Éxodo 28 - DIOSPA QHELQACHISQ

Sacerdotekunapaj p'acha

¹ Tata Dios Moisesta ujtawan nillarqataj: Wawqeyki Aaronta, churinkuna Nadabta, Abiuta, Eleazarta, Itamarta ima qanman jamunankuta niy. Paykunata sacerdoteykuna kanankupaj israelitakuna ukhumanta t'aqanki.

² Wawqeyki Aaronpajqa Diospaj t'aqasqa sacerdotepaj jina, sumaj p'achata ruwapunki, ima munay, manchay k'achitu rikukunanpaj.

³ Chaypajqa yachayniyojkunawan parlay, pikunamanchus yachayta, yuyayta qoni, chaykunawan. Paykuna Aaronpaj p'achata ruwaponqanku, noqapaj t'aqasqa sacerdotey kananpaj.

⁴ Kay jina p'achakunata ruwanqanku: Pecherata, unkuta, poncho jina qhatanata, pallayniyoj p'achata, linomanta ch'uluta, pallayniyoj chumpitawan. Ajina sumaj p'achakunata wawqeyki Aaronpaj, churinkunapajwan ima ruwapunkichej, sacerdoteykuna jina imachus ruwanankuta ruwanankupaj.

⁵ Chay p'achakuna ruwasqa kanqa qorimanta ruwasqa q'aytumanta, anqa telamanta, puka telamanta, puka panti telamanta, t'ullkusqa linomantawan ima.

Unku

⁶ Unkutaqa k'acha pallayniyojta ruwanqanku, qorimanta ruwasqa q'aytumanta, anqa telamanta, puka panti telamanta, pukamanta, t'ullkusqa linomantawan ima.

⁷ Chaytaj sacerdote kunkanman wataykukunanpaj puraj kantunpi iskay watanayoj kanqa.

⁸ Unkuta watakunanpaj, sumaj pallayniyoj chumpeqa unkuwan ujlla kanqa, chaytaj anqa telamanta, puka panti telamanta, puka telamanta, t'ullkusqa linomantawan ruwasqa kanqa.

⁹ Chantá iskay ónice rumita jap'ispa, chayman Israelpata churinkunaj sutinkuta qhelqanki.

¹⁰ Uj kaj rumiman sojta sutita qhelqanki, uj kajmantaj sojtata. Paqarisqankuman jina qhelqanki.

¹¹ Rumikunapi Israelpa churinkunaj sutinta qhelqanqa jaluchukunata ruwayta yachaj, jinataj sellota jina ruwanqa. Chaymantaqa chay rumikunata qorimanta ruwasqa jap'ichinawan chhitaranki.

¹² Chantá iskaynin rumikunata unkuta watanaman churanki, israelitakunamanta yuyarikuna rumi kananpaj. Ajinata Aaronqa Tata Diospa ñawpaqenpi sayaspa, sapa lijranpi israelitakunamanta yuyarikunanpaj sutinkuta apanqa.

¹³ Rumi jap'ichinataqa qorimanta ruwanki.

¹⁴ Jinallataj sumaj qorimanta iskay ñañu cadenata ruwanki. Chantá cadenakunata lliphipishaj rumikunaman jap'ichinki.

Pecherata ruwanamanta

¹⁵ Pecheratapis unkuta jinallataj ruwanki. Pecherataqa imachus justiciata ruwanapaj tiyan, chaykunayojta ruwanki. Chantá qorimanta ruwasqa q'aytuwan k'acha pallayniyojta ruwanki, jinallataj anqa telamanta, puka pantimanta, pukamanta, t'ullkusqa linomanta ima ruwanki.

¹⁶ Chaytaqa tawantin ladoman kikinta, q'empisqata ruwanki. Unkoqa sayt'unman, anchonman ima iskay chunka iskayniyoj centimetroyojkama kanqa.

¹⁷ Pecheraj patanmantaj lliphiririshaj rumikunawan tawa sinruta chhitanki. Ñawpaj kaj sinrupi kanqa: Sárdica rumimanta uj, topacio rumimanta uj, esmeralda rumimantataj uj.

¹⁸ Iskay kaj sinrupitaj kanqa: Rubí rumimanta uj, zafiro rumimanta uj, diamante rumimantataj uj.

¹⁹ Kinsa kaj sinrupitaj kanqa: Jacinto rumimanta uj, ágata rumimanta uj, amatista rumimantataj uj.

²⁰ Tawa kaj sinrupitaj kanqa: Berilo rumimanta uj, ónice rumimanta uj, jaspe rumimantataj uj. Tukuy rumikuna qorimanta jap'ichinawan jap'ichisqa kanqanku.

²¹ Chunka iskayniyoj rumi kanan tiyan, imajtinchus Israelpata churinkunaqa chunka iskayniyoj kanku. Sapa rumipi uj jatun aylloj sutin t'illmisqa kanqa.

²² Chaymantaqa pecherapaj sumaj qorimanta ñañu cadenata ruwanki, watanata jina t'ullkusqata.

²³ Ruwallankitaj qorimanta iskay ninrikunata, chaytataj pecheraj sapa kantunman chhitanki.

²⁴ Chantá qorimanta ñañu cadenataqa pecheraj puraj ladonpi ninrinman watanki.

²⁵ Cadenakunaj puntantaqa unkupi iskaynin jap'ichinaman churanki, chantataj unkoj ñawpaqenman lijraman watana chaynejman jap'ichinki.

²⁶ Chantá ruwallankitaj qorimanta iskay ninrita, chaytataj pecheraj ura kantunman churanki, ukhunejman unkoj qayllanpi kashan, chaynejman.

²⁷ Ruwallankitaj qorimanta iskay ninritawan, chaytataj unkuta watanaj ñawpaqenman chhitanki, sirayninpa uranman, chumpinmanta tumpa patannejman.

²⁸ Chantá pecheraj ninrinkuna, unkoj ninrinkunawan ima anqa q'aytuwan ujllaman t'inkisqa kanqanku. Ajinamanta unkoj chumpin patanejpi kanqa, ama pechera unkumanta t'aqasqa kananpaj.

²⁹ Aaronqa Dioswan Tinkukuna Toldoman sapa kuti yaykuspa qhasqonpi k'askachisqata apanqa, pecheraj patanpi Israelpata churinkunaj sutinku qhelqasqata, chantá justiciata ruwanapaj imakunatawan ima. Ajinamanta Tata Diospa ñawpaqenpi israelitakuna yuyarisqa kanqanku.

³⁰ Jinallataj pecheraman Urimta, Tumimtawan churanki, Aarón Tata Diospa ñawpaqenman qayllaspa, qhasqonpi apananpaj. Ajinata Aaronqa Tata Diospa ñawpaqenpi qhasqonpi apallanqapuni, israelitakunapaj Tata Dios imatachus nisqanta yachananpaj.

³¹ Jinallataj unkupaj anqa telamanta uj poncho jina qhatanatawan ruwanki.

³² Poncho jina qhatanaqa khuskannejpi uma yaykunanpaj jina khallayoj kanqa. Khallasqata q'empispa siraykunki, qaramanta ruwasqa chalecota jina ama llik'ikunanpaj.

³³ Ponchoman rijch'asqa qhatanaj muyuyninmantaj churanki, granadaman rijch'akojta ruwaspa, anqa telamanta, puka telamanta, puka panti telamantawan ima. Chaypaj chawpinmantaj qorimanta campanillata warkhuranki.

³⁴ Qorimanta campanillaj chawpinman uj granadata churanki, ajinata poncho jina qhatanaman tukuy muyuynintinman chhitaykunki.

³⁵ Aaronqa chay ponchoman jina qhatanata churaykukuspa, sacerdote jina imachus ruwananta ruwanqa. Dioswan Tinkukuna Toldopi Tata Diospa ñawpaqenman yaykushajtin, jinataj chaymanta llojsimushajtin, campanillaj sonasqan uyarikonqa, ama wañunanpaj.

³⁶ Jinallataj sumaj qorimanta sillp'a tablitata jina ruwanki, chantá sellasqata jina qhelqanki: Tata Diospaj t'aqasqamin, nispa nishajta.

³⁷ Chaytataj anqa q'aytuwan, chhoqo ch'uloj ñawpaqenman sumajta wataspa warkhuykunki.

³⁸ Qorimanta sillp'a tablitaqa Aaronpa mat'inpi kallanqapuni, Tata Dios israelitakunaj jaywasqankuta jap'ikunanpaj. Ajinamanta israelitakuna Tata Diosman jaywashajtinku, Aaronqa juchallisqankuta apanqa.

Waj sacerdotekunapaj p'acha

³⁹ Sacerdotekuna churakunankupaj p'achata, jinataj ch'ulutapis lino q'aytumanta awaspa ruwanki. Chumpitapis ima munay pallayniyojta awanki.

⁴⁰ Aaronpa churinkunapajqa sumaj p'achata, chumpita, ch'ulutawan ruwapunki, sacerdote jina p'achallikunankupaj, chantá ima munay, manchay k'achitu rikukunanpaj.

⁴¹ Ajinata wawqeyki Aaronta, churinkunatawan ima p'achallichinki. Chaymantataj umankuta aceitewan jawispa, sacerdoteykuna kanankupaj t'aqapuwanki.

⁴² Jinallataj linomanta calzoncillokunata ruwapunki, ñañu wasankumantapacha moqonkukama pakananpaj.

⁴³ Aarón, jinataj churinkunapis chay p'achakunata churaykukonqanku, Dioswan Tinkukuna Toldoman yaykunankupaj, chayrí toldopi kaj altarman chimpanankupaj, sacerdote jina imachus ruwanankuta ruwashaspa. Manachus chayta sapa kuti ruwanqanku chayqa, noqa juchachaspa, paykunata wañuchisaj. Kay kamachisqayqa Aaronpaj, jinataj mirayninpaj ima wiñaypaj kanqa.