Eclesiastés 9 - DIOSPA QHELQACHISQ

Kawsaymanta wañuymantawan

¹ Noqa chay tukuy imata tukuy sonqo yachaj churakuspa, kayta repararqani: Cheqanta ruwaj yachayniyojkunaj ruwasqankoqa Diospa makinpi. Runaqa Diospa qayllanpi kashajtinpis, mana yachanchu imachus munakuy, chejnikuypis kasqanta.

² Tukuy runaj tukukuyninkoqa ujllapuni: Cheqan runapaj, mana cheqan runapaj, k'acha runapaj, mana k'acha runapaj, llimphupaj qhawasqa runapaj, mana llimphupaj qhawasqa runapajpis, uywa ñak'asqata jaywajpaj, mana jaywajpajpis, allinta ruwajkunapaj, mana allinta ruwajkunapajpis, tilojpaj, tiluyta manchachikojpajpis. Tukuy runapaj wañoyqa kallanqapuni.

³ Kay pachapi tukuy ima kasqanmanta kaymin mana allinchu: Tukuypaj tukukunankoqa uj rejllapuni. Ajina kashajtinpis, runa kawsanankama sonqonqa millay kawsaywan junt'a, wampu kaytaj umanpi junt'a kashan. Chaymantataj wañupojtin, payta aya p'ampanapi p'ampanqanku.

⁴ Chaywanpis tukuy kawsajpaj suyana kanraj, chayrayku nini: Uj kawsashaj alqoraj aswan allin kashan wañusqa leonmanta nisqaqa, nispa.

⁵ Kawsashajkunaqa wañunankuta yachakunku. Wañusqakunarí mana imatapis yachankuchu, nitaj imatapis suyankuñachu, imaraykuchus paykunaqa qonqayman churasqa kanku.

⁶ Wañojtinku, munakuyninku, chejnikuyninku, envidiakuyninku ima tukukapullantaj. Jinamanta kay pachapi manaña imatapis ruwaysikonqankuñachu.

⁷ Chayrayku qanqa kusisqa mikhuy, vinoykitapis tukuy sonqo ujyarikuy, imaraykuchus Diosqa ruwasqanchejta allin kasqanta nin.

⁸ Tukuy tiempopi sumaj p'achawan p'achallikuy, sumajta q'apaj jawinawantaj jawikuy.

⁹ Tata Dios kay pachapi pisi kawsallayta qosusqanrayku, munakusqayki warmiwan kawsakuspa, sapa p'unchay kusikuy. Chayllamin qanpaj kay pacha kawsayniykipi, sinch'ita llank'asqaykimanta t'inkaykeqa.

¹⁰ Imatachus ruwanaykita tukuy sonqoykiwan ruway, imaraykuchus wañuspa maymanchus rinki, chay ukhu pachapeqa manaña ima ruwanapis, ni yuyanapis, ni yachanapis, nitaj yachaypis kanqañachu.

Kawsaypi mana allin kajkunamanta

¹¹ Chay jawa ujtawan qhawaspa, kaytapis rikullarqanitaj: Kay pachapi mana usqhayta t'ijojkunachu sapa kuti atipanku, maqanakupitaj mana kallpayojkunachu. Yachajniyojkunapis wakin kuti mana mikhunayoj rikhurinku, nitaj allin yuyayniyojkunapis qhapajchu kanku, nitaj yachajkunapis sapa kuti jatunpaj qhawasqachu kanku. Manachayqa tiempo chayamojtin, wakinpaj allin tiempo chayamun, wakinpajtaj mana.

¹² Aswanpis runaqa mayk'ajchus tukukunanta mana yachanchu. Imaynatachus challwakuna ch'ipapi jap'ichikunku, imaynatatajchus phawaj p'isqokuna tojllaman urmanku, ajinallatataj runaqa mana yuyasqallamanta llakiypi jap'isqa rikhurin.

¹³ Kay pachapi ujta rikusqaymanta ashkhata yacharqani:

¹⁴ Uj juch'uy llajta karqa, chaypitaj pisi runalla karqa. Chay llajtaj contrantataj uj atiyniyoj kuraj kamachej jamuspa, chay llajtata jap'inanpaj muyuykorqa, perqanta wasaykunanpajtaj jatuchaj jallp'a moqokunata sayaricherqa.

¹⁵ Chay juch'uy llajtapi uj yachayniyoj wajcha runa tiyakorqa, paytaj yachayniyoj kasqanwan chay llajtata kacharichiyta aterqa. Chaywanpis wajchalla kasqanrayku mana pipis paymanta yuyarikorqachu.

Yachayniyoj kayqa aswan allinmin

¹⁶ Chantá noqa nerqani: Yachayniyoj kayqa astawan allinmin kallpayoj kanamanta nisqaqa. Chaywanpis wajcha runaj yachaynenqa pisipaj qhawasqa, nisqantataj ni pi kasuta ruwanchu.

¹⁷ Aswan walej yachayniyojpa llamp'u nisqanta uyarina, wampu runakunaj kuraj kamachejninkoj qhaparisqanta uyarinamanta nisqaqa.

¹⁸ Maqanakupaj armakunamanta nisqaqa, yachayniyoj kay aswan allin. Chaywanpis uj pantaylla ima allin kajtapis urmachin.