Éxodo 26 - DIOSPA QHELQACHISQ

Dioswan Tinkukuna Toldo

¹ Tata Dios nillarqataj: Dioswan Tinkukuna Toldotaqa linomanta sumaj awasqa, chunka cortinayojta ruwanki. Chay cortinaj colornintaj kanqa, anqa, puka, puka panti ima kanqa. Cortinata awashaspa k'achanchananpaj, iskay querubín pallayniyojta awanki.

² Tukuynin cortinakunaqa uj rejlla kanqanku: Sayt'unmanqa chunka iskayniyoj metro khuskanniyoj kanqa, kinrayninmantaj iskay metro kanqa.

³ Phishqa cortinakunataqa ujllaman siraykunki, jinallataj chay ujnin phishqa kaj cortinakunatapis ujllaman siraykullankitaj.

⁴ Ñawpaj kaj sirasqayki cortinaj puntanmanqa anqa q'aytumanta ninrikunata churanki, jinallataj iskay kaj k'askachisqaykej puntanpipis.

⁵ Ñawpaj kaj sirasqaykej puntanpeqa phishqa chunka ninrikunata ruwanki, qhepan kajpipis kikillantataj, jinamanta ninripura tinkunankupaj.

⁶ Ruwallankitaj qorimanta phishqa chunka ganchokunata, sirasqayki purajmanta t'inkisqa kananpaj, jinamanta Dioswan Tinkukuna Toldo ujlla sayarinanpaj.

⁷ Chaymantaqa Dioswan Tinkukuna Toldota qhatanapaj cabra millmamanta chunka ujniyoj bayetata awallankitaj.

⁸ Tukuynin bayetaqa chhikachajkama kanqanku: Sayt'unman chunka kinsayoj metro khuskanniyoj kanqa, kinrayninmantaj iskay metro kanqa.

⁹ Phishqa bayetakunataqa ujllaman t'inkiykunki. Chaymanta wajtataj sojta bayetakunata ujllaman t'inkiykullankitaj. Sojta kaj bayetataqa Dioswan Tinkukuna Toldoj ñawpaqenpi uraman q'empiykunki.

¹⁰ Ñawpaj kaj t'inkisqayki cortinaj kantunpi phishqa chunka ninrita ruwanki. Jinallatataj iskay kaj t'inkisqayki cortinaj kantunpipis ruwanki.

¹¹ Chaymanta ruwallankitaj broncemanta phishqa chunka ganchokunata. Chantá chay cortinaj ninrikunaman chhitaranki, ajinamanta toldoqa ujlla kananpaj.

¹² Toldoj cortinankuna kurajyajtaqa khuskanta Dioswan Tinkukuna Toldoj wasanman warkhuykunki.

¹³ Cortinamanta sapa puntanman phishqa chunka centímetro puchojqa Dioswan Tinkukuna Toldota puraj ladonmanta qhatanqa.

¹⁴ Toldota qhatanaykipaj cordero qarata pukaman tiñispa, uj qhatanata ruwallankitaj. Chaypaj pataman qhatanaykipajtaj waj animalkunaj sumaj kaj qaranmanta uj qhatanatawan ruwallankitaj.

¹⁵ Jinallataj Dioswan Tinkukuna Toldota sayachinaykipajqa acacia maderamanta tablakunata ruwanki, chaytataj cheqanta sayachinki.

¹⁶ Sapa tabla sayt'unman tawa metro khuskanniyoj kanqa, kinrayninmantaj sojta chunka phishqayoj centímetro kanqa.

¹⁷ Sapa tablaqa purajmanta tarukiyasqa kanqa, chaywan t'inkinasqa kananpaj. Ajinata Dioswan Tinkukuna Toldopaj sapa tablata ruwanki.

¹⁸ Toldopaj tablakunata ruwaspaqa, uranejpaj iskay chunka tablakunata ruwanki.

