Éxodo 23 - DIOSPA QHELQACHISQ

Justicia ruwanapaj kamachisqakuna

¹ Tata Dios israelitakunata kamachillarqataj: Ama llullakuspa imatapis parlallankichu. Amataj millay runawan yachachinakunkichu, llullakuspa parlanaykipaj.

² Ama mana allin kajta ruwanaykipaj ashkha runaj nisqanta qhatinkichu. Amallataj quejapi ashkha runaj nisqankuwan apachikunkichu, imachus cheqan kajta q'ewinaykipaj.

³ Amallataj quejapi wajcha runa kasqanraykulla sayakunkichu.

⁴ Sichus awqaykej chinkasqa wakanta, chayrí burronta tarinki chayqa, qhaterqapuy.

⁵ Sichus awqaykej burron cargawan ñit'isqa kaspa urmajta rikunki chayqa, ama qhawakullankichu, astawanqa sayarichiyta yanapanki.

⁶ Wajcha runaj quejakusqanmanqa justiciata cheqanta ruwanki.

⁷ Ama pitapis llullakuspa tumpankichu. Amallataj mana juchayoj runata wañuchichinkichu, imajtinchus pichus juchayojpa juchanta mana pampachasajchu.

⁸ Ama lluk'ichikunkichu, imaraykuchus lluk'i jap'ikoyqa allin sonqoyoj runata pierdechin, jinallataj mana juchayojta, juchayojta rikhurichin.

⁹ Waj llajtayojta ama waqachinkichu, imajtinchus qanpis Egiptopi waj llajtayoj jina karqanki. Chayrayku runaj llajtanpi tiyakuy imachus kasqanta yachallanki.

Samarinamanta kamachisqakuna

¹⁰ Sojta watata jallp'aykipi tarpunki, poqosqantapis oqharinki.

¹¹ Qanchis kaj watapitaj jallp'aykita samarichinki, ama tarpunkichu. Sichus payllamanta p'utuspa poqonman chayqa, wajcha runa mikhunanpaj kanqa, puchojtaj uywakuna mikhunankupaj kanqa. Ajinallatataj uva huertaykiwan, olivo sach'aykiwan ima ruwanki.

¹² Sojta p'unchayta llank'anki, qanchis kaj p'unchaypitaj samarinki, wakayki, burroyki samarinankupaj. Ajinata ruwanki wata runayki kallpanman kutirinanpaj, jinallataj waj llajtayoj runapis.

¹³ Tukuy kamachisqayta kasuychej. Ama jayk'ajpis waj dioskunaman k'umuykuychejchu, nitaj sutillankutapis oqharinkichejchu.

Kinsa jatuchaj raymikuna

¹⁴ Sapa watapi kinsa kutita sutiypi jatun raymita ruwapuwankichej.

¹⁵ Mana Levadurayoj T'anta raymita ruwankichej. Imaynatachus nisusqayman jina, qanchis p'unchayta mana levadurayoj t'antata mikhunkichej. Chaytaqa Aviv killapi mikhunkichej, imaraykuchus chay killapi Egiptomanta llojsimorqankichej. Amataj pipis noqaman ch'usaj makilla jamuwanqachu.

¹⁶ Chantá tukuy tarpusqaykichejmanta Ñawpaj Kaj Poqojta Oqharina raymitapis ruwallankichejtaj. Jinallataj Chajra Poqoyta Oqharina Tukukuy raymitapis.

¹⁷ Tukuy qharikunaqa watapi kinsa kutita Tukuyta Kamachej Tata Diospa ñawpaqenpi rikhurinanku tiyan.

¹⁸ Uywa ñak'asqa jaywanata qoshawaspa, ama yawarninta, levadurayoj t'antatawan khuska jaywawankichejchu. Amallataj wiranta q'ayantinkama jallch'ankichejchu.

¹⁹ Jallp'aykej ñawpajta poqosqanmanta sumajnin kajta Tata Diosniykej wasinman apamunki. Cabra uñataqa ama mamanpa lechenpi chayachinkichu.

Diospa angelnin israelitakunata pusan

²⁰ Noqa angelniyta kachamusaj, ñanta rishajtiyki waqaychasunanpaj, qankunapaj wakichipusqay jallp'amantaj chayachisunaykichejpaj.

²¹ Paypa nisqanta uyarispa kasukuy, amataj mana uyarikuyta munajqa kaychu. Payqa noqaj sutiypi ruwanqa, mana uyarikoj kasqaykitataj mana pampachanqachu.

²² Sichus cheqatapuni payta kasunki chay, tukuy nisqantataj ruwanki chayqa, noqa awqaykej awqan kasaj. Pichus contraykipi sayaykusojman noqa sayaykullasajtaj.

²³ Angelniy ñawpaqeykichejta rispa, amorreoj suyunman pusaykusonqachej, jinallataj jeteoj suyunman, ferezeojpaman, cananeojpaman, heveojpaman, jebuseojpaman ima pusaykullasonqachejtaj. Noqa paykunata ni uj puchuyojta chinkachisaj.

²⁴ Ama chay runakuna jina ruwankichejchu. Amallataj diosninkukunaman qonqorikunkichejchu, nitaj yupaychankichejchu. Manachayqa lantinkuta yupaychana ruminkutapis phirinkichej.

²⁵ Qankunaqa noqa Tata Diosnillaykichejta yupaychawankichej, noqataj mikhunata, yakutapis may chhikata qosqaykichej. Tukuy onqoymantataj qankunata jark'asqaykichej.

²⁶ Unayta kawsachisqayki. Llajtaykipeqa onqoj kashaspa, sulluj warmi mana kanqachu, nitaj mana wawayoj kayta atejpis kallanqatajchu.

²⁷ May llajtamanchus chayankichej, chaypi tiyakojkunata noqa manchachisaj, awqaykichejkunataj qankunamanta ayqenqanku.

²⁸ Ñawpaqeykichejta wayronqokunata kachaykusaj, heveokunata, cananeokunata, heteokunatawan ima ayqechinankupaj.

²⁹ Chay llajtayojkunataqa mana uj watallapichu wijch'usaj, ama chay jallp'a ch'inman tukunanpaj, nitaj k'ita animalkunapis miraykuspa manchachisunankupaj.

³⁰ Pisimanta pisi paykunata qharqosaj, qankuna ashkhata miraspa jallp'ata jap'inaykichejpaj jina kanaykichejkama.

³¹ Jallp'aykichejpa mojonnenqa ajina kanqa: Puka Mama Qochamantapacha, filisteokunaj mama qochankukama. Chantá ch'innejmantapacha Éufrates mayukama kanqa. Chay jallp'api tiyakojkunata makiykichejman churaykusaj, qankunataj paykunata qharqonkichej.

³² Ama paykunawanqa ni ima tratota ruwankichejchu, nitaj diosninkuwanpis.

³³ Paykunatachus llajtaykipi tiyakojta saqellanki chayqa, noqaj contrayta juchallichisunkiman. Ama llajtaykipi jap'ikuychu, imaraykuchus diosninkuta yupaychanaman qokuwaj, chaytaj llakiynillaykipaj kanman, nispa. Ajinata Tata Dios israelitakunata nerqa.