Éxodo 18 - DIOSPA QHELQACHISQ

Jetro Moisesta watukun

¹ Madianmanta sacerdote Jetroqa Moisespa suegron karqa, paytaj uyarisqa Dios imatachus Moisesnejta israelitakunapaj ruwasqanta. Chantá uyarillasqataj israelitakunata Tata Dios imaynatachus Egiptomanta orqhomusqanta.

² Moisesqa warmin Seforata, iskaynin churinkunatawan suegronpa wasinpajman kachasqa, suegron Jetrotaj paykunata wasinpi jap'ikullasqa.

³ Moisespa ujnin churinpata sutin “Gersón” karqa. Chayta Moisés wawanta suticharqa: Noqaqa runaj llajtanpi tiyakushani, nispa.

⁴ Ujnin churinpatataj “Eliezer” sutin karqa. Chayta suticharqa: Tataypa Diosnin yanapawan, faraón espadawan wañuchinawanmantataj jark'awan, nispa.

⁵ Moisesqa ch'innejpi, Diospa orqon nisqa qayllapi jarakorqa. Chaypi kashajtin, suegron Jetroqa Moisespa warminta, iskaynin churinkunatawan pusariykukuspa, watukoj rerqa.

⁶ Jetrotaj Moisesman willajta kacharqa: Noqa suegroyki Jetro qanta waturikusoj jamushani, warmiykita, iskaynin churiykikunatawan pusariykukuspa, nispa.

⁷ Chantá Moisesqa suegron Jetrota taripaj llojserqa. Ñawpaqenpi k'umuykuspataj, much'aykorqa. Chaymantataj, imaynachus kashasqankuta tapunakuytawan, Moisés suegron Jetrota toldonman pusaykorqa.

⁸ Chantá Moisés suegronman willarqa Tata Dios israelitakunata munakusqanrayku imatachus ruwasqanta. Jinallataj willarqa imaynatachus faraonta, jinataj Egipto llajtayojkunatapis jasut'ispa ñak'arichisqanta, chantá ñanta jamushaspa imakunatachus israelitakuna muchusqankuta. Willallarqataj imaynatachus paykunata Tata Dios waqaychasqanta ima.

⁹ Jetroqa israelitakunarayku Tata Diospa sumaj ruwasqanmanta uyarispa, mayta kusikorqa. Kusikullarqataj Egipto llajtayojkunaj makinkumanta paykunata kacharichisqanmanta.

¹⁰ Chantá Jetro nerqa: Tata Dios jatunchasqa kachun, israelitakunata Egipto llajtayojkunaj makinkumanta, chantá faraonpa makinmantawan kacharichisqanmanta.

¹¹ Kunan yachani Tata Diosqa tukuy dioskunamanta nisqaqa astawan atiyniyoj kasqanta. Payqa runaykachaj Egipto llajtayojkunaj ñak'arichisqankumanta ayllunta kacharicherqa, nispa.

¹² Chantá Moisespa suegron Jetroqa uj uywata ñak'aytawan, q'olachispa Diosman jaywarqa. Pay jaywallarqataj waj imakunatawan. Chaymantataj Aaronwan, Israelmanta kurajkunawan ima Jetrowan khuska Diospa ñawpaqenpi mikhorqanku.

Moisés juezkunata churan

¹³ Q'ayantin Moisés israelitakuna ima jawa ch'ajwachinakusqankuta allinchananpaj tiyaykukorqa. Israelitakunaqa sut'iyaymanta ch'isiyanankama Moiseswan parlanankupaj jamorqanku.

¹⁴ Suegron Jetrotaj Moisesllapuni tukuy imata ruwasqanta rikuspa, nerqa: Imatataj kayta ruwashankiri? Imaraykutaj sapallayki quejankuta uyarinkiri? Runaqa tutamantapacha ch'isiyanankama qanwan parlanankupaj suyakushanku, nispa.

¹⁵ Moisestaj kuticherqa: Runakunaqa Diosta tapuripunaypaj jamuwanku.

¹⁶ Paykuna ukhupi ima jawa ch'ajwachinaku kajtin, noqaman jamuwanku. Ajinata jamunku pichus cheqanpi kasqanta, pitajchus juchayoj kasqanta noqa ninaypaj. Chantá Dios imatachus kamachisqanta, jinataj imatachus yachachisqanta ima noqa yachachini, nispa.

¹⁷ Chantá Moisespa suegron nerqa: Imatachus ruwashasqaykeqa mana allinchu,

¹⁸ imaraykuchus qan sayk'unki, qanman jamojkunapis sayk'ullanqankutaj. Ruwanaykeqa ancha, qanllaqa mana ruwayta atiwajchu.

¹⁹ Uyariway Moisés, noqaqa kay jinata yuyaychaykiman, Diostaj ruwayta yanapasuchun. Paykunaj sutinpi qan Diosman qayllay, paykuna ukhupi imachus mana allinchu kashan, chaykunata Diosman rejsichinaykipaj.

²⁰ Diospa kamachisqanta, yachachisqantawan paykunaman yachachiy. Jinallataj imaynatachus kawsanankuta, chantá imatachus ruwanankutapis yachachillaytaj.

²¹ Chantapis israelitakuna ukhumanta allin yuyayniyojkunata, Diosta may jatun respetowan qhawayta yachajkunata, mana llullakojkunata, lluk'ichikuyta chejnejkunata ajllay. Chaykunamanta churay wakinta waranqa runata, wakintaj pachajta, wakintaj phishqa chunkata, wakintaj chunka runata kamachinankupaj.

²² Chay kurajkunaqa runapura tukuy ch'ajwachinakuyta allinchanqanku. Imachus mana allinchay atinallata qanman apamusonqanku. Allinchanapaj jina kajtatajrí paykuna allinchanqanku. Ajinata ruwajtiyki, qanpa ruwanayki pisiyanqa, paykunataj yanapasonqanku.

²³ Sichus yuyaychasusqayta ruwanki, Diostaj ajinata ruwanaykita kamachisonqa chayqa, qanqa mana anchata sayk'unkichu. Israelitakunapis sonqo junt'asqa wasinkuman riponqanku, nispa. Ajinata Jetro Moisesta nerqa.

²⁴ Moisestaj suegronpa yuyaychasqanta kasuspa, imatachus nisqanta ruwarqa.

²⁵ Israelitakuna ukhumanta sumaj yuyayniyojkunata ajllaspa, paykunata kurajkuna jina kamachinankupaj churarqa. Wakenqa waranqa runakunata, wakenqa pachajta, wakintaj phishqa chunkata, wakintaj chunkata kamachinanku karqa.

²⁶ Paykuna runapura ch'ajwachinakuyta sapa p'unchay allincharqanku. Mana allinchay atikojllata Moisesman aparqanku, imachus allinchanapaj jinalla kajtarí paykunallaña allincharqanku.

²⁷ Chaymantataj Moisés suegronta kacharpayarqa, paytaj llajtanman riporqa.