Éxodo 12 - DIOSPA QHELQACHISQ

Ñawpaj kaj Pascua raymi

¹ Moiseswan, Aaronwan ima Egiptopi kashajtinku, Tata Dios kay jinata nerqa:

² Kunanmanta qankunapaj kay killaqa maypaj qhawana killa kanqa, wata qallariy killa.

³ Qankuna tukuy israelitakunata ninkichej: Kay killamanta chunka kaj p'unchaypi sapa wasi ayllu uj corderota, chayrí chivota t'aqaychej. Sapa ayllupaj uj uywa kachun.

⁴ Sichus uj wasipi pisilla kasqankurayku, mana corderota mikhuspa tukunankupaj jinachu kankuman chayqa, wasi masillanwan khuskachakuchun. Corderotaqa mashkhachá kasqankuman jina rak'inakuchunku, sapa runa mashkhatachus mikhuyta yachasqanman jina.

⁵ Chay t'aqasqaykichej uywaqa mana iman imanasqachu kanan tiyan. Chantapis orqo, uj watayoj kanan tiyan. Chay uywataj cordero chayrí chivopis kanan tiyan.

⁶ T'aqasqaykichej uywataqa kay killamanta chunka tawayoj p'unchaykama wisq'aspa, jap'inkichej. Chantá chay p'unchayta inti yaykuykushajtin, tukuy israelitakuna chay uywata ñak'ankichej.

⁷ Uywaj yawarninta jap'ispataj, may wasipichus mikhunkichej, chay wasej kijunninta, chantá punku patata ima yawarwan ch'ajchunkichej.

⁸ Chay ch'isitaj aychata kankaspa, jaya qhorayojta, chantá mana levadurayoj t'antatawan ima mikhunkichej.

⁹ Chantá ñak'asqaykichej uywaj aychantaqa ama chawata mikhunkichejchu, nitaj yakupi chayasqatapis, manachayqa ninapi kankasqatapuni mikhunkichej. Umanta, chakinta, ch'unchulantapis ninapi kankasqatapuni mikhunkichej.

¹⁰ Q'ayantinpajqa amapuni ni imata puchuchinkichejchu. Sichus puchunman chayqa, ruphaykuchinkichej.

¹¹ Qankuna corderota kay jinata mikhunkichej: Puririnaykichejpaj p'achallisqa, juk'uta churaykusqa, tojnuykichej jap'irisqa mikhunkichej. Chantapis usqhayllata mikhunkichej, imaraykuchus kayqa Tata Diospa Pascuanmin.

¹² Chay ch'isi noqaqa tukuy Egipto suyuta pasasaj, chantá Egipto llajtayojkunaj tukuy kuraj kaj churinkunata, jinallataj tukuy uywankukunaj phiwi uñantapis wañuchisaj. Ajinata ruwaspa, Egiptoj tukuy diosninkunata castigasaj. Noqa Tata Diosmin chayta nini.

¹³ Maypichus kashankichej, chay waseqa yawarwan señalasqa kanqa. Punkuykichejpi yawarta rikuspataj, noqaqa qankunata pasallasqaykichej. Ajinaqa Egiptopi kuraj kaj churikunata wañuchishajtiy, qankuna ukhupi mana ni uj wañusqapis kanqachu.

¹⁴ Chay p'unchayqa qankuna yuyarikunaykichejpaj kanqa. Watan watanta qankuna sutiypi kay raymita ruwankichej. Jinallataj chay raymita qankuna Tata Diospaj miraymanta miray wiñaypaj ruwankichej.

¹⁵ Qanchis p'unchayta mana levadurayoj t'antata mikhunkichej. Ajinaqa, raymi qallariymantapacha wasiykichejpi manapuni levadura kananchu tiyan. Pillapis chay qanchis p'unchaypi levadurayoj t'antata mikhojqa israelitakuna ukhumanta wijch'usqa kanqa.

¹⁶ Chantá ñawpaj kaj p'unchayta, jinallataj qanchis kaj p'unchaytapis yupaychanawaykichejpaj tantakunkichej. Chay p'unchaykunapeqa ama ni imata ruwankichejchu, manachayqa imatachus sapa uj mikhunkichej, chayllata wayk'ukuyta atinkichej.

