Ester (hebreo) 4 - DIOSPA QHELQACHISQ

Mardoqueoqa Esterta nin judiokunarayku parlarinanta

¹ Mardoqueoqa chay jina kamachisqa kasqanta yachaytawan, p'achantawan llik'ikuspa, qhashqa p'achata churaykukorqa. Umanman ushphawan qhalliykukuspataj, jatunmanta waqaspa, llajtapi purerqa.

² Jinata waqaspa, kuraj kamachejpa wasinpa punkunkama chayarqa, manataj aswan ukhukama yaykuyta aterqachu, qhashqa p'achayoj kaspa mana yaykuna kasqanrayku.

³ Judiokunataj tukuy llajtapi kuraj kamachejpa kamachisqanta yachaytawan, maytapuni phutikorqanku. Chayrayku paykunaqa llakiyninkuta rikuchispa, ayunarqanku. Sonqo nanayta waqaspa, qhashqa p'achata churaykukorqanku, wakintaj ushpha patapi puñorqanku.

⁴ Chaypacha qoya Esterpa warmi kamachinkuna, chantá kuraj kamachejpa warminkunata qhawaj runakuna ima Esterman willarqanku Mardoqueo qhashqa p'achayoj kasqanta. Chayta yachaytawantaj, qoya Esterqa mayta llakikuspa, Mardoqueoman waj p'achata apacherqa, chay qhashqa p'achanta orqhokunanpaj. Paytajrí mana jap'ikuyta munarqachu.

⁵ Jina kajtintaj, Esterqa kuraj kamachejpa warminkunata qhawaj Hatac sutiyoj runata wajyarqa, pichus payta yanapananpaj churasqa karqa, chay runata. Chantá payta kacharqa Mardoqueota allinta tapumunanpaj imamantachus chay jina p'achata churakusqanta.

⁶ Hatac rispataj, llajtaj plazanpi Mardoqueowan parlamorqa. Paytaj kamachina wasi punku chaynejpi kasharqa.

⁷ Jinapi Mardoqueoqa imachus kasqanta sut'inta willarqa. Willallarqataj tukuy judiokuna wañuchisqa kanankupaj mashkha qolqetachus Amanqa kuraj kamachejpa cajanman churanan karqa, chaytawan.

⁸ Chantá kuraj kamachejpa cartanta Hatacman jaywallarqataj, mayqenchus Susapi llojserqa chayta, Esterman jaywananpaj, sut'inchananpajtaj. Chantá Esterman nichillarqataj judiokunarayku kuraj kamachejwan parlarinanta, khuyarikunanta mañarikuspa.

⁹ Hatacqa chaymanta kutimuytawan, Mardoqueoj tukuy nisqanta Esterman willarqa.

¹⁰ Chaymanta Esterqa ujtawan Hatacta Mardoqueoman kacharqa kay jinata ninanpaj:

¹¹ Kuraj kamachejpa tukuy kamachinkuna, jinataj kamachiyninpi tukuy runakuna yachanku: Pi qharichus chayrí warmichus kuraj kamachejpa ukhu pationman mana wajyachisqalla yaykojqa kamachisqaman jina wañuchisqa kanan tiyan. Jinapis pimanchus kuraj kamachejqa qorimanta kamachina varanta jaywarin, chay kajlla mana wañuchisqachu kanqa. Noqatarí, killataña mana wajyachiwanchu, nispa.

¹² Chantá Hatacqa Mardoqueoman Esterpa nisqanta willarqa.

¹³ Mardoqueoqa Esterman kay jinata nicherqa: Qanqa ama yuyaychu kuraj kamachejpa wasinpi kasqaykirayku tukuy judío ukhumanta qanlla mana wañuchisqa kanaykita.

¹⁴ Sichus kunan ch'inlla kanki chayqa, judiokunata kacharichej waj rikhurimonqa. Qantaj, tataykej ayllunkuna ima wañurachisqa kankichej. Ichapis qanqa, kay jina llakiypi yanapanawaykupaj qoya kayman chayarqanki, nispa.

¹⁵ Chantá Esterqa ujtawan Mardoqueoman nichillarqataj:

¹⁶ Qantajrí, Susa llajtapi tukuy judiokunata tantaspa, kinsa p'unchayta, kinsa tutatawan ayunaychej. Noqapis kamachiykunawan kikillantataj ruwasqayku. Chaymantaraj kuraj kamachejpa ñawpaqenman, kamachisqata p'akispa risaj. Wañunay kanqa chaypis, jina wañusaj, nispa.

¹⁷ Chantá Mardoqueoqa Esterpa nisqanman jina ruwarqa.