Éxodo 34 - DIOSPA QHELQACHISQ

Dios kamachisqankunata ujtawan qhelqan

¹ Tata Dios Moisesta nillarqataj: Ñawpajta jina ch'eqospa, iskay p'alta rumita ruwallaytaj. Choqaspa p'akerqanki, chay rumipi imakunachus qhelqasqa karqa, chaykunata ujtawan qhelqallasajtaj.

² Jinallataj q'aya paqarin tutamanta Sinaí orqoman wicharimunaykipaj wakichikuy, chay orqo patapi noqawan tinkukunaykipaj.

³ Qanwan mana ni pipis wicharimunanchu tiyan, nitaj pipis orqopi kananchu tiyan. Nillataj israelitakuna ovejata, nitaj wakatapis orqoj muyuyninpi michinankuchu tiyan, nispa.

⁴ Chantá Moisés ñawpajta jina, iskay p'alta rumita ruwallarqataj. Tata Dios kamachisqanman jinataj, q'ayantin sut'iyarqoyta jatarispa, chay iskay p'alta rumita oqhariykukuytawan, Sinaí orqoman wicharerqa.

⁵ Tata Diostaj phuyupi urayk'amuspa, Moiseswan karqa. Chantá Tata Diosqa paypa sutinta rejsicherqa.

⁶ Moisespa ñawpaqenta pasashaspataj, jatunmanta qhaparispa, nerqa: Noqa Tata Dios kani, khuyakuyniyoj, k'acha sonqoyojtaj, pacienciayoj, mana imamantapis usqhayta phiñarikoj Dios. Noqaqa may jina munakuyniyoj kani, jinallataj cheqamin.

⁷ Munakuyneyqa mana tukukuyniyoj, wiñaypaj kikillanpuni. Chayrayku tukuy millay ruwasqankuta, mana kasukusqankuta, juchallisqankutapis pampachani. Chaywanpis juchallejtaqa mana qhawakullanichu, aswanpis tata mamaj juchallisqankumanta wawankunata, allchhinkunata, allchhinkunaj wawankukamaraj ñak'arichini, nispa.

⁸ Chantá Moisesqa usqhay usqhayta pampakama k'umuykukuspa, Tata Diosta yupaycharqa:

⁹ Diosníy, sichus khuyarikuspa qhawarinawaykita tarini chayqa, noqaykuwan riy ari. Kay runakunaqa mana uyarikuyta munaj kanku. Chaywanpis millayta ruwaspa purisqaykuta, juchaykuta ima pampachapuwayku, jinaspataj, aylluykita jina jap'ikapuwayku, nispa.

Tata Dios israelitakunawan ujtawan tratota ruwan

¹⁰ Chantá Tata Dios kuticherqa: Noqa tukuy israelitakunaj rikunankuta uj tratota qanwan ruwasaj. Rikushajtiykichej, t'ukunata ruwasaj, chay jinaqa kay pachamanta ni uj suyupi, nitaj jayk'ajpis karqachu. Maypichus kashankichej chaypi, tukuy runakuna Tata Diospa ruwasqanta rikonqanku. Qankunawan imatachus ruwasqayqa manchay t'ukuna kanqa.

¹¹ Kunan kamachisusqayta junt'aychej, noqataj ñawpaqeykichejmanta amorreokunata, cananeokunata, jititakunata, ferezeokunata, heveokunata, jebuseokunatawan ima qharqosaj.

¹² Maymanchus yaykunkichej, chaypi tiyakojkunawan amapuni ni ima tratota ruwankichejchu, ama qankunata misk'achisunaykichejpaj.

¹³ Manachayqa altarninkuta thuñirankichej, yupaychananku rumitapis, yupaychananku k'ullutapis phirinkichej.

¹⁴ Amapuni ni mayqen diosman qonqorikunkichejchu, imajtinchus Tata Diosqa manchay celoso, sutenqa: “Celoso Dios”.

¹⁵ Chayrayku chay cheqanejpi tiyakojkunawan amapuni ima tratotapis ruwakunkichejchu. Paykunaqa millayta ruwaspa, diosninkuta yupaychayta yachanku. Chantá uywa ñak'asqata diosninkuman jaywashaspa, qankunata wajyasunkichejman. Qankunataj rispa, paykunawan khuska diosninkuman jaywasqa mikhunata mikhuspa wasanchawankichejman.

¹⁶ Ichapis churiykichejkunata ususinkukunawan casarachiwajchej. Jinataj ususinkukuna millayta ruwaspa, diosninkuta yupaychanaman rispa, churiykichejtapis juchallichillankumantaj.

¹⁷ Amapuni qankunaqa metalta unuyachispa, chaymanta dioskunata ruwakunkichejchu.

