Éxodo 32 - DIOSPA QHELQACHISQ

¹ Moisés Sinaí orqomanta mana usqhayta urayk'amusqanrayku, israelitakuna tantakuspa, Aaronta nerqanku: Egiptomanta orqhomuwarqayku, chay Moiseswan imachus kasqanta mana yachaykuchu. Chayrayku ñawpaqeykuta rispa pusanawaykupaj, dioskunata ruwapuwayku, nispa.

² Chantá Aarón nerqa: Warmiykichejpa, churiykichejpa chantá ususiykichejpa ninrinkupi kashan, chay qori jaluchukunata orqhospa, apamuwaychej, nispa.

³ Jinataj israelitakunaqa ninrinkumanta qori jaluchunkuta orqhokuspa, Aaronman jaywarqanku.

⁴ Paytaj jap'ispa qorita ninapi unuyacherqa. Chaymantataj cincelwan t'illmispa, waka uñaman rijch'akoj lantita ruwarqa. Chantá israelitakuna waka uña lantita rikuspa nerqanku: Israelitakuna, kaymin Egiptomanta orqhomuwarqanchej, chay diosninchejqa, nispa.

⁵ Chantá Aarón chayta rikuspa, waka uñaj ñawpaqenpi uj altarta ruwarqa. Chaymantataj israelitakunata nerqa: Q'aya Tata Diospa sutinpi uj raymita ruwasunchej, nispa.

⁶ Q'ayantenqa tutamanta jatariytawan, israelitakuna uywa ñak'asqa q'olachinata, k'acha kawsakuy jaywanatawan ima waka uña lantiman jaywarqanku. Chaymantataj tiyaykurikuspa, mikhorqanku, ujyarqanku ima. Chantá kusiririkuspa tukuy imaymana khuchiriyota ruwanaman qokorqanku.

⁷ Chantá Sinaí orqopi Tata Dios Moisesta nerqa: Kunanpacha kay orqomanta urayk'uy, imaraykuchus Egiptomanta orqhomusqayki runakunaqa millayta ruwashanku.

⁸ Paykunaqa kamachisqaymanta usqhayllata t'aqakuspa, qorita unuyachinku waka uña lantita ruwakunankupaj. Chaymantataj lanti ruwakusqankuman q'olachisqa jaywanata jaywaspa, yupaychashanku, nishankutaj: Israelitakuna, kaymin Egiptomanta orqhomuwarqanchej, chay diosninchejqa, nispa.

⁹ Chay jawa Tata Diosqa Moisesta nillarqataj: Noqa yachaniña kay runakuna rumi sonqo kasqankuta.

¹⁰ Kunanqa ama jark'awaychu. Noqa paykunapaj sinch'i phiñasqa kasqayrayku, wañuchispa paykunata tukuchisaj. Qanmantataj waj jatun aylluta sayarichisaj, nispa.

¹¹ Moisestajrí chayta uyarispa, Tata Diosninmanta mañakorqa: Tata Dios, imaraykutaj aylluykej contranpi chay jina k'arajtapuni phiñakuwajri? Qanmin paykunata sinch'i atiyniykiwan tukuy imaymana t'ukunata ruwaspa, Egiptomanta orqhomorqanki.

¹² Egipto llajtayojkunaqa ninkumanchari: Diosqa israelitakunata mana allin sonqowan kaymanta orqhon, ch'innejpi wañuchispa kay pachamanta chinkachinanpaj, nispa. Chayrayku sonqoykita tiyaykuchikuspa, aylluykita ama jasut'iychu, ari.

¹³ Kamachiyki Abrahamman, Isaacman, Israelman ima sutiykirayku tiluspa, nisqaykimanta yuyarikuy. Qan paykunata nerqanki: Noqa janajpi ch'askakunata jinapuni mirachisqaykichej, nisqayman jinataj wiñaypaj qankunaman kay jallp'ata qosqaykichej, nispa.

¹⁴ Chantá Tata Dios sonqonta tiyaykuchikorqa, manañataj Israel ayllunta chinkachiyta yuyasqanta ruwarqachu.

¹⁵ Moisesrí orqomanta urayk'amorqa, iskay p'alta rumipi kamachisqakuna qhelqasqata aparisqa. Chay p'alta rumikunaqa puraj lado uyanpi qhelqasqa karqa.

¹⁶ P'alta rumikunataqa Dios kikinmin ruwasqa, jinallataj chaykunapi kamachisqakunaqa Diospa qhelqasqanpuni karqa.

¹⁷ Chantá Josueqa israelitakunaj ch'ajwasqankuta uyarispa, Moisesta nerqa: Maqanakuspapis ch'ajwashankuman jina jaramanta uyarikamushan, nispa.

