay metro cuartayoj karqa, kikillantaj kinrayninman. Sayayninmantaj uj metro cuartayojllataj karqa.

² Tawantin esquinanpaj wajrata jina ruwarqa, chaykunataj altarwan ujlla karqanku. Chantá ruwasqan altarta broncewan lluch'iykorqa.

³ Jinallataj altarpi ruwanapaj imakunachus kanan karqa, chaykunatapis broncemanta ruwarqa: Ushpha oqharinata, palakunata, tazakunata, trinchekunata, nina k'ajata apaykachanata ima.

⁴ Ruwallarqataj broncemanta uj rejillata, chaytataj altar chawpiman churarqa. Chay rejillataj altarpa khuskanninkama chayarqa.

⁵ Broncemanta ruwasqa rejillaj tawantin kantunman churananpaj, tawa ninrita ruwarqa, chayninta k'aspita pasachinanpaj.

⁶ Jinallataj wantunapaj k'aspita acacia maderamanta ruwarqa, chantá broncewan lluch'iykorqa.

⁷ Chantá k'aspikunata pasacherqa, altarpa ladonpi ninrikuna karqa, chaynejta. Chaymanta wantuspa altarta maymanpis apanapaj. Altartaqa tablamanta ruwarqa, ukhuntaj soqolla karqa.

Broncemanta ch'illami

⁸ Chantá Besalelqa Dioswan Tinkukuna Toldo punkupi yanapaj warmikunaj bronce espejonkumanta uj ch'illamita ruwallarqataj. Ch'illamej sayanantapis broncellamantataj ruwarqa.

Dioswan Tinkukuna Toldoj pation

⁹ Jinallataj Besalelqa Dioswan Tinkukuna Toldoj pationta ruwallarqataj. Uray patiopi cortinaqa tawa chunka phishqayoj metro karqa. Chay cortinaqa linomanta sumaj awasqa telamanta karqa.

¹⁰ Sayantakunaqa iskay chunka karqanku, broncemanta chukukunapis iskay chunkallataj. Sapa sayantapi jap'ichina, chantá ninrikuna imaqa qolqe metalmanta ruwasqa karqa.

¹¹ Patanejpi kaj cortinapis tawa chunka phishqayoj metro karqa, iskay chunka sayantayoj, broncemanta ruwasqa iskay chunka chukuyoj ima. Jap'ichinan, chantá ninrinkuna imaqa qolqe metalmanta ruwasqa karqanku.

¹² Patioj inti yaykuyninnejpi cortinarí iskay chunka iskayniyoj metro khuskanniyoj karqa. Jinallataj chunka sayantayoj, broncemanta ruwasqa chunka chukuyoj ima karqa. Jap'ichinan, ninrinkuna imaqa qolqe metalmanta ruwasqa karqa.

¹³ Inti llojsimuynejman cortinataj iskay chunka iskayniyoj metro khuskanniyoj karqa.

¹⁴ Dioswan Tinkukuna Toldoman yaykuna punkoj ujnin ladonpi qanchis metroyoj cortina karqa. Sayantakunaqa kinsa karqa, chukunpis kinsallataj.

¹⁵ Punkoj ujnin ladonpi cortinaqa qanchis metroyoj karqa. Sayantakunaqa kinsa karqa, chukupis kinsallataj.

¹⁶ Patioj muyuyninpi tukuy cortinaqa linomanta sumaj awasqa karqa.

¹⁷ Sayantakunaj chukonqa broncemanta karqa. Jap'ichinan, ninrinkuna imatajrí qolqe metalmanta ruwasqa karqa. Jinallataj sayantakunaj puntan qolqe metalwan lluch'isqa karqanku. Patiopi tukuynin sayantakunaj ninrinkunaqa qolqe metalmanta ruwasqa karqanku.

¹⁸ Patio punkupi cortinaqa k'achitu pallayniyoj ruwasqa karqa anqa telamanta, puka panti telamanta, puka telamanta, linomanta sumaj awasqa telamanta ima. Sayt'unman jisq'on metroyoj karqa, sayayninmantaj iskay metro cuartayoj. Patanman patioj cortinan jinallataj karqa.

¹⁹ Kallarqataj tawa sayantakuna, broncemanta ruwasqa chuku patapi sayasqa, qolqe metalmanta jap'ichinayoj, ninriyojtaj. Chantapis sayantakunaj puntanqa qolqe metalwan lluch'isqa karqa.

²⁰ Dioswan Tinkukuna Toldoj estacankuna, patioj estacankuna imaqa tukuynin broncemanta ruwasqa karqanku.

Metal mashkhachus yaykusqan yachakun

²¹ Moisés kamachisqanman jina, levitakuna yupaspa orqhorqanku Dioswan Tinkukuna Toldota ruwanapi mashkhachus metal yaykusqanta. Chay levitakunataqa Aaronpa churin Itamar kamachisharqa.

²² Judá jatun ayllumanta Jurpata allchhin, Urij churin Besaleltaj tukuy imata ruwarqa, Moisesman Tata Dios kamachisqanman jina.

²³ Besalelta yanaparqa Dan jatun ayllumanta, Ajisamacpa churin Aholiab. Aholiabqa metalmanta imallatapis ruwayta sumajta yacharqa. Yachallarqataj sumajta awayta, pallayniyojta sumajta awakipayta anqa telapi, puka panti telapi, puka telapi, linomanta sumaj telapiwan ima.

²⁴ Dioswan Tinkukuna Toldopi imachus kajta ruwanapaj qoreqa, israelitakuna Tata Diosman jaywasqanku qorimanta karqa. Dioswan Tinkukuna Toldopi chimpu churasqa kasqanman jina, jaywasqanku qoreqa 965 kilo, kinsa chunka gramoyoj karqa.

²⁵ Yupachikusqankuman jina israelitakunaj apamusqanku qolqe metalqa Dioswan Tinkukuna Toldopi chimpu churasqa kasqanman jina, 3.319 kilo 525 gramoyoj karqa.

²⁶ Iskay chunka watayojmanta pataman tukuy yupachikojkunaqa 603.550 qharikuna karqanku. Paykunaqa Dioswan Tinkukuna Toldopi chimpu churasqa kasqanman jina, sapa uj phishqa gramo khuskanniyoj qolqe metalta qorqanku.

²⁷ Dioswan Tinkukuna Toldopaj chukukunata, chantá velopaj chukukunata ruwanapaj, 3.300 kilo qolqe metal karqa. Chay qolqemanta pachaj chukuta ruwarqanku. Sapa chukuta 330 kilo qolqe metalmanta ruwarqanku.

²⁸ Jinallataj Besalelqa chunka jisq'onniyoj kilo phishqa pachaj gramoyoj qolqe metalmanta sayantakunapaj jap'ichinata, ninrikunata ima ruwallarqataj. Chantá sayantakunaj puntantapis qolqe metalwan lluch'iykorqa.

²⁹ Broncemanta Diosman qosqaqa 2.407 kilo 400 gramoyoj karqa.

³⁰ Chay broncemanta Dioswan Tinkukuna Toldoj punkunpaj chukukunata ruwarqanku. Ruwallarqankutaj broncemanta altarta, rejillanta, altarpa tukuy imankunatawan ima.

³¹ Ruwallarqankutaj patioj muyuyninpi sayantakunapaj chukukunata, patioj punkunpi sayantakunapaj chukukunata, estacakunata, chantá patioj muyuyninpi estacakunatawan ima.