Sapa wata ruwana raymikuna

¹⁸ Kamachisqayman jina Mana Levadurayoj T'anta Mikhuna raymita ruwankichej. Qankunaqa qanchis p'unchayta mana levadurayoj t'antata ruwaspa mikhunkichej. Chay raymeqa sapa wata Aviv killapi kanqa, imajtinchus qankunaqa Egiptomanta Aviv killapi llojsimorqankichej.

¹⁹ Tukuy kuraj kaj qhari wawaqa noqajta kanqa. Jinallataj wakamanta, ovejamanta phiwi uña, orqo kajtenqa, noqajllatataj kanqa.

²⁰ Munaspaqa burroj phiwi uñaj cuentanmanta uj corderota chayrí uj chivituta qonkichej. Manachus kacharichinkichej chayrí, burro uñata kunkanmanta q'ewispa wañuchinkichej. Tukuy kuraj kaj churiykichejpa cuentanmantarí preciota pagaspa kacharichinaykichej tiyan. Manapuni pipis noqaman ch'usaj makillaqa jamuwanqachu.

²¹ Sojta p'unchayta llank'ankichej, qanchis kaj p'unchaypitaj samarinkichej. Tarpuypis kachun, chayrí chajra poqoy oqharinapis kachun, samarinkichejpuni.

²² Ruwallankichejtaj Semana nisqa raymita. Trigo Ruthuy Qallariy raymita, chantá Trigo Ruthuy Tukukuy raymita ima. Chay raymikunata sapa wata chajra oqhariy tukukuyta ruwankichej.

²³ Israelmanta tukuy qhareqa sapa wata kinsa kutita rikhurenqanku, Tukuyta Kamachej Tata Diosninkuta yupaychanankupaj.

²⁴ Noqataj ñawpaqeykichejmanta waj suyukunapi tiyakojkunata qharqosaj, jallp'aykichejtataj astawan jatunyachisaj. Chayrayku watapi kinsa kutita Tata Diosniykichejta yupaychaj jamunaykichejkamaqa, mana pipis jallp'aykichejta qhechuyta munaspa yaykumonqachu.

²⁵ Q'olachinapaj uywa ñak'asqa yawarta jaywaspaqa, levadurayoj t'antatawan khuska ama jaywankichejchu, nitaj Pascua raymimanta imatapis q'ayantinpaj puchuchinkichejchu.

²⁶ Jallp'aykichejpi poqojmanta ñawpaj kaj poqoyta, sumajnin kajta Tata Diosniykichejpa toldonman apankichej. Cabra uñataqa ama jayk'ajpis mamanpa lechenwan chayachinkichejchu, nispa. Ajinata Tata Dios nerqa.

Moisés Diospa kamachisqanta qhelqan

²⁷ Chaymanta Tata Diosqa Moisesta nerqa: Kay nisqayta qhelqay, imaraykuchus chayman jina qanwan, jinallataj israelitakunawanpis tratota ruwani, nispa.

²⁸ Chantá Moisesqa Tata Dioswan tawa chunka p'unchayta, tawa chunka tutatawan chaypi qhepakorqa, mana imata mikhuspa, nitaj imata ujyaspa. Chaypi Moisesqa tratomanta chunka kamachisqakunata iskay p'alta rumipi qhelqarqa.

²⁹ Chaymantataj Moisesqa Sinaí orqomanta urayk'amuspa, p'alta rumipi qhelqasqa kamachisqakunata apamorqa. Tata Dioswan parlasqanrayku uyan lliphipirishasqanta Moisés mana reparakorqachu.

³⁰ Aaronwan, jinataj israelitakunawan ima Moisespa uyan lliphipirishasqanta rikuspa, payman qayllaykuyta manchachikorqanku.

³¹ Moisestajrí paykunata wajyarqa, chantá Aaronwan, israelitakunamanta tukuy kurajkunawan ima payman qayllarqanku. Moisestaj paykunawan parlarqa.

³² Chaymantataj tukuy israelitakuna payman qayllaykorqanku, Moisestaj Sinaí orqopi Tata Diospa tukuy kamachisqanta kasunankuta kamacherqa.

³³ Israelitakunaman parlayta tukuytawantaj, Moisés uj velowan uyanta qhataykukorqa.

³⁴ Tata Dioswan parlaj yaykuspa, chantá chaymanta llojsimunankama, Moisesqa uyanta qhatarakoj. Parlasqanmanta llojsimuspataj, Tata Dios payman imatachus kamachisqanta israelitakunaman willaj.

³⁵ Israelitakunaqa Moisespa uyan lliphipirishasqanta rikorqanku. Chayrayku Moisés ujtawan velowan uyanta qhataykukoj karqa, Tata Dioswan parlaj rinankama.