¹⁸ Moisestajrí kuticherqa: Mana maqanakupi atipaspa kusiywan qhaparisqankutachu, nitaj atipachikuspa waqaspa qhaparisqankutachu uyarishani. Manachayqa takishasqankuta noqa uyarishani, nispa.

¹⁹ Chantá Moisés jaraman qayllaykuspa, waka uña lantita rikorqa, israelitakunatataj tusushajta tariparqa. Chantá manchay k'arajta phiñarikuspa, makinpi jap'isharqa, chay p'alta rumikunata orqo k'uchupi choqaspa p'akirparerqa.

²⁰ Waka uña lanti ruwasqankutataj jap'iytawan, ninaman wijch'uspa unuyacherqa. Chaymantataj lantita ñut'uta kutaspa, yakuman jich'aykorqa. Jinaspataj, chay yakuta israelitakunaman ujyacherqa.

²¹ Chantá Moisés Aaronta nerqa: Imanasorqankutaj kay runakuna kay jina jatunta paykunata juchallichinaykipajri? nispa.

²² Aarontajrí kuticherqa: Ama phiñakuychu, tatáy. Qan allinta yachanki, kay runakuna mana allin kajta ruwanaman sonqo aysasqa kasqankuta.

²³ Paykuna niwarqanku: Pusanawaykupaj dioskunata ruwapuwayku, imaraykuchus Egiptomanta orqhomuwarqayku, chay Moisesqa imanakunchus, mana yachaykuchu, nispa.

²⁴ Noqataj paykunata nerqani: Pejpatachus qorin tiyajtenqa, apamuwaychej, nispa. Paykuna qorita qowarqanku, noqataj ninaman wijch'uykorqani. Jinamanta kay waka uña rikhurerqa, nispa.

²⁵ Moisés rikorqa Aarón qhawakullasqanrayku, israelitakuna kacharparisqa jina munasqankuta ruwashasqankuta. Rikullarqataj israelitakunaqa tukuy awqanku asikunankupaj jina kashasqankuta.

²⁶ Chayrayku Moisesqa jara punkupi sayaspa, nerqa: Pikunachus Tata Diosman sayasqa kajkunaqa noqaman jamuychej, nispa. Chantá tukuynin levitakuna, maypichus Moisés kasharqa, chayman tantakorqanku.

²⁷ Chaymanta Moisés levitakunata nerqa: Israelitakunaj Tata Diosnin ajinata nin: Sapa ujniykichej espadaykichejta oqharikuspa, jaraman kutiychej. Chantá toldomanta toldo rispa, wawqeykichejta, kawsaqeykichejta, chantá qayllaykichejpi tiyakojkunata ima wañuchiychej, nispa.

²⁸ Levitakunaqa Moisespa nisqanta kasuspa, chay p'unchay kinsa waranqata jina qharikunata wañucherqanku.

²⁹ Chaymanta Moisesqa levitakunata nerqa: Kunan qankunaqa Diospa kamachinkuna kanaykichejpaj t'aqasqa kankichej, millayta ruwaj wawaykichejpa, chantá wawqeykichejpa contrankuta sayaykusqaykichejrayku. Chayrayku Tata Diosqa kay p'unchay qankunata saminchasunkichej, nispa.

³⁰ Q'ayantin Moisesqa tukuy israelitakunata nerqa: Qankunaqa ancha jatunta juchallinkichej. Kunanqa Tata Dios kashan, chayman risaj. Ichapis Tata Diosmanta mañakojtiy juchallisqaykichejta pampachananta tariyman, nispa.

³¹ Chantá Moisesqa maypichus Tata Dios kasharqa, chayman kutispa, nerqa: Israelitakunaqa qorimanta diosta ruwakuspa, jatunta juchallinku.

³² Chaywanpis noqa mañarikuyki, paykunaj juchankuta pampachanaykita. Manachus juchallisqankuta pampachanki chayqa, kunanpacha qhelqaykimanta sutiyta orqhopuway, nispa.

³³ Chaywanpis Tata Dios Moisesman kuticherqa: Pichus noqaj contraypi juchallejpa sutillanta qhelqaymanta orqhopusaj.

³⁴ Kunanqa israelitakunata pusay, maymanchus pusanaykita nerqayki, chayman. Noqaj angelniytaj pusasonqa. Chaywanpis jasut'inay p'unchay chayamojtin, noqa paykunata juchankumanta jasut'isaj, nispa.

³⁵ Chaypacha Tata Diosqa israelitakunata wañuchej onqoywan jasut'erqa, Aarón waka uña lanti ruwasqanta yupaychasqankumanta.