¹⁷ Ajinata Mana Levadurayoj T'anta Mikhuna raymita ruwankichejpuni, Egiptomanta qankunata orqhomusqayta yuyarikunaykichejpaj. Chayrayku wiñay wiñaypaj kamachisqa kasqanta qhawaspa, qankuna sapa wata raymita ruwankichejpuni.

¹⁸ Wata qallariy killapi, chunka tawayoj p'unchaymantapacha, iskay chunka ujniyoj p'unchay ch'isiyaykama, mana levadurayoj t'antata mikhunkichej.

¹⁹ Qanchis p'unchayta wasiykichejpi mana levadura kananchu tiyan. Sichus pipis levadurayojta imatapis mikhunman chayqa, pay israelitakuna ukhumanta wijch'usqa kanqa, Israel llajtayoj kachun, chayrí waj llajtayojpis.

²⁰ Chayrayku levadurayojta amapuni imatapis mikhunkichejchu. Maypi tiyakushaspapis, mana levadurayoj t'antata mikhunkichej, nispa. Ajinata Tata Dios Moisesta nerqa.

²¹ Chantá Moisesqa israelitakunamanta tukuy kurajkunata tantachispa, nerqa: Rispa, sapa wasi ayllupaj uj watayoj corderota, chayrí watayoj chivituta jap'ispa, Pascua raymita ruwanaykichejpaj ñak'ankichej.

²² Corderoj yawarnintataj uj ch'illamipi jap'inkichej. Chantá hisopo qhorata yawarman chhapuspa jawinkichej, wasiykichejpa punkunpa pata chakanta, chantá iskaynin k'aspintawan. Chantá sut'iyamunankama ni pipis wasimanta llojsinanchu tiyan,

²³ imaraykuchus Tata Diosqa Egipto llajtayojkunaj kuraj kaj churinkunata wañuchispa pasanqa. May punkutachari yawarwan jawisqata rikonqa, chaytaqa pasallanqa. Ajinata Tata Diosqa wañuchej angelta wasiykichejman yaykojta mana saqenqachu chaypi pitapis wañuchinanpaj.

²⁴ Qankuna kay kamachisqata kasuychej. Chayqa qankuna, chantá wawaykichejkuna wiñaypaj kasunankupaj churasqa kanqa.

²⁵ Maypachachus Tata Diospa qosqan jallp'aman chayankichej, chaypachapis Pascua raymita ruwallankichejpuni.

²⁶ Sichus wawaykichejkuna tapusonqachej: Imatachus ruwashanchej, chay ima niytataj munanri? nispa chayqa,

²⁷ qankuna ninkichej: Kay uywaqa Pascuapi Tata Diospa sutinpi ñak'aspa jaywanapaj kashan. Payqa Egipto llajtayojkunaj kuraj kaj churinkukunata wañuchishajtin, israelitakunaj wasinkuta pasallarqa. Ajinata ruwaspa, Diosqa mana wañuchisqa kanaykumanta jark'akuwarqayku, nispa wawaykichejman ninkichej. Moisés parlayta tukojtinkamataj, israelitakuna qonqorikuspa, Tata Diosta yupaycharqanku.

²⁸ Chantá israelitakuna rispa, tukuy imata ruwarqanku Tata Dios imatachus Moisesman, Aaronman ima kamachisqanman jina.

Kuraj kaj churikuna wañunku

²⁹ Jinapi chawpi tutata Tata Diosqa Egipto llajtayojkunaj tukuy kuraj kaj churinkunata wañuracherqa. Wañucherqa faraonpa kuraj kaj churin, pichus kamachinan tiyanapi tiyaykunan karqa, chaymanta, carcelpi wisq'asqa kasharqa, chaypa kuraj kaj churinkama. Jinallataj tukuy uywakunaj phiwi uñantapis wañuchillarqataj.

³⁰ Chaypacha faraón, jinallataj yanapajninkuna, chantá tukuy Egipto llajtayojkuna ima chawpi tutata jatarerqanku. Tukuy Egiptopi manchay sonqo nanayta waqarqanku, imaraykuchus ni uj wasipis mana wañusqayojqa karqachu.

³¹ Chayrayku chay tutapacha faraonqa Moisesta, Aarontawan ima wajyachispa, nerqa: Llajtaymanta qankuna, israelitakuna ima ripuychej, nisqaykichejman jina Tata Diosta yupaychamunaykichejpaj.

³² Jinallataj ovejaykichejta, wakaykichejtapis qhatikapuychej, chantá usqhayllata ripuychej. Chantá noqaraykupis Diosmanta mañapuwaychej, nispa.

