Efesios 3 - DIOSPA QHELQACHISQ

Mana judiokunaman Pablo Jesucristomanta willan

¹ Dios imatachus ruwasqanrayku kayta yachanaykichejta munani: Noqa Pablo carcelpi kashani, Jesucristoj kamachin kaspa, qankuna mana judío kajkunaman Jesusmanta sumaj willayta willasqayrayku.

² Qankuna yachankichejña imaynatachus Dios munakuwaspa kachamuwasqanta, imatachus pay wakichisqanmanta qankunaman willanaypaj.

³ Diosqa, imatachus wakichisqan pakasqa karqa, chayta rejsichiwarqa, noqataj chaymanta uj chhikanta qhelqarispa rejsicherqaykichejña.

⁴ Chayta ñawirispa, qankuna yachayta atinkichej imaynatachus noqa yachasqayta, Dios imatachus wakichisqanta Jesucristonejta junt'ananpaj, chay pakasqa yachaymanta.

⁵ Dios chay pakasqa yachayta mana ñawpa runakunaman rejsicherqachu. Kunanrí pay Santo Espiritunnejta chaykunata kuraj kachankunaman, chantá sut'inchajkunaman ima rejsichin.

⁶ Chay pakasqa wakichisqaqa kaymin: Jesucristoj sumaj willayninnejta mana judío kajkuna judiokunawan khuska qhespichisqa kanata jap'inkichej. Jinallataj judiokunawan uj ayllulla kankichej, chantá Dios imatachus qonanta nisqanta jap'illankichejtaj Jesucristoman ujchasqa kasqaykichejrayku.

⁷ Chay sumaj willayta willanaypaj noqa churasqa kani, Dios noqawan k'acha kasqanrayku, chantá khuyarikuwasqanrayku. Ajinata ruwaspataj, Dios may jina atiyniyoj kasqanta rejsicherqa.

⁸ Noqa Diospa tukuy ajllakusqanmanta aswan mana kasu ruwana kashajtiypis, Dios maypaj qhawawaspa, uj sumaj ruwanata qowarqa, Cristoj may qhapaj sumaj willayninta mana judiokunaman willanaypaj.

⁹ Jinallataj tukuy imata ruwaj Diosqa, imachus wiñaymantapacha pakasqa karqa, chay wakichisqanta tukuyman rejsichinaypaj kamachiwarqa.

¹⁰ Ajinamanta kunanqa janaj pachapi tukuy atiyniyojkuna, jinataj kamachejkuna ima iglesianejta Diospa imaymana yachayninta rejsenqanku.

¹¹ Chaykunata Dios wiñaymantapacha wakichisqa, chaytataj Tukuyta Kamachejninchej Cristo Jesusnejta junt'arqa.

¹² Ajinaqa Cristoman ujchasqa kasqanchejrayku, chantá paypi atinikusqanchejrayku noqanchej Diosman qayllaykuyta atinchej mana iskayrayaspa, nitaj manchachikuspa.

¹³ Chayrayku mañakuykichej qankunarayku ñak'arisqaymanta ama q'enaqakunaykichejta. Manachayqa ñak'arisqaymanta qankuna umata oqharinaykichej tiyan.

Cristoj munakuynin

¹⁴ Chayrayku qonqorikuspa, Tata Dioswan parlarikuni.

¹⁵ Paymin janajpi, chantá kay pachapipis tukuy kaj chhikata ruwarqa.

¹⁶ Dioswan parlarikuspataj, mañakuni Santo Espiritunejta jatun kayninpa qhapaj kayninman jina, chantá atiyninwan ima sonqoykichejta kallpachasunaykichejta.

¹⁷ Jinallataj mañapuykichej Cristopi atinikusqaykichejrayku payqa sonqoykichejpi tiyakunanta, ajinamanta Diosta munakusqaykichejpi, jinataj wajkunatapis munakusqaykichejpi sinch'ita sayanaykichejpaj.

¹⁸ Ajinamanta qankuna tukuy ajllasqakunawan khuska, Cristoj munakuynin may jinachus kasqanta yachayta atinkichej: Anchonman, sayt'unman, ukhunman, sayayninman ima.

¹⁹ Chantapis mañapullaykichejtaj Cristoj munakuyninta sumajta rejsinaykichejpaj, mayqenchus tukuy runaj yuyayninta atipan, chayta. Ajinamanta Diosmanta jamoj kawsaywan, chantá atiyninwan ima junt'asqa kayta atinkichej.

²⁰ Diosqa tukuy imata ruwayta atin, mañakusqanchejmantapis yuyasqanchejmantapis aswantaraj, noqanchejpi llank'ashan, chay jatun atiyninnejta.

²¹ Cristoj Iglesianmanta tukuy kajkuna, Cristoman ujchasqa kasqanchejrayku Diosta wiñay wiñaypaj yupaychana. Ajina kachun.