Éxodo 22 - DIOSPA QHELQACHISQ

Kutichipunamanta kamachisqakuna

¹ 1 (21.37) Sichus pipis bueyta, chayrí ovejata suwaspa ñak'anman, chayrí vendenman chayqa, pichus uj bueyta suwaj phishqa bueyta kutichipunan tiyan, uj ovejamantarí tawata.

² 2 (1) Sichus pipis uj suwata wasi punkuta k'ampashajta jap'inman, chay suwata maqaspataj wañuchinman chayqa, pichus wañuchej mana juchayojchu kanqa.

³ 3 (2) Sitajchus p'unchay wañuchinman chayrí, pichus wañuchej juchayoj kanqa. Pichus suwashaspa jap'ichikojrí suwasqanpa valorninta kutichipunan tiyan. Mana qolqen tiyapunmanchu chayrí, pay kikin vendesqa kanqa, chay qolqewan suwakusqanmanta junt'ananpaj.

⁴ 4 (3) Sichus suwaj makinpi uywata kawsashajllataraj taripankuman chayqa, suwaqa uywayojman uj jinatawan kutichipunan tiyan. Kachun waka, oveja, chayrí burro.

⁵ 5 (4) Sichus pipis qallpapi, chayrí uva huertapi uywanta michinanpaj kacharinman chayqa, uywankunataj wajpa pastonpi chayrí uva huertanpi dañukamunkuman chayqa, uywayoj chajranmanta, chayrí uva huertanmanta aswan sumaj kajwan kutichipunan tiyan.

⁶ 6 (5) Ichapis pipis khishkata ruphachinanpaj ninata jap'ichinman, ninataj atipaykuspa wajpa chajranman jap'iykukuspa, trigo marq'ata, chayrí manaraj ruthusqa trigota ruphaykunman chayqa, ruphaykusqanmanta chajrayojman pagapunan tiyan.

⁷ 7 (6) Sichus pipis runa masinman qolqeta, chayrí imatapis jap'ichikunman chayqa, chay runataj wasinmanta suwachikunman chayqa, pichus suwakushajta jap'ichikoj uj jinatawan kutichiponqa.

⁸ 8 (7) Sichus suwata mana jap'inkumanchu chayrí, wasiyojta Diospa ñawpaqenman pusachunku, runa masinpa saqekusqanta mana paychu suwasqanmanta yachakunanpaj.

⁹ 9 (8) Sichus pipis pejpa chinkachikusqan wakanta, burronta, ovejanta, p'achanta, chayrí imallantapis jap'ikapunman chayqa, dueñontaj rikhurimuspa mañapunman chayqa, iskayninku Diospa ñawpaqenman rinanku tiyan. Pichus juchayoj llojsejqa dueñonman uj jinatawan kutichipunan tiyan.

¹⁰ 10 (9) Sichus pipis runa masinman qhawapunanpaj jap'ichikunman burronta, wakanta, ovejanta, chayrí waj uywantapis, chay uywataj qhawajpa makinpi wañunman, chayrí imanasqapis rikhurinman, chayrí mana pipis rikushajtin suwankuman chayqa,

¹¹ 11 (10) pichus qhawapunanpaj jap'ejqa Tata Diospa sutinrayku tilonqa, mana pay chay uywata pakasqanta. Uywayojtaj cheqanta nishasqanta creenan tiyan, manataj runa masinmanta pagachikaponqachu.

¹² 12 (11) Sitajchus uywata qhawaj rikushajtin suwankuman chayqa, uywayojman pagapunan tiyan.

¹³ 13 (12) Sichus jap'ichikusqan uywata atojpis, chayrí leonpis mikhuykunman chayqa, puchusqanta uywayojman rikuchenqa, qhawajtaj uywayojman mana kutichenqachu.

¹⁴ 14 (13) Sichus pipis runa masinmanta ima uywallatapis mañakunman, chay uywataj makinpi wañunman, chayrí imanakunman, uywayoj mana rikushajtin, jinachus kanman chayqa, pichus mañakoj chay uywamanta pagapunan tiyan.

¹⁵ 15 (14) Sichus uywayoj rikushajtin, uywan wañunman chayrí, pichus mañakoj mana pagananchu tiyan. Mashkhamantachus fletakorqa, chayllata pagaponqa.

Runapura allinta kawsanapaj kamachisqakuna

¹⁶ 16 (15) Sichus pipis qharita mana rejsej sipasta q'otiyaspa, paywan puñuykunman chayqa, chay sipakutaj mana mañaqasqachu kanman karqa chayqa, pichus honranta t'akaj sipaspa tatan mamanman mana qharita rejsej sipasmanta mashkhachus paganata paganqa. Chantá paywan casaranqa.

¹⁷ 17 (16) Sichus sipaspa tatan mana casarachiyta munanmanchu chayqa, pichus honranta t'akajqa usuman jina qharita mana rejsej sipasmanta mashkhachus paganata paganan tiyan.

¹⁸ 18 (17) Layqayta yachaj warmitaqa wañuchinkichejpuni.

¹⁹ 19 (18) Tukuy pichus uywawan t'inkinakojqa wañuchisqa kanqa.

²⁰ 20 (19) Pichus uywa ñak'asqata Tata Diosllaman jaywananta, waj dioskunallaman jaywajqa wañuchisqa kanqa.

²¹ 21 (20) Waj llajtayojtaqa ama ñak'arichinkichejchu, nitaj waqachinkichejchu, imaraykuchus qankunapis Egipto suyupi waj llajtayoj jina karqankichej.

²² 22 (21) Ama warmisapakunata nitaj wajcha wawakunatapis waqachinkichejchu.

²³ 23 (22) Sichus paykunata waqachinkichej, paykunataj noqaman qhaparikamuwanqanku chayqa, noqa uyarisaj.

²⁴ 24 (23) Chantá phiñakuyneyqa qankunaj contraykichejta k'ajarenqa, espadawantaj wañuchisqaykichej. Qankunaj warmiykichejtaj warmisapa rikhurenqanku, wawaykichejkunapis mana tatayoj rikhurenqanku.

²⁵ 25 (24) Sichus aylluy ukhupi kaj wajcha runaman qolqeta mañarinki chayqa, ama qolqe manoj runa jinachu paywan kanki, nitaj qolqe interestapis mañankichu.

²⁶ 26 (25) Sichus wajcha runa p'achanta prendata jina saqesunki chayqa, manaraj inti yaykushajtin p'achanta kutichipunki.

²⁷ 27 (26) Ajinata ruwanki, imaraykuchus ukhunta mayt'ukunanpaj chaylla tiyapun. Mana kutichipojtiyki, imawantaj qhataykukonqari? Paychus qhaparikamuwanqa chayqa, noqa uyarisaj, imaraykuchus noqaqa khuyakuyta yachajmin kani.

²⁸ 28 (27) Ama Diospa contranpi rimankichu, nitaj pichus llajtaykita kamachejta maldicinkichu.

²⁹ 29 (28) Chajra poqoyta oqharisqaykimanta, jinataj vinota ruwasqaykimanta ofrenda qonawaykita ama qonqankichu. Jinallataj kuraj kaj churiykitapis qopullawankitaj.

³⁰ 30 (29) Chantapis wakaykimanta, ovejaykimanta phiwi uñanta apamuwanki. Phiwi uñaqa qanchis p'unchayta mamanwan kanqa, pusaj kaj p'unchaypitaj noqaman qopuwanki.

³¹ 31 (30) Qankunaqa noqapaj t'aqasqa runakuna kankichej. Ama atoj, chayrí leonpa jap'isqan aychata mikhunkichejchu. Chaytaqa alqoman qopunkichej.