Éxodo 1 - DIOSPA QHELQACHISQ

Egiptopi israelitakuna wata runa kanku

¹ Israelpa churinkunaj sutinku kaymin kanku. Paykuna, ayllunkuwan ima Jacobwan khuska Egiptoman chayarqanku:

² Rubén, Simeón, Leví, Judá,

³ Isacar, Zabulón, Benjamín,

⁴ Dan, Neftalí, Gad, Aser ima.

⁵ Jacobpa ayllonqa tukuyninpi qanchis chunka karqanku. Josetajrí Egiptopiña kasharqa.

⁶ Chaymanta unayninman jina Josewan, wawqenkunawan ima, jinallataj paykunawan khuska wiñajkunapis wañuporqankuña.

⁷ Chay qhepata israelitakuna t'ukunata mirarqanku, sinch'i atiyniyojmantaj tukorqanku. Ashkhayasqankuraykutaj, paykuna Egiptoman junt'aykorqanku.

⁸ Israelitakuna Egiptopi unaytaña tiyakushajtinku, Egipto suyupi waj runañataj kuraj kamachej jina yaykorqa. Payqa Joseta mana rejserqachu, manataj yacharqachu José Egipto suyurayku imatachus ruwasqanta. Chayrayku pay runankunata nerqa:

⁹ Qhawaychej, israelitakuna noqanchejmanta nisqa aswan ashkhaña kanku, aswan kallpayojtaj.

¹⁰ Chayrayku, imatachus ruwananchejta yuyaychakunanchej tiyan, amaña paykuna astawan miranankupaj. Mana jinata ruwasunman chayqa, imaynapi maqanaku kajtin, israelitakunaqa awqanchejkunaman k'askapuspa, contranchejpi sayaykuwasunman. Jinaspataj, suyunchejmanta ripunkuman, nispa.

¹¹ Chayrayku Egipto llajtayojkunaqa israelitakunata sinch'i ruwanaman churanankupaj jilaqatakunata churarqanku. Jilaqatakunataj israelitakunawan iskay llajtakunata sayaricherqanku: Pitonta, Ramesestawan ima. Chay llajtakuna karqa faraón chajraj poqosqanta pirwachinanpaj.

¹² Chaywanpis jilaqatakuna astawan sinch'i ruwanawan ñak'arichishajtinkupis, israelitakunaqa astawan ashkhayarqanku. Chayrayku Egipto llajtayojkuna israelitakunata astawan manchachikorqanku.

¹³ Jinapi Egipto llajtayojkuna israelitakunata sinch'i ruwanaman churaspa, maytapuni ñak'aricherqanku.

¹⁴ Awantay mana atinata, paykunawan t'uruta saruchispa, adobeta ruwacherqanku, wakinkunatataj chajrata tarpucherqanku. Ajinata tukuy imaymana sinch'i ruwanawan sonqo nanayta israelitakunata ñak'aricherqanku.

¹⁵ Chay jawa Egiptota kuraj kamachejqa israelitakunaj parteranku Sifrata, chantá Fuata ima nerqa:

¹⁶ Israelitakunaj warminkuna onqokushajtinku, allinta qhawankichej. Qhari wawa kajtenqa, wañuchinkichej. Warmi wawatatajrí kawsajta saqellankichej, nispa.

¹⁷ Chaywanpis parterakunaqa Diosta may jatun respetowan qhawaspa, Egipto suyuta kuraj kamachejta mana kasorqankuchu, nitaj qhari wawakunata wañucherqankuchu.

¹⁸ Chayrayku Egiptota kuraj kamachejqa parterakunata wajyachispa, taporqa: Imaraykutaj qhari wawakunata mana wañuchinkichejchuri? nispa.

¹⁹ Paykunataj kuticherqanku: Israelita warmikunaqa mana Egipto llajtayoj warmikuna jinachu kanku. Paykuna kallparara kasqankurayku, manaraj noqayku chayashajtiyku, ñapis onqokunkuña, nispa.

²⁰ Ajinata chay parterakuna ruwasqankurayku Dios paykunata yanaparqa. Israelitakunataj astawan ashkhayarqanku, astawan atiyniyojmantaj tukorqanku.

²¹ Parterakuna Diosta may jatun respetowan qhawasqankuraykutaj, Diosqa ashkha wawayoj kanankuta ruwarqa.

²² Faraontajrí tukuy Egipto llajtayojkunata kamacherqa: Israelitakunaj qhari wawanku paqarejkunamanta tukuyninkuta Nilo mayuman wijch'uychej. Warmi wawakunatatajrí ama imanaychejchu, nispa.