³³ Jinapi Egipto llajtayojkunaqa israelitakuna llajtankumanta ripunankupaj usqhay usqhayta yanaparqanku. Ajinata ruwarqanku, imaraykuchus nerqanku: Manachus riponqanku chayqa, tukuyninchej wañusunchej, nispa.

³⁴ Israelitakuna mana levadurayoj masasqankuta llijllankuman q'epichaspa, apakaporqanku.

³⁵ Chantapis Moisespa nisqanman jina, israelitakuna Egipto llajtayojkunamanta mañakorqanku qolqe metalmanta ruwasqa, chantá qorimanta ruwasqa imakunata ima, jinataj p'achatawan.

³⁶ Tata Diostaj ruwarqa Egipto llajtayojkuna israelitakunapaj manchay k'acha kanankuta. Chayrayku israelitakuna imatachá mañakusqankuta egipciokuna qorqanku. Ajinata israelitakunaqa Egipto llajtayojkunata mana imayojta saqerparerqanku.

Israelitakuna Egiptomanta ripunku

³⁷ Israelitakunaqa Ramesés llajtamanta puririspa, Sucotman rerqanku. Mana wawakunata yupaspa, tukuyninpi 600.000 qharikuna maqanakuman rinankupaj jina karqanku.

³⁸ Paykunawan khuska tukuy imaymana may chhika runakunapis llojsillarqankutaj. Jinallataj paykuna may chhika ovejankukunata, wakankukunata ima qhatiriykukuspa, riporqanku.

³⁹ Israelitakuna Egiptomanta usqhay usqhayta puririsqankurayku, ñanpi mikhunankupaj qoqawita mana wayk'ukuyta atisqankuchu. Chayrayku Egiptomanta mana levadurayoj masata apakamusqankumanta t'antata ruwakorqanku.

⁴⁰ Egiptopi israelitakuna tiyakusqankoqa 430 wata karqa.

⁴¹ Chay watakuna junt'akojtin, chay kikin p'unchaypi israelitakuna Tata Diospa soldadonkuna jina, Egiptomanta llojsiporqanku.

⁴² Chay tuta Tata Diosqa israelitakunata Egiptomanta orqhonanpaj qhawasharqa. Chayrayku israelitakunaqa wiñay wiñaypaj sapa wata chayta yuyarikunanku karqa.

Pascuata ruwanapaj kamachisqakuna

⁴³ Chaypacha Tata Dios Moisesta, Aarontawan ima nerqa: Kaymin Pascuata ruwanamanta kamachisqakuna. Pascuapi mikhunaykichej aychata mana waj llajtayoj runa mikhonqachu.

⁴⁴ Rantikusqayki wata runakunarí mikhuyta atenqanku, sichus circuncidasqa karqanku chayqa.

⁴⁵ Waj llajtayoj, chantá qanpaj llank'apusoj runarí Pascua mikhunata mana mikhonqachu.

⁴⁶ Chantá Pascuapi mikhuna aychataqa wasi ukhupi mikhunkichej. Aychataqa ni uj chhikallantapis jawaman orqhonaykichejchu tiyan, nitaj ima tulluntapis p'akinaykichejchu tiyan.

⁴⁷ Tukuy israelitakuna Pascua raymita ruwanaykichej tiyan.

⁴⁸ Sichus qankunawan tiyakoj waj llajtayojqa Tata Diospaj Pascua raymita ruwayta munanman chayqa, ayllunpi tukuy qhari circuncidachikunanku tiyan. Chaypacharaj Pascua raymita ruwayta atenqa, imajtinchus circuncidasqaqa llajta masiykichejman tukonqa. Mana circuncidasqa kajrí, Pascuapi mikhuna aychamanta manapuni mikhuyta atenqachu.

⁴⁹ Qankuna israelitakuna, jinallataj qankuna ukhupi waj llajtayojkunamanta tiyakojkunapis kay kamachisqata kasunanku tiyan, nispa.

⁵⁰ Chaypacha, Tata Dios imaynatachus Moisesman, Aaronmanwan ima kamacherqa, ajinata israelitakuna ruwarqanku.

⁵¹ Chay kikin p'unchayllataj Tata Diosqa israelitakunata t'aqa t'aqapi t'aqasqata Egiptomanta orqhorqa.