Éxodo 33 - DIOSPA QHELQACHISQ

Tata Dios puririnankuta kamachin

¹ Tata Dios Moisesta nerqa: Qanwan chantá, Egiptomanta orqhomorqanki, chaykunawan khuska kaymanta puririychej, noqa Abrahamman, Isaacman, Jacobmanwan ima tiluspa nerqani: Mirayniykichejman kay jallp'ata qosaj, nispa, chayman.

² Noqataj angelniyta kachamusaj qanta pusasunanpaj. Chantá cananeokunata, amorreokunata, jititakunata, ferezeokunata, heveokunata, jebuseokunata ima kay jallp'amanta qharqosaj.

³ Qankunaqa riychej, maypichus lechewan, abeja misk'iwan yaku jina purishan, chay jallp'aman. Noqarí mana qankunawanchu risaj, ama qankunata chawpi ñanpi chinkarparichinaypaj, imajtinchus qankunaqa ancha rumi sonqo kankichej, nispa.

⁴ Israelitakunaqa Tata Dios k'araj simiwan parlasqanta uyarispa, mayta llakikorqanku. Chayrayku ni pipis jaluchuta churakuspa k'achanchakorqankuchu,

⁵ imaraykuchus Tata Diosqa Moisesta nisqa: Israelitakunata niy: Qankunaqa uyarikunapaj joq'ara kankichej. Uj chhikantachus qankunawan riyman chayqa, usqhayllata qankunata tukurparichiykichejman. Kunanpacha jaluchuykichejta orqhokuychej. Ajinapi noqa yachasaj qankunawan imatachus ruwanayta, nispa.

⁶ Chayrayku israelitakunaqa Horeb orqopi tukuyninku jaluchunkukunata orqhokorqanku, chaymantapachataj manaña churakorqankuchu.

Dioswan tantakunapaj toldo

⁷ Chantá Moisesqa uj toldota apaspa, jaramanta jawapi sayacherqa “Dioswan tantakuna toldo”, nispataj suticharqa. Pillapis Tata Diosta tapurikuyta munajqa jaramanta llojsispa, Dioswan tantakuna toldoman rej.

⁸ Israelitakuna Moisesta toldoman rishajta rikuspa, tukuyninku toldonku punkupi sayarikoj kanku. Chantá Moisés Dioswan tantakuna chay toldoman yaykunankama qhawaj kanku.

⁹ Toldoman Moisés yaykojtinkamataj, sayashaj chhoqo phuyu urayk'amuspa, toldoj punkunpi sayaj. Chantá chaypi Tata Diosqa Moiseswan parlaj karqa.

¹⁰ Dioswan tantakuna toldo punkupi phuyuta sayashasqanta rikuspataj, tukuy israelitakuna toldonku punkupi pampakama k'umuykuspa, Diosta yupaychaj kanku.

¹¹ Chaypi Tata Diosqa uyapura Moiseswan parlaj, imaynatachus pillapis kawsaqenwan parlarikun, ajinata. Dioswan parlaytawantaj, Moisesqa jaraman kutimoj. Moisespa yanapajnin Nunpata churin Josuetajrí, nipuni jayk'ajpis Dioswan tantakuna toldomanta kuyurejchu.

Moisés Diospa uyanta rikuyta munan

¹² Chantá Moisés Tata Diosta nerqa: Qan niwarqanki: Israelitakunata qan pusay, nispa. Chaywanpis mana niwankichu noqawan rinanpaj pitachus kachamunawaykita. Jinallataj niwarqanki noqapi sumajta atinikusqaykita, khuyarikunawaykipajtaj sonqoyki kasqanta.

¹³ Sichus cheqatapuni khuyarikuspa qhawarinawaykita tarini chayqa, imatachus ruwayta munasqaykita niway ari, noqa qanta munakusunaypaj, jinataj qan noqapi atinikunaykipaj. Amataj qonqaychu kay runakunaqa qanpata wawaykikuna kasqankuta, nispa.

¹⁴ Chantá Tata Dios Moisesta nerqa: Noqa kikiy qanwan risaj, samarichisqaykitaj, nispa.

¹⁵ Moisestaj kuticherqa: Sichus qan mana noqaykuwan khuskachu rinki chayqa, ama kaymanta orqhowaykuchu.

¹⁶ Qan noqaykuwan mana riwajchu chayqa, noqa, jinataj aylluyki Israel imaynapitaj yachasqayku qan khuyarikuwasqaykutari? Noqaykuwan rejtiykeqa, sut'ita yachakonqa noqa, jinataj aylluyki kay pachapi runakunamanta t'aqasqa kasqayku, nispa.

¹⁷ Chantá Tata Diosqa Moisesta nerqa: Kayta mañakuwasqaykitapis ruwallasajtaj, imaraykuchus noqa qanta allinpaj qhawayki, jinataj allinpi kawsakunchej, nispa.

¹⁸ Moisestajrí kuticherqa: Jina chayqa, mañarikuyki jatun kayniykej lliphipiyninta rikuchinawaykita, nispa.

¹⁹ Tata Diostaj kuticherqa: Noqa tukuy k'acha kasqayta ñawpaqeykipi rikuchisqayki, uyarinaykitataj sutiyta oqharisaj. Noqa khuyakusaj pitachus khuyakuyta munasqayta, yanapasajtaj pitachus yanapayta munasqayta.

²⁰ Uyaytarí manapuni rikuwankichu, imaraykuchus pipis rikuwajqa manapuni kawsanqachu, nispa.

²¹ Chantá Tata Dios Moisesta nillarqataj: Qhawariy, kay qayllaypi uj cheqa tiyan. Chayrayku chay chhanka patapi sayay.

²² Jatun kayniypa lliphipiynin chaynejta pasashajtin, chhanka k'ajlluman churasqayki. Chantá chaynejta pasanaykama, makiywan pakaykusqayki.

²³ Chaymantataj makiyta oqharisaj, qantaj wasallaytaña rikunki. Uyaytarí manapuni rikunkichu, nispa.