Efesios 4 - DIOSPA QHELQACHISQ

Iglesianmanta kajkuna uj sonqolla kana

¹ Tukuyta Kamachej Jesuspa munasqanta ruwasqayrayku carcelpi wisq'asqa kaspa, noqa tukuy sonqo mañakuykichej, Diospa wajyasqan kajkuna imaynatachus purinanku kashan, ajinata qankunapis purinaykichejta.

² Llamp'u sonqo kaychej, k'achataj. Jinallataj pacienciayoj kaychej, chantá munakusqaykichejrayku ujkuna ujkuna awantanakuychej.

³ Allinpi kawsakunaykichejpaj atisqaykichejta ruwaychej, Santo Espíritu ujlla kanaykichejta qosqanta ama chinkachinaykichejpaj.

⁴ Ajinata ruwaychej, imaraykuchus uj Iglesialla tiyan, uj Santo Espiritulla ima, jinallataj qankuna uj suyakuyllaman wajyasqa kankichej.

⁵ Tukuyta Kamachej Jesusqa ujlla, tukuyninchejtaj payllapi atinikunchej, jinallataj uj bautismolla tiyan.

⁶ Diospis uj k'atalla tiyan, paytaj tukuypa Tatanchej. Payllataj tukuyta kamachin, jinataj tukuy noqanchejnejta munasqanta ruwan, tukuypitaj kashan.

⁷ Chaywanpis Cristoqa munasqanman jina sapa ujninchejman ruwanapaj atiyta qowanchej.

⁸ Chayrayku Diospa Qhelqachisqanpi nin: Presochasqakunata paywan khuska apaspa, janaj pachaman wicharerqa, runakunamantaj ruwanapaj atiykunata qorqa, nispa.

⁹ Wicharerqa nispaqa, manachu niyta munan pay ñawpajta kay pachaman urayk'amusqanta?

¹⁰ Pichus urayk'amojqa, payllataj janajmantapis aswan pataman wicharerqa tukuy kaj chhikaman junt'aykunanpaj.

¹¹ Paymin wakinkunata churarqa kuraj kachankuna kanankupaj, wakintataj Diosmanta sut'inchajkuna kanankupaj. Wakinta churallarqataj sumaj willayta willajkuna kanankupaj, wakintataj iglesiata michejkuna, yachachejkuna ima kanankupaj.

¹² Paykunaqa Diospaj t'aqasqa kajkunata yachachispa wakichinanku tiyan, Diospa ruwananta ruwayta atinankupaj, ajinamanta Cristoj Iglesian wiñachisqa kananpaj. Iglesiaqa Cristoj ukhunmin.

¹³ Ajinata ruwana kanqa tukuyninchej uj runa jinalla Diospi atinikunaman chayananchejkama, jinataj Diospa Churinta allinta rejsinanchejkama. Ajinamantataj wiñay tukusqa runa jina kasunchej, imaynachus Cristo, ajinaman chayaspa.

¹⁴ Ajina kajtin, manaña wawa jinachu kasunchej, waj jinata yachachejkunawan wayrawan jina kayman jaqayman apaykachachikuspa. Mana jasallata apachikusunchejchu, pikunachus q'otiyanankupaj llullakushasqankuta misk'i simiwan sumajta pakanku, chaykunawan.

¹⁵ Manachayqa cheqa kajmanta munakuywan parlasunchej, ajinamanta tukuy imapi Cristoman rijch'akunanchejkama wiñananchejpaj. Cristoqa Iglesia nisqa ukhunpa umanmin.

¹⁶ Cristomin Iglesiamanta tukuy kajkunata sumajta ujchaykun, sapa uj imachus ruwanankuta ruwajtinku. Ajinamanta sapa uj imachus ruwananta junt'ajtin, wajkuna wiñanankupaj yanapan. Jina kajtintaj, tukuy ukhu qhalilla wiñan, munakuywantaj junt'asqa kashan.

Mosoj runa jina kawsana

¹⁷ Tukuyta Kamachej Jesuspa sutinpi kayta niykichej: Amaña Diosman mana kutirikojkuna jina purispa kawsaychejchu. Paykuna qhasi manakaj yuyasqankuman jina purinku.

¹⁸ Paykunaj yuyayninkoqa mana allin yuyaykunawan laqhayachisqa kashan. Chayrayku Diospa qosqan kawsaymanta karupi kashanku, rumi sonqo kasqankuraykutaj mana imatapis yachankuchu.

¹⁹ Jinallataj paykuna manaña imamanta p'enqakuspa, millayta ruwaspa purinaman qokunku. Astawanqa tukuy imaymana millay kajta ruwaspa, misk'irichikunku.

²⁰ Qankunarí, mana jinatachu Cristomanta yachaqakorqankichej.

²¹ Manachayqa paymanta willajta uyarerqankichej, munasqanman jinataj kawsayta yacharqankichej cheqa kajta yachachisqanman jina.

²² Chayrayku ñawpajta imaynatachus kawsaj kankichej, chayta saqespa, juchallispa purinaman qosqa sonqota wijch'uychej. Chay sonqoqa sajra munayninpa atipasqan, q'otiyasqantaj.

²³ Qankunarí Santo Espíritu yuyayniykichejta mosojyachinanta saqeychej.

²⁴ Jinataj Diosman rijch'akoj ruwasqa, chay mosoj runa kaywan p'achawan jina p'achallikuychej. Chay mosoj runaqa cheqanta ruwaspa purinapi, chantá cheqa kajman jina llimphu kawsanapi rikuchikun.

²⁵ Chayrayku llullakuyta saqespa, sapa ujpis runa masiykichejwan cheqa kajta parlaychej, imaraykuchus tukuy uj ukhullaman ujchasqa kanchej.

²⁶ Phiñakuspaqa, ama juchalliychejchu, manachayqa manaraj inti yaykushajtin, allinyakapuychej.

²⁷ Nillataj Kuraj Supay juchallinaman tanqaykusunaykichejta saqeychejchu.

²⁸ Pichus suwakojqa amaña suwachunchu, manachayqa allin kajta ruwaspa, kawsananpaj ganakuchun. Ajinata ruwajtin, qolqeyoj kanqa pisichikojta yanapariyta atinanpaj.

²⁹ Ama millay ch'ichi kajta parlaychejchu, manachayqa imachus allin kajllata. Ajina parlasqaykichejwan uyarisojkunata wiñanankupaj yanapankichej.

³⁰ Imaynachus purisqaykichejwan Diospa Santo Espiritunta ama llakichiychejchu, imaraykuchus paywan sellasqa kankichej jaqay jamoj p'unchaypi wiñay kawsaypaj kacharichisqa kanaykichejkama.

³¹ Qankunamanta tukuy jaya sonqo kayta, phiñakuyta, phiñasqalla puriyta ima wijch'uychej. Jinallataj qhaparqachayta, runata tumpayta, chantá tukuy imaymana mana allin puriyta ima wijch'ullaychejtaj.

³² Manachayqa ujkuna ujkunawan k'acha kaychej, khuyakuyniyojtaj. Chantá ujkuna ujkuna qhespichinakuychej, imaynatachus Diospis Cristonejta juchaykichejta pampacharqa, ajinata.