Esdras 10 - DIOSPA QHELQACHISQ

Waj llajtayoj warmikunata wijch'unku

¹ Esdrasqa Temploj ñawpaqenpi pampakama k'umuykukuspa, waqan waqan israelitakunaj juchankuta Diosman rimarisharqa. Chaykamataj israelitakunamanta qharikuna, warmikuna, wawakuna ima Esdrasta muyuykamuspa, jik'un jik'unta waqallarqankutaj.

² Chantá Elampa ayllunmanta Yejielpa churin Secaniasqa Esdrasta nerqa: Noqaykoqa Diosninchejpa contranpi juchalliyku, imaraykuchus waj llajtayoj warmikunawan casarakorqayku. Chaywanpis atinchejraj suyakuyta Diosqa Israelta khuyarikunanta.

³ Kunanqa Diosninchejwan tratota ruwasqayku waj llajtayoj warmikunata, wawankukunatawan kachapunaykuta ajinamanta Diospa kamachisqanta junt'anaykupaj, imaynatachus qan, chantá pikunachus Diospa kamachisqanta kasunku, chaykuna yuyaychawasqaykuman jina.

⁴ Sayarillayña, imaraykuchus qanmin kayta ruwanayki tiyan, noqaykutaj nisqaykiman jina ruwasqayku. Kallpachakuspa, qallariypacha, nispa.

⁵ Chantá Esdras sayarikuspa, sacerdotekunaj kurajninkuta, jinallataj levitakunaj kurajninkuta, tukuynin israelitakunaj kurajninkukunatapis trato ruwasqankuta junt'anankupaj tilucherqa. Paykunataj tiluspa, junt'anankuta nerqanku.

⁶ Chaymanta Esdrasqa Diospa Templonmanta llojserqa Eliasibpa wawan Johananpa wasinman rinanpaj. Chaypitaj mana imata mikhuspa, nitaj imatapis ujyaspa tutantin, may phutisqataj karqa, Babiloniamanta kutimojkuna juchallisqankumanta.

⁷ Chay qhepata kurajkunaqa tukuynin Babiloniamanta kutimojkunata, Judapi tiyakojkunata, Jerusalenpi tiyakojkunata ima wajyacherqanku Jerusalenpi tantakunankupaj.

⁸ Kurajkuna chantá yuyaychajkuna kamachillarqankutaj, sichus pipis kinsa p'unchaypi mana chayamunman chayqa, Babiloniamanta kutimojkuna ukhumanta wijch'usqa kananta, jallp'antataj qhechunankuta.

⁹ Chayrayku Judamanta kajkuna, Benjaminmanta kajkunapis kinsa p'unchay ukhupi Jerusalenpi tantakorqanku. Chay karqa jisq'on killamanta iskay chunka p'unchayninpi. Chantá Diospa Templonpa pationpi tukuyninku tiyarakorqanku, kharkatitispa imatachus parlanankumanta, chantá manchayta parasqanmantawan.

¹⁰ Chaypachataj sacerdote Esdrasqa sayarikuspa, nerqa: Qankunaqa Diosta wasanchaspa, waj llajtayoj warmikunawan casaraykorqankichej, ajinamanta Israel suyoj juchanman yapaykuspa.

¹¹ Chayrayku kunan ñawpa tataykichejpa Tata Diosninkoj ñawpaqenpi qankunaqa juchaykichejta willakuychej, Tata Diospa munaynintataj junt'aychej. T'aqakuychej Diosta mana kasoj runakunamanta, jinataj waj llajtayoj warmikunamantapis, nispa.

¹² Chantá tukuy runakuna jatunmanta qhaparispa, kuticherqanku: Arí, imatachá kamachiwasqaykuta ruwasqayku.

¹³ Chaywanpis ashkha kayku, manchaytataj paramushan. Chayrayku mana jawallapi qhepakuykumanchu. Kayqa mana uj p'unchayllapichu nitaj iskay p'unchayllapichu allinchana kashan, imaraykuchus ashkha kayku kay juchata ruwajkunaqa.

¹⁴ Aswan allin kanman noqaykoj kurajniykukuna cuentaykumanta qhepakunankoqa. Chantá tukuy pikunachus llajtankupi tiyakunku, waj llajtayoj warmikunawantaj casararqanku, chaykunaqa señalasqa p'unchaypaj, wajyachisqaman jina jamuchunku kamachejninkunawan juezninkunawan khuska. Chay jinamanta Diospa k'araj phiñakuynin tiyaykukonqa, nispa.

¹⁵ Runakuna chayta nejtinku, Asaelpa churin Jonatán, Ticvaj churin Jahaziaswan mana munarqankuchu. Paykunaj nisqankumantaj yapaykorqanku Mesulán, chantá Sabetay levitawan.

¹⁶ Babiloniamanta kutirimpojkunarí chayta ruwarqanku. Chantá sacerdote Esdrasqa ajllarqa wakin runakunata, pikunachus ayllunkumanta kurajkuna karqanku, chaykunata, sutinkuman jina. Chantá chunka kaj killa qallariypi chay kurajkuna tantakuspa, parlarqanku sapa ujmanta sut'ita yachanankupaj.

¹⁷ Wata qallariy killapi, killa qallariyta parlayta tukorqanku, waj llajtayoj warmikunawan casarasqanku, chay runakunamanta.

¹⁸ Waj llajtayoj warmikunawan casarasqanku, chay sacerdotekunaqa kaykuna karqanku: Josadacpa churin Josuejpa ayllunmanta, wawqenkunamantawan, Maseías, Eliezer, Jarib, Gedalías ima.

¹⁹ Paykunaqa warminkuta kachapunankuta nerqanku, uj carnerotataj juchanku pampachasqa kananpaj qorqanku.

²⁰ Imerpa ayllunmanta karqanku: Jananí, Zebadías ima.

²¹ Jarinpa ayllunmanta karqanku: Maseías, Elías, Semaías, Yejiel, Uzías ima.

²² Pasjurpa ayllunmanta karqanku: Elioguenay, Maseías, Ismael, Natanael, Yozabad, Elasa ima.

²³ Leví jatun ayllunmanta karqanku: Yozabad, Simey, Kelaía, waj sutin Kelita karqa, Petajías, Judá, Eliezer ima.

²⁴ Takejkunamanta karqa Eliasib. Punkuta qhawajkunamantataj karqanku: Salún, Telén, Uri ima.

²⁵ Israelitakunamanta Parospa ayllunmanta karqanku: Ramía, Jezías, Malquías, Mijamín, Eleazar, Malquías, Benaías ima.

²⁶ Elampa ayllunmanta karqanku: Matanías, Zacarías, Yejiel, Abdi, Jeremot, Elías ima.

²⁷ Zatujpa ayllunmanta karqanku: Elioguenay, Eliasib, Matanías, Jeremot, Zabad, Aziza ima.

²⁸ Bebaypa ayllunmanta karqanku: Johanán, Jananías, Zabay, Atlay ima.

²⁹ Banijpa ayllunmanta karqanku: Mesulán, Maluc, Adaías, Jasub, Seal, Ramot ima.

³⁰ Pajat Moabpa ayllunmanta karqanku: Adna, Quelal, Benaías, Maseías, Matanías, Besalel, Binúi, Manasés ima.

³¹ Jarinpa ayllunmanta karqanku: Eliezer, Isías, Malquías, Semaías, Simeón,

³² Benjamín, Maluc, Semarías ima.

³³ Jasunpa ayllunmanta karqanku: Matenay, Matata, Zabad, Elifelet, Yeremay, Manasés, Simey ima.

³⁴ Banijpa ayllunmanta karqanku: Maday, Amirán, Uel,

³⁵ Benaías, Bedías, Queluí,

³⁶ Vanías, Meremot, Eliasib,

³⁷ Matanías, Matenay, Jasay ima.

³⁸ Binuipa ayllunmanta karqanku: Simey, Bani,

³⁹ Selemías, Natán, Adaías,

⁴⁰ Macnadebay, Sasay, Saraí,

⁴¹ Azareel, Selemías, Semarías,

⁴² Salún, Amarías, José ima.

⁴³ Neboj ayllunmanta karqanku: Yeguiel, Matatías, Zabad, Zebina, Jadau, Joel, Benaías ima.

⁴⁴ Chay tukuyninku waj llajtayoj warmikunawan casaraykusqanku. Chaywanpis warminkuta, wawankutapis kachaporqanku.