Ester (hebreo) 6 - DIOSPA QHELQACHISQ

Mardoqueoj atipasqan

¹ Chay kikin ch'isipacha kuraj kamachejqa mana puñuyta aterqachu. Chayrayku kamachinkunaman nerqa, imatachus kamachishaspa ruwasqanmanta willaj qhelqata apamuspa ñawiripunankuta.

² Chay qhelqapitaj tarerqanku, imaynatachus Mardoqueo willasqa kamachina wasej punkunta qhawajkuna kuraj kamachejta wañuchinankupaj wakichikushasqankumanta, chay willayta. Chay kamachikunaqa Bigtanwan, Tereswan ima karqanku.

³ Chay willayta uyarispa, kuraj kamachejqa nerqa: Chay jinata Mardoqueo ruwasqanmanta, imata qospa payta jatuncharqanchejri? nispa. Chay kamachinkunataj nerqanku: Mana imatapis paypajqa ruwapunchejchu, nispa.

⁴ Amanrí chaypachapuni kamachina wasi patioman yaykumusharqa kuraj kamachejmanta mañakunanpaj Mardoqueota chay sipinata ruwachisqanpi warkhuchinanta. Chantá kuraj kamachejqa kamachinkunata taporqa: Pitaj patiopi kashanri? nispa.

⁵ Kamachinkunataj nerqanku: Patiopeqa Amán kashan, nispa. Kuraj kamachejtaj nerqa: Yaykuchimuychej, nispa.

⁶ Amán yaykojtintaj, kuraj kamachejqa payta taporqa: Imatataj ruwana kanman, pi runatachus kuraj kamachejqa jatunchayta munashan, chaypajri? nispa. Amán sonqonpi nerqa: Pitataj kuraj kamachej jatunchayta munashanman noqamanta astawanri? nispa.

⁷ Chayrayku Amán kuticherqa: Pi runatachus kuraj kamachejqa jatunchayta munashan,

⁸ chaypajqa kuraj kamachejpa churakunan p'achata, purinan caballotawan, umanpi kashan, chay pillutawan ima apamuchunku.

⁹ Chantá chay p'achata, caballotawan ima, kuraj kamachejpa mayqen kamachinchus aswan kuraj kashan, chayman jaywachunku. Chay runataj p'achallichichun, pitachus kuraj kamachejqa jatunchayta munan, chay runaman. Chantá kuraj kamachejpa caballonman lloq'aykuchispa, plazanta muyurichimuchun, ñawpaqentataj richun sinch'ita qhaparispa: Ajinata kuraj kamachej ruwanqa, pitachus jatunchayta munan, chay runataqa, nispa.

¹⁰ Chantá kuraj kamachejqa Amanta nerqa: Usqhayllata caballoytawan, p'achaytawan jap'ispa, nisqaykiman jina judío Mardoqueowan ruway, pichus kamachina wasi punkupi tiyasqa kashan, chaywan. Chay nisqaykitaqa kikintapuni ruway, ama imatapis qonqaspa, nispa.

¹¹ Jinapi Amanqa kuraj kamachejpa p'achanta orqhomuspa, Mardoqueota p'achallicherqa. Kuraj kamachejpa caballonman lloq'aykuchispataj, llajtaj plazanta muyurichimorqa. Paytaj Mardoqueoj ñawpaqenta rispa, qhaparerqapuni: Ajinata kuraj kamachej ruwanqa, pitachus jatunchayta munan, chay runataqa, nispa.

¹² Ajinata muyurimuytawan, Mardoqueoqa kamachina wasi punkuman kutiporqa. Amantajrí usqhay usqhayllata wasinman kachaykukorqa may llakisqa, p'enqakuymanta uyanta suk'umpaykukuspa.

¹³ Wasinpitaj Amanqa warmin Zeresman, tukuy kawsaqenkunaman ima willarqa imakunachus payta qhatirisqanta. Chantá yachayniyoj kawsaqenkuna, warmin Zerespiwan nerqanku: Sichus chay judiokunaj mirayninkumanta kaj Mardoqueoj ñawpaqenpi urmayta qallarinki chayqa, manapuni atipawajchu, manachayqa chay runaj ñawpaqenpi urmallankipuni, nispa.

¹⁴ Ajinata manaraj parlayta tukushajtinku, kuraj kamachejpa kachankuna chayaykamorqanku Amanta pusanankupaj, Esterpa sumaj mikhuyta wayk'uchisqanta mikhumunankupaj.