Deuteronomio 3 - DIOSPA QHELQACHISQ

Israelitakuna Basán suyuta kuraj kamachejta atipanku

¹ Chaymanta llojsispa, Basanman rej ñanta jap'irerqanchej. Chantá Basanta kuraj kamachej Ogñataj tukuy soldadonkunawan ima Edreypi maqanakoj llojsimuwarqanchej.

² Tata Diostaj niwarqa: Ama paymanta manchachikuychu, imaraykuchus noqa payta, tukuy soldadonkunantinta, jallp'anta ima makiykichejman jaywaykusaj. Paytapis Jesbonmanta amorreokunaj kamachejninku Sijonta imaynatachus ruwarqanki, ajinallatataj ruwanki, nispa.

³ Ajinata Tata Diosninchejqa Basanta kuraj kamachej Ogtapis, tukuy soldadonkunata ima, tukuyninkuta tukuchinanchejkama yanapawarqanchej.

⁴ Chantá tukuy llajtankuta jap'ikaporqanchej, Argob jap'iypi, Basanta kamachej Ogpata kamachiyninpi kaj llajtakunaqa tukuyninpi sojta chunka karqa.

⁵ Tukuy chay llajtakunaqa sumaj perqawan muyurichisqa karqanku, chantá jatuchaj punkuyoj, sumaj wisq'anayoj ima. Mana perqawan muyurichisqachu karqanku chay llajtakunataqa mana yuparqanchejchu.

⁶ Imaynatachus Jesbonmanta kuraj kamachej Sijonpata tukuy llajtankunata thuñerqanchej, jinataj qharikunata, warmikunata, wawakunata ima tukuyninkuta wañucherqanchej, ajinallatataj Basanta kamachejtapis ruwarqanchej.

⁷ Noqanchejqa tukuy uywankukunawan, jinataj llajtakunapi imachus valorniyoj karqa, chayllawan qhepakorqanchej.

⁸ Ajinata chaypacha amorreokunaj iskaynin kuraj kamachejninkoj jallp'ankuta jap'erqanchej, Jordán mayoj inti llojsimuynejpi, Arnón mayumantapacha Hermón orqokama.

⁹ Hermón orqotaqa Sidón llajtayojkuna “Sirión”, nispa sutichasqanku, amorreokunataj “Senir”, nispa sutichasqanku.

¹⁰ Tukuy chay pampapi llajtakunata, tukuynin Galaadta, Basantawan, Salcakama, chantá Edreykama ima jap'ikaporqanchej. Chay llajtakunaqa Basanta kamachej Ogpa kamachiyninpi karqanku.

¹¹ Refaitakunamanta jatunkaray runakuna nisqamanta, Basanta kuraj kamachej Ogllaña qhepakorqa. Puñunanqa fierromanta ruwasqa karqa, sayt'unman tawa metro, kinrayninmantaj yaqha iskay metro jina. Chay puñunanqa kunankama amonitakunaj llajtanku Rabapi kakushan.

Jordán mayu chimpapi qhepakoj jatun ayllukuna

¹² Chay jap'isqanchej jallp'ata Aroerpi Arnón mayumantapacha, Galaad orqopi khuskanninkama, tukuy llajtantinta Rubén jatun aylluman, chantá Gad jatun aylluman ima qoporqani.

¹³ Manasés khuskan jatun ayllumantaj Galaad jap'iymanta khuskanta, tukuy Basán jap'iytawan ima qorqani. Chay jap'eyqa kamachej Ogpata karqa. Chaymanta tukuynin Argob jallp'atawan qollarqanitaj. Chaynejqa refaitakunaj jap'iyninkumanta rejsisqa karqa.

¹⁴ Manasespata churin Yairqa Argob nisqa cheqanejta, Gesurwan, chantá Macawan tinkuykama jap'erqa. Chantá Basán cheqanejta kikin sutillanwantaj suticharqa “Basán Havot Yaír”, nispa. Jinamanta chay cheqanejqa kunankama chay sutillawanpuni rejsisqa kashan.

¹⁵ Galaad cheqanejtataj Maquirman qoporqani.

¹⁶ Rubén jatun aylluman, Gad jatun aylluman ima Galaad cheqanejta, chantá Arnón mayuwan tinkuyta ima qorqani. Chaypa mojonnenqa khuskan vallemanta Jaboc mayukama rerqa. Chayqa amonitakunaj mojonninwan tinkuypi karqa.

¹⁷ Jinallataj Arabá cheqanejta chay jatun ayllukunaman qollarqanitaj. Chaynejqa Pisga orqo k'uchupi inti llojsimuynejpi kashan. Mojonnintaj Jordán mayu kashan, rishantaj Cineret qochamanta Wañusqa Qocha nisqakama.

¹⁸ Chaypacha kay jinata qankunata kamacherqaykichej: Tata Diosniykichej kay jallp'ata qankunaman qopusunkichej. Kunanqa tukuy maqanakuyta yachajkuna armaykichejta oqharikuspa, wawqeykichejkunaj ñawpaqenkuta puririychej.

¹⁹ Chaywanpis qorqaykichej chay llajtakunapeqa warmiykichej, wawaykichej, chantá uywaykichej imalla qhepakonqanku, imaraykuchus yachani qankunaqa ashkha uywayoj kasqaykichejta.

²⁰ Qankunarí wawqeykichejkunawan khuska rinaykichej tiyan, Tata Diosniykichej Jordán mayu chimpapi, qankunaman jina paykunaman jallp'ata qonankama. Chaymantaraj qankunaqa, qoykichej kay jallp'aman kutimpunkichej, nispa.

²¹ Chaypacha Josueta kay jinata kamachillarqanitaj: Tata Diosniyki chay iskay kuraj kamachejkunata imaynatachus ruwasqanta, qan kikiyki rikorqanki. Maynejmanchus chayanki, Tata Diosqa chaypi kuraj kamachejkunata kikillantataj