¹⁹ Iskay chunka tablakunapaj, qolqe metalmanta tawa chunka chukuta ruwanki. Sapa tablapaj iskay chuku kanqa, jinataj sapa tablaj tarukun yaykunanpaj jina jusk'uyoj kanqa.

²⁰ Jinallataj toldomanta patanej kaj ladonpaj, iskay chunka tablakunata ruwallankitaj,

²¹ qolqe metalmanta tawa chunka chukutawan. Iskay chukutataj uj tablaj uranpaj ruwanki.

²² Toldoj qhepanman sojta tablakunata churanki, chayqa Dioswan Tinkukuna Toldomanta inti yaykuynejpi kashan.

²³ Dioswan Tinkukuna Toldoj qhepan kaj esquinanpaj iskay tablakunatawan ruwallankitaj.

²⁴ Chay tablakunaqa uramantapacha, jinallataj patamantapis, ñawpaj kaj ganchowan t'inkinasqa kanqa. Qhepannejpi, iskaynin esquinapipis jinallataj kanqa.

²⁵ Tukuyninpi pusaj tabla kanqa. Qolqe metalmanta ruwasqa, chunka sojtayoj chukupi kanqa. Iskay chuku uj tablaj uranpi kanqa.

²⁶ Chaymantaqa acacia maderamanta phishqa k'aspikunata ruwallankitaj, Dioswan Tinkukuna Toldomanta uj lado tablakunapaj.

²⁷ Jinallataj phishqa k'aspikunata ruwanki uj ladon tablakunapaj, phishqatataj qhepannejpaj, inti llojsimuynejta qhawarisqa kashan, chaypaj.

²⁸ Chawpita rej k'aspeqa tablakunaj chawpinta, uj kantunmanta uj kantunkama llojsenqa.

²⁹ Chantá tablakunataqa tukuyninta qoriwan lluch'inki. Jinallataj qorimanta ninrikunata ruwallankitaj, chay ninrikunanejta k'aspikunata pasachinaykipaj. K'aspikunatapis qorillawantaj lluch'iykunki.

³⁰ Dioswan Tinkukuna Toldotaqa, imaynatachus kay orqopi rikuchiyki, kikinta ruwanki.

³¹ Jinallataj t'ullkusqa linomanta uj velota awanki, colornintaj anqa, puka, puka panti ima kanqa. Chay velotataj iskay querubinkunaman rijch'asqa pallayniyojta awanki.

³² Chay velota acacia maderamanta ruwasqa tawa sayantaman warkhuykunki. Chay sayantakunataj qoriwan lluch'isqa kanan tiyan. Sayantakunataqa qolqe metalmanta ruwasqa tawa chuku patapi sayachinki.

³³ Velotaqa ganchokunaj uranman warkhunki. Veloj wasanmantaj Diospa kamachisqan qhelqawan kashan, chay arcata churanki. Jinamanta veloqa “Diospaj T'aqasqa Cheqata”, “Diosllapaj T'aqasqa Cheqamanta” t'aqanqa.

³⁴ Chaymantataj Diosllapaj T'aqasqa Cheqapi Arcaj kirpananta churanki.

³⁵ Mesatataj velomanta jawaman churanki, Dioswan Tinkukuna Toldoj pata ladonnejman. Candelerotatajrí Dioswan Tinkukuna Toldoj uranejman, mesaj chimpanpi churanki.

³⁶ Dioswan Tinkukuna Toldoj punkunta wisq'anapajtaj, t'ullkusqa linomanta uj cortinata ruwanki. Cortinaj colornintaj kanqa anqa, puka, puka panti ima. Cortinataj sumaj pallayniyoj awasqa kanqa.

³⁷ Cortinata warkhunaykipajqa acacia maderamanta phishqa k'aspita ruwanki, chaykunatataj qoriwan lluch'iykunki. K'aspikunaqa sapa uj qorimanta ruwasqa ganchoyoj kanqa. K'aspikunata sayachinapajtaj, broncemanta phishqa chukuta ruwanki.