Ester (hebreo) 1 - DIOSPA QHELQACHISQ

Asuero jatun mikhuyta wayk'uchin

¹ Kay tukuy ima karqa Asuero kuraj kamachej kashajtin. Payqa Indiamanta Etiopiakama, 127 suyukunata kamacherqa.

² Chaypacha Asueroqa Susa llajtamanta Persia suyuta kamachisharqa.

³ Kuraj kamachej Asueroqa kinsa watataña kamachishaspa, jatun raymita wakicherqa kamachiysejkunapaj, yanapajninkunapaj, Persiamanta, Mediamantawan soldado kamachejkunaj kurajninkukunapaj, chantá tukuy suyupi kamachejkunapaj, kurajkunapajwan ima.

⁴ Payqa jatun raymita wakichispa, rikucherqa kamachiyninpa qhapaj kayninta, may jatun kayninta, atiynin may jatun kasqantawan ima. Chay raymitaj sojta killa junt'ata karqa.

⁵ Chay p'unchaykuna junt'akojtintaj, kuraj kamachejqa kamachinan wasej huertanpi qanchis p'unchaytawan waj raymita ruwallarqataj. Chay raymimanqa kamachinan llajta Susa nisqapi tukuy tiyakojkunata kantumanta wajyacherqa.

⁶ Chay kamachina wasej pationqa sumaj karqa, yuraj llijllakunawan, q'omer llijllakunawan, anqa llijllakunawan ima k'achanchasqa. Chaytataj jap'icherqanku linomanta ruwasqa kulli q'aytuwan, qolqemanta ruwasqa anillokunaj chawpinta jusk'urachispa. Chaykunataj, mármol k'achitu rumimanta ruwasqa sayantakunaman jap'ichisqa karqanku. Chay ukhupi tiyanakunaqa qorimanta, qolqe metalmanta karqanku. Chay kamachina wasej pampantaj k'acha rumikunawan losasqa karqa: Pórfido nisqawan, marmolwan, alabastrowan, jacinto nisqa rumiwan ima.

⁷ Chaypi vinota ujyarqanku imaymana rijch'aj qori vasokunapi. Kuraj kamachej k'acha kasqanman jina, vino manchay ashkha karqa.

⁸ Kuraj kamachejqa mayordomonkunata kamachisqa ama pitapis munajta mana munajtaqa ujyachinankuta, manachayqa munasqankuman jinalla ujyanankuta.

⁹ Chaypachallataj kamachina wasipi qoya Vastipis kuraj kamachejpa wajyachisqanpa warminkunawan uj jatun mikhuyta mikhushallarqankutaj.

¹⁰ Qanchis kaj p'unchaypi kuraj kamachej Asueroqa vinowan macharisqa kashaspa, eunuco nisqa, chay qanchis kamachinkunata wajyarqa: Meumanta, Biztata, Jarbonata, Bigtata, Abagtata, Zetarta, Carcastawan ima.

¹¹ Asuerotaj paykunata kacharqa ñawpaqenman qoya Vastita pusarimunankupaj sumaj k'achanchasqata, pilluwan churaykusqata, pikunawanchus chay raymipi mikhusharqa, chay kurajkunapis may k'achita kasqanta rikunankupaj. Cheqamanta qoyaqa k'achita karqa.

¹² Qoya Vastirí kuraj kamachejpa kachankunata mana kasumorqachu. Chayrayku kuraj kamachejqa paypaj maytapuni phiñarikorqa.

¹³ Chantá kuraj kamachejqa kamachisqakunamanta yachajkunata tapurerqa imatachus ruwananmanta, imaraykuchus pay sapa kuti paykunamanta yuyaychayta mañakojpuni.

¹⁴ Chaypacha kaykunaqa kuraj kamachejwan kasharqanku: Carsena, Setar, Admata, Tarsis, Meres, Marsena, Memucán ima. Paykuna kuraj kamachejta yuyaychaspa, kamachiyninpi yanapaj kanku, imaraykuchus paykuna Persiamanta, Mediamantawan kamachejpa ajllasqan kurajkuna karqanku.

¹⁵ Chantá kuraj kamachejqa paykunata taporqa: Kamachisqa kasqanman jina, qoya Vastiwan imataj kanqa kachasqaykunata mana kasumusqanmantari? nispa.

¹⁶ Chantá Memucán kuraj kamachej ñawpaqenpi, kurajkunaj ñawpaqenkupiwan sayaspa, nerqa: Qoya Vastiqa mana kuraj kamachejpa contrallantachu chayta ruwan, manachayqa tukuy kaypi kaj kurajkunaj contrankutawan. Qan kuraj kamachej kamachishanki, chay tukuy runaj contrankutapis chay sajrata ruwallantaj.

¹⁷ Chay jinata qoya Vastij ruwasqantaqa tukuy warmikuna yachanqanku. Chayrayku paykunapis qosankuta manallataj kasuta ruwanqankuchu. Nenqankutaj: Kuraj kamachej Asueroqa qoya pusachimuyta munasqa, qoya Vastitaj mana kasumusqachu, nispa.

¹⁸ Persiamanta, Mediamantawan kurajkunaj warminkunapis qoya Vastij chay ruwasqanta yachaytawan, qosankuwan churanakuyta qallarenqanku, pisipajtaj qhawanqanku, phiñanakuyllataj kanqa.

¹⁹ Chayrayku, sichus qanman allin rijch'asunkiman chayqa, kay jinata kamachiy, chaytaj qhelqasqa kachun Persiamanta, Mediamantawan kamachisqakunawan khuska, ama jayk'ajpis uj jinayachisqa kananpaj. Chay qoya Vastiqa amaña jayk'ajpis qanpa ñawpaqeykiman jamuchunchu. Qantaj kuraj kamachej jina waj warmita ajllanki, mayqenchus qoya kananpaj jina kajta.

²⁰ Kay jinata kamachisqaykeqa tukuy kamachiyki llajtakunapi uyarisqa kachun, ajinamanta warmikunaqa qosankuta kasunankupaj, ima rijch'aj qharipis kachun, nispa.

²¹ Chay jinata Memucanpa yuyaychasqanqa kuraj kamachejman, chantá chaypi kurajkunamanpis allin rijch'arqa. Paytaj Memucanpa nisqanta ruwarqapacha.

²² Asueroqa chay kamachisqanta qhelqachispa, tukuy llajtaman, sapa jap'iypi qhelqayta yachasqankupi, parlayta yachasqankupi ima qhelqaspa apacherqa. Chay kamachisqapi nerqa sapa qhari warminwan kasuchikunanta. Nillarqataj chay kamachisqataj sapa llajtapi, parlayninkupi willakunanta.