Eclesiastés 10 - DIOSPA QHELQACHISQ

Yachayniyoj kay ancha sumajmin

¹ Sumaj mikhunaman ch'uspi urmaykuspaqa, mikhunata millachikunaman tukuchin. Ajinallatataj uj chhikan mana yuyayniyoj kana, allinpaj qhawasqa kanata manakajpi rikhurichin.

² Yachayniyoj runaj sonqonqa allinman aysan, wampu runaj sonqonrí sajra kajman aysan.

³ Mana yuyayniyoj runaqa ruwasqanwan mana yachayniyoj kasqanta rejsichin, parlasqanwantaj mana yachayniyoj kasqanta rejsichikullantaj.

⁴ Sichus kamachej qanwan phiñarikun chayqa, imachus ruwanaykita ama saqeychu. Pacienciayoj kayqa jatunta pantaykunamanta jark'an.

⁵ Kay pachapi uj jatun pantayta rikuni, kamachejkunataj chayman rijch'akojta ruwanku:

⁶ Wampu runata jatun ruwanaman churanku, yachayniyoj runatatajrí juch'uy ruwanaman.

⁷ Ajinallataj wata runakunata caballopi purishajta rikuni, kamachejtataj wata runapis kanman jina chakipi purishajta.

⁸ Pipis t'oqota allajqa chayllamantaj urmaykonqa. Perqata jusk'ojtapis katari khanenqa.

⁹ Rumita ch'eqojqa chay rumillawantaj k'utuykuchikonqa. Llant'ata ch'ejtajqa chayllawantaj wajtakonqa.

¹⁰ Jacha mana filochasqa kajtenqa, ch'ejtanapaj aswan sinch'ita wajtana. Chayrayku jachataqa filochana tiyan. Jinallataj runayayta munanki chayqa, imachus ruwanaykita, allinta yuyaycharikuspa ruwanayki tiyan.

¹¹ Sichus katarita tusuchej runata katari khanin chayqa, katari tusuchej mana imatapis tarenqachu.

¹² Yachayniyoj runaj parlasqanqa uyarinapaj jina. Wampu runaj parlasqanrí payllatataj urmachin.

¹³ Chayrayku wampu runaqa qhasi manakaj imakunata thawtiyta qallarin, tukuntaj manakaj ni imapaj allin kajta parlaspa.

¹⁴ Wampu runaqa anchata parlan. Mana pipis yachanchu imachus qhepaman jamunanta. Pitaj ninman imachus qhepaman kanantari?

¹⁵ Wampu runa jump'i suruyta llank'asqanrayku, llajtanman rina ñantapis mana rejsinchu.

¹⁶ Ay, imachus kanqa mana yuyayniyoj kuraj kamachej suyuta kamachejtenqa, kurajninkunataj jatun mikhuykunallapi sut'iyaymantapacha kajtinkoqa.

¹⁷ Kusikuyniyojmin uj suyu kanqa, kuraj kamachejnin sumaj yuyayniyoj runa kajtin, kurajninkunataj maychus phaninpi kallpachakunankupaj mikhojtinku, manataj machakuyllapichu kajtinku.

¹⁸ Qhella runaj wasinpa qhatananqa urmaykun, qhella kasqanraykutaj tukuy wasin urmaykun.

¹⁹ Mikhuykunaqa kusikunapaj, vinotaj sonqota kusichinapaj. Qolqetajrí tukuy imata ruwanapaj allinmin.

²⁰ Ama sonqollaykipipis kuraj kamachejpaj sajrata rimaychu, nitaj wasiyki ukhullapipis qhapaj runapaj rimakuychu, imaraykuchus phawaykachaj p'isqokuna parlasqaykita willaykamunkuman.