Éxodo 15 - DIOSPA QHELQACHISQ

Israelitakuna kusiymanta takirikunku

¹ Chantá chay qhepata Moiseswan, israelitakunawan ima kay takiyta Tata Diosman takerqanku: Tata Diosman takisaj, imaraykuchus payqa t'ukunata atipaykuspa, caballopi rejkunata, caballontinta mama qochaman p'ultiykun.

² Tata Diospaj takipusaj. Payqa kacharichiwajniy, kallpata qowajtaj. Paymin Diosneyqa, payta yupaychasaj. Payqa tataypa Diosnin, payta jatunchasaj.

³ Tata Diosqa sumaj maqanakojmin, sutintaj Tata Diosmin.

⁴ Tata Diosqa faraonpa carretankunata, soldadonkunatawan ima mama qochaman wijch'uykun. Sumaj capitanninkunaqa Puka Mama Qochapi p'ultisqa wañunku.

⁵ Rumi jina ukhuman chinkaykunku, mama qochaj yakuntaj paykunata p'ampaykun.

⁶ Tata Diosníy, paña makiykeqa kallpasapa, may atiyniyojtaj. Paña makiyki awqata phiriykorqa.

⁷ Qanqa may jina atiyniykiwan contraykita oqharikojkunata atipanki. K'araj phiñakuyniykitaj ichhuta jina paykunata q'olarparin.

⁸ Mama qochata kallpawan phukuspa, yakuta iskayman t'aqarqanki. Yaku oqharikusqanpis perqa jina sayarqa. Mama qochaj sonqonpi yakupis tikayarparerqa.

⁹ Awqaykoqa nerqa: Jap'inaykama israelitakunata qhatiykusaj. Sajsakunaykama qhechusqayta rak'irasaj. Espadayta sik'ikuspa, paykunata tukuchisaj, nispa.

¹⁰ Qantajrí, kallpawan yakuta phukuspa, paykunata mama qochaman p'ultiykorqanki. Oqharikoj yakumantaj titi jina chinkaykorqanku.

¹¹ Tata Diosníy, ni mayqen dios qan jina kanchu. Mana pipis qan jina llimphu llimphu, ni atiyniyojpis kanchu. Qanqa musphanapaj jina t'ukunata ruwanki.

¹² Paña makiykita oqharejtiyki, jallp'a awqaykuta oqoykorqa.

¹³ Mana jayk'aj tukukoj khuyakuyniykiwan kacharichisqayki israelitakunata pusashanki. Atiyniykiwantaj tiyakunayki cheqaman pusashanki.

¹⁴ Suyukunamanta runa imatachus ruwasqaykita yachaspa, kharkatitenqanku. Nanayqa tukuy filisteokunata q'ewiykachachenqa.

¹⁵ Edompi kamachejkuna mancharenqanku. Moabpi kamachejkunapis manchachikuspa, kharkatitenqanku. Canaanpi tiyakojkunarí, ch'uchaliman tukonqanku.

¹⁶ Paykunaj patankuman kharkatitiy, manchachikuy ima urmachun. May jina atiyniykiwan rumi jina titipacha kachunku, Israel aylluyki pasanankama, orqhokapusqayki ayllu chimpanankama.

¹⁷ Tata Diosníy, Qanpaj ajllakusqayki orqoman pusawasqayku, chaypitaj wiñaypaj tiyachiwasqayku. Qan kikiykimin chayta wakicherqanki. Qanmin wasiykita ruwarqanki.

¹⁸ Tata Diosmin wiñay wiñaypaj kamachenqa, nispa.

Maríaj takiynin

¹⁹ Maypachachus faraonpa carretankuna, caballopi rej soldadonkuna ima mama qochaman yaykorqanku chaypacha, Tata Dios mama qochapi yakuwan paykunata p'ampaykusqa. Israelitakunarí mama qochanejta ch'aki jallp'atapis rishankuman jina chimparqanku.

²⁰ Chantá Aaronpa panan María, Diosmanta sut'inchaj kasqanrayku, uj panderata oqharikuspa, tusoj llojserqa. Qhepantataj warmikuna pandera oqharisqa, tusurispa ima llojsillarqankutaj.

²¹ Mariataj ajinata takerqa: Takiychej Tata Diosta jatunchaspa, imaraykuchus payqa awqankunata atipasqata atipan. Mama qochaman carretakunata, caballopi rejkunata ima p'ultiykun, nispa.

Dios k'ara yakuta misk'iyachin

²² Chantá Moisés israelitakunata nerqa Puka Mama Qocha kantumanta puririnankuta. Chaymanta paykunaqa Shur nisqa ch'innejman rispa, kinsa p'unchayta purerqanku, manataj ujyanankupaj yakuta tarerqankuchu.

²³ Mará nisqa cheqaman chayarqanku. Chaywanpis chaypi kaj yakuta mana ujyayta aterqankuchu, k'ara kasqanrayku. Chayrayku chay cheqata “Mará”, nispa, suticharqanku.

²⁴ Chaymanta israelitakunaqa Moisespa contranta thutuspa, nerqanku: Imatataj kunan ujyasqaykuri? nispa.

²⁵ Chantá Moisesqa Tata Dios yanapananta mañakorqa. Tata Diostaj uj sach'ata Moisesman rikucherqa. Moisestaj chayta k'utuspa, yakuman wijch'uykorqa, yakutaj ujyanapaj jina tukorqa. Chay Mará cheqapi Tata Diosqa paykunaman kamachisqakunata qorqa, chayman jina kawsanankupaj, yachananpajtaj imaynachus sonqonku kasqanta.

²⁶ Chantá Tata Dios paykunaman nerqa: Sichus Tata Diosniykichej parlasqanta tukuy sonqo uyarinkichej, ñawpaqenpitaj cheqanta ruwankichej, chantá kamachisqantataj kasunkichej chayqa, Egipto llajtayojkunaman kachaykorqani, chay onqoykunata mana qankunaman kachaykamusqaykichejchu. Noqa Tata Diosmin qhaliyachisojniykichej kani, nispa.

²⁷ Chaymanta israelitakunaqa Elimman chayarqanku. Chaynejpi chunka iskayniyoj yaku juturi karqa, kallarqataj qanchis chunka palma sach'a. Chay yaku qayllapitaj jarakorqanku.