Efesios 6 - DIOSPA QHELQACHISQ

¹ Wawakuna, tata mamaykichejta kasuychej, imajtinchus qankunaqa Tukuyta Kamachej Jesuspata kankichej. Chayrayku paykunata kasunaqa cheqanmin.

^2-3 Diospa kamachisqanpi nin: Tataykita, mamaykitawan jatun respetowan qhaway, allin risunanpaj, kay pachapitaj unayta kawsakunaykipaj, nispa. Diospa tukuy kamachisqanmanta kaymin ñawpaj kaj t'inkayoj kamachisqaqa.

⁴ Qankunarí tata, mama, ama wawaykichejta phiñachiychejchu. Manachayqa paykunata uywaychej cheqan ñanman churaspa, jinataj Tukuyta Kamachej Jesuspa munasqanman jina yachachispa.

⁵ Wata runakuna, patronniykichejta kasuychej, respetakuspa chantá manchachikuspa ima. Paykunaj kamachisqankuta tukuy sonqowan kasuychej, Cristotapis kasushawajchej jina.

⁶ Ama paykuna qhawashajtillankuchu ruwaj ruwaj tukuychej, imaynatachus wakin ruwanku, ajinataqa. Manachayqa Cristoj wata runan jina, Diospa munasqanta tukuy sonqo ruwaychej.

⁷ Imachus ruwanaykichejta tukuy sonqo ruwaychej, Tukuyta Kamachej Jesuspajpis ruwashawajchej jina, amataj runapaj jinallachu.

⁸ Ama qonqaychejchu: Tukuyta Kamachej Jesucristo sapa ujta allin kajta ruwasqanman jina t'inkachenqa, wata runapis kachun chayrí mana wata runapis kachun.

⁹ Qankunapis patronkuna, kikillantataj wata runaykichejta allinta qhawaychej. Ama paykunata manchaykuchispa imatapis ruwaychejchu. Manachayqa yuyarikuychej paykunajtapis qankunajtapis Dueñoykichejqa janaj pachapi kasqanta, paytaj tukuyta uj ñawillawan qhawan.

Diospa qosqan armata, p'achata ima churakuna

¹⁰ Kunanqa kaytawan niykichej: Munasqa wawqe panakuna, Tukuyta Kamachej Jesuspa jatun atiyninwan kallpachakuyta mask'aychej.

¹¹ Jinallataj maqanakunapaj Diospa qosqan p'achawan p'achallikuychej, Kuraj Supay tukuy imaymanamanta misk'achiyta munasojtiykichej, sinch'ita sayanaykichejpaj.

¹² Noqanchej mana runawanchu maqanakushanchej, manachayqa atiyniyoj kamachej supaykunawan. Paykuna janajmantapacha laqhayaypi kawsaj runakunata kamachinku, munasqankuta ruwachispa.

¹³ Chayrayku maqanakunapaj Diospa qosqan tukuy p'achata churakuychej, mana allin kajta ruwanapaj sinch'i tanqasqa kashajtiykichej mana ithirispa thuruta sayanaykichejpaj. Chantá maqanakuspaña, sinch'ita sayashajllapuni kashankichej.

¹⁴ Ajinaqa sinch'ita sayaychej ari, ñañu wasaykichejta cheqa kajwan, chumpiwan jina chumpikuspa. Cheqan kajta ruwasqaykichejtataj pecherata jina churakuychej.

¹⁵ Chantá Dioswan allinyachej Jesusmanta sumaj willayta willanapaj wakichisqa kanata, juk'utata jina churakuychej.

¹⁶ Astawanqa tukuy sonqo Diospi atinikuychej, imaraykuchus Diospi atinikusqaykichejqa jark'akuna escudo jina Kuraj Supaypa tukuynin lawrashaj flechankunamanta jark'asonqachej.

¹⁷ Jinallataj qhespichisqa kasqaykichejta monterata jina umaykichejman churakuychej. Chantá Santo Espíritoj espadantapis oqhariychej, chayqa Diospa simi nisqan.

¹⁸ Mana sayk'uyta Dioswan parlarikuspallapuni kaychej, Diosmanta mañakusqaykichejtaj Santo Espíritoj yuyaychasqanman jina kachun. Chantá qhawaspallapuni kashaychej, jinataj Dioswan parlarikuspa, tukuynejpi Diosta qhatejkunarayku mañapuychej.

¹⁹ Noqapajpis mañapullawaychejtaj sumaj willaymanta parlashajtiy, Dios imatachus ninayta yuyaychanawanpaj. Ajinamanta mana manchachikuspa, Diospa wakichisqanmanta pakasqa yachayta sut'inchayta atisaj.

²⁰ Diosmin Jesusmanta sumaj willayta willanaypaj kachawarqa. Chayrayku cadenawan watasqa kashani. Qankunarí Dioswan parlarikuspaqa, mañapuwaychej Jesuspa sumaj willayninmanta mana manchachikuspa maychus kasqanta parlanaypaj.

Pablo wawqe panakunata napaykun

²¹ Munasqa wawqenchej Tiquicoqa Tukuyta Kamachej Jesuspa ruwananpi sumajta yanapawan. Paytaj noqamanta tukuy imata willasonqachej, yachanaykichejpaj imaynachus kashasqayta.

²² Chayrayku payta qankunaman kachamuni, imaynachus kashasqaykuta willasunaykichejpaj, qankunata sonqochasunaykichejpaj ima.

²³ Tata Dios, chantá Tukuyta Kamachej Jesucristo ima qankunaman qochunku sonqo tiyaykuyta, munakuyta, atinikuyta ima.

²⁴ Diospa qhasilla k'acha yanapaynin kachun, pikunachus Tukuyta Kamachej Jesucristota mana tukukoj munakuywan munakunku, chaykunawan. Ajina kachun.