Éxodo 2 - DIOSPA QHELQACHISQ

Moisés paqarin

¹ Chaypacha Leví jatun ayllumanta uj qhari, chay ayllullamantataj uj sipaswan casarakorqa.

² Warmin wijsallikusparí, uj qhari wawata paqarichikorqa. K'achitu wawa kasqanta rikuspataj, mamanqa kinsa killata pakayllapi uywarqa.

³ Chantá wawitaj maman manaña astawan pakayta atispa, t'uturamanta canastata ruwarqa, ama yaku yaykunanpajtaj maphawan llut'aykorqa. Chayman wawata churaykuspataj, Nilo mayu kantupi t'utura chawpiman churaykamorqa.

⁴ Chaywanpis wawaj panan karunejllamanta qhawasharqa, wawawan imachus kananta yachananpaj.

⁵ Chay qhepata faraonpa ususin mayllakoj mayuman urayk'orqa. Sipas kamachinkuna mayu kantuta puriykachashanankukamataj, faraonpa ususin t'utura chawpipi tuytushaj uj canastata rikorqa. Chantá ujnin kamachinwan chay canastata orqhochimorqa.

⁶ Paytaj canastata qhawaykuspa, wawata waqashajta rikorqa. Chantá faraonpa ususin wawamanta khuyakuspa, nerqa: Kayqa israelitakunaj wawanku, nispa.

⁷ Jinallapi chay wawaj pananqa faraonpa ususinman qayllaykuspa, nerqa: Kay wawata chuchuchispa uywapusunanpaj, munawajchu uj israelita warmita wajyampusunayta? nispa.

⁸ Faraonpa ususintaj nerqa: Arí, riy wajyamuy, nispa. Chantá wawaj pananqa usqhay usqhayta rispa, mamallantataj wajyamorqa.

⁹ Chay warmi jamojtintaj, faraonpa ususin payta nerqa: Kay wawata uywampuway, noqataj uywasqaykimanta pagapusqayki, nispa. Mamantaj wawata apaspa, uywamorqa.

¹⁰ Chantá wawa jatunña kajtin, mamanqa wawata faraonpa ususinman apaporqa. Paytaj wawanpajpuni rejsikaporqa, suticharqataj “Moisés”, nispa, imaraykuchus pay nerqa: Yakumanta noqa orqhorqani, nispa.

Moisés Egiptomanta ayqekun

¹¹ Moisés ña yuyayninpiña kaspa, uj kuti israelita masinkunata waturikoj rerqa. Chantá sinch'i ruwanawan imaynatachus ñak'arichisqa kasqankuta rikorqa. Moisés rikullarqataj Egipto llajtayojqa uj llajta masin israelitata maqashajta.

¹² Jinapi Moisés tukuynejta qhawarerqa, manataj ni pipis kashasqanta rikuspa, Egipto llajtayojta wañurparicherqa. Jinaspataj, t'iyupi ayanta p'ampaykorqa.

¹³ Q'ayantin ujtawan rispa, Moisés iskay israelitakunatañataj maqanakushajta rikorqa. Chantá llajta masinta maqashajta nerqa: Imaraykutaj llajta masillaykitataj chay jinata maqashankiri? nispa.

¹⁴ Chay runarí Moisesta kuticherqa: Pitaj churasunki noqaykuta kamachinawaykupaj, juezniykutaj kanaykipajri? Imaynatachus Egipto llajtayojta wañucherqanki, jinatachu noqatapis wañuchiyta munashawanki? nispa. Moisés chayta uyarispa, mancharikorqa, nerqataj: Egipto llajtayojta wañurparichisqayqa yachakunña, nispa.

¹⁵ Jinataj karqa. Faraonqa Moisés egipciota wañuchisqanta yachaytawan, payta wañuchichinanpaj mask'achimorqa. Moisestaj faraonmanta ayqekuspa, Madianman riporqa. Madianman chayaspataj, uj yaku pujyu kantupi tiyarikorqa.

¹⁶ Chaypi tiyashajtin, Madianmanta sacerdote Reuelpa qanchis ususinkuna jamorqanku, yakuta bateaman orqhospa, tatankoj ovejankunata ujyachinankupaj.

¹⁷ Chaywanpis waj michejkuna chayamuspa, chay sipaskunata chaymanta qharqorqanku. Chayrayku Moisesqa sipaskunaman sayakuspa, chay michejkunamanta jark'arqa. Chaymantataj yakuta pujyumanta orqhospa, ovejakunata ujyacherqa.

¹⁸ Chantá sipaskuna wasinkuman chayapojtinku, tatanku Reuel taporqa: Imajtintaj kunan usqhayllata kutimunkichejri? nispa.

¹⁹ Paykunataj kuticherqanku: Chay waj michejkuna wijch'umushawajtiyku, Egipto llajtayoj uj runa kutikuwarqayku. Chantá pay kikin yakuta orqhospa, uywanchejman ujyacherqa, nispa.

²⁰ Jinapi Reuelqa ususinkunata nerqa: Maypitaj chay runa kashanri? Imaraykutaj saqerparinkichejri? Rispa, pusamuychej mikhunata jaywarinanchejpaj, nispa.

²¹ Jinamanta Moisesqa Reuelwan tiyakorqa. Qhepamantaj Reuelqa ususin Seforawan Moisesta casaraykucherqa.

²² Aswan qhepamantaj chay warmi uj wawata paqarichikorqa, Moisestaj wawanta “Gersón”, nispa suticharqa: Runaj llajtanpi kashani, nispa.

²³ Chaymanta aswan qhepanejman Egipto suyuta kuraj kamachej wañuporqa. Israelitakunatajrí, wata runa kasqankumanta waqarikuspa, qhaparikorqanku. Diostaj sinch'i ñak'arispa qhaparikusqankuta uyarerqa.

²⁴ Chantá israelitakunaj ayqospa qhaparikusqankuta uyarispa, Dios yuyarikorqa Abrahamwan, Isaacwan, Jacobwan ima tratota ruwasqanmanta.

²⁵ Chayrayku pay israelitakuna imaynatachus ñak'arishasqankuta rikuspa, paykunamanta khuyakorqa.