Éxodo 27 - DIOSPA QHELQACHISQ

Broncemanta altar

¹ Ruwallankitaj acaciamanta uj altarta, chay altarqa tawa esquinayoj kanqa. Altarqa sapa ladoman iskay metro cuartayoj kanqa, sayayninmantaj uj metro cuartayoj.

² Altarpa tawantin esquinapi mut'u wajrata jina ruwallankitaj, chay altartataj tukuyninta broncewan lluch'iykunki.

³ Altarpi imachus ruwanata ruwanapaj imakunataqa, tukuyninta broncemanta ruwanki: Ushpha oqharinata, palakunata, jatuchaj qerukunata, trinchekunata, nina k'ajata apaykachanatawan.

⁴ Chantá broncemanta uj rejillata ruwallankitaj. Chay rejillaj tawantin esquinamantaj broncemanta ruwasqa ninrita churanki.

⁵ Rejillataqa altarpa uranman churanki, altarpa khuskanninpi jina kananpaj.

⁶ Jinallataj altarta wantunapaj, acaciamanta k'aspikunata ruwallankitaj, jinaspataj broncewan lluch'iykunki.

⁷ Chantá chay k'aspikunataqa altarpa ninrinnejta pasachinki, altarpa sapa kantunpi kananpaj, chaymanta oqharispa, altarta wantunapaj.

⁸ Altartaqa maderamanta ruwanki, ukhuntaj soqolla kanqa. Imaynatachus orqopi rikucherqayki, kikisitunta ruwanki.

Dioswan Tinkukuna Toldoj pation

⁹ Dioswan Tinkukuna Toldopaj patiota ruwallankitaj. Uray kantunpi t'ullkusqa linomanta ruwasqa cortinayoj kanqa. Cortinaqa sayt'unman tawa chunka phishqayoj metro kanqa.

¹⁰ Iskay chunka k'aspikunaqa, broncemanta ruwasqa iskay chunka chuku patapi sayachisqa kanqa. Ganchonkuna, ninrinkuna imaqa qolqe metalmanta ruwasqa kanqanku.

¹¹ Jinallataj pata kaj ladonpi cortinapis tawa chunka phishqayoj metro kanqa. Broncemanta ruwasqa iskay chunka chuku patapitaj, iskay chunka k'aspikuna sayachisqa kanqa. K'aspikunaj ganchon, ninrin imaqa qolqe metalmanta ruwasqa kanqa.

¹² Inti yaykuynejman patioqa iskay chunka iskayniyoj metro khuskanniyoj kanqa, cortinapis ajinallataj kanqa. K'aspikunaqa chunka kanqa, jinallataj k'aspi sayananpaj chukukunapis chunkallataj kanqa.

¹³ Inti llojsimuynejman patioj kinrayninpi cortina kallanqataj iskay chunka iskayniyoj metro khuskanniyoj.

¹⁴ Punkumanta uj ladonman cortinaqa qanchis metro khuskanniyoj kanqa, kinsa k'aspiyoj, kinsa chukuyoj ima.

¹⁵ Uj ladonpi cortinapis kikillantaj kanqa, kinsa k'aspiyoj, kinsa chukuyoj ima.

¹⁶ Patioman yaykuna punkupi cortinaqa jisq'on metroyoj kanqa. Anqamanta, puka pantimanta, pukamanta, t'ullkusqa linomanta ruwasqa kanqa. Chay cortinaqa ima munay pallayniyoj awasqa kanqa. Chay jawa tawa k'aspiyoj, tawa chukuyoj ima kallanqataj.

¹⁷ Patiota muyurej tukuy k'aspeqa qolqe metalmanta ninriyoj, qolqe metalmanta ganchoyoj, chantá broncemanta chukuyoj ima kanqanku.

¹⁸ Patioqa sayt'unman tawa chunka phishqayoj metro kanqa, kinrayninmantaj iskay chunka iskayniyoj metro khuskanniyoj kanqa, ujnin ladonpis jinallataj kanqa. Sayayninmanqa iskay metro cuartayoj kanqa. Cortinaqa t'ullkusqa linomantapuni kanqa, chukuntaj broncemanta ruwasqa.

¹⁹ Dioswan Tinkukuna Toldopi Diosta yupaychanapaj tukuy imaqa broncellamantapuni kanqa. Jinallataj tukuynin estaca, patiopi estacapis broncemanta ruwasqallataj kanqa.

Lamparakunata k'anchachinapaj aceite

²⁰ Israelitakunata kamachiy lamparakunata k'anchachinapaj olivomanta ruwasqa sumaj aceiteta apamunankuta. Lamparakunaqa tuta p'unchay k'anchanan tiyan.

²¹ Aaronwan, churinkunawan ima lamparakunata allinchanqanku. Chantá lamparakunata churanqanku Dioswan Tinkukuna Toldopi, arcaj ñawpaqenpi kashan, chay velomanta jawaman, noqaj ñawpaqeypi tuta p'unchay k'anchananpaj. Kay kamachisqayqa israelitakunapaj, mirayninkupajwan ima wiñaypaj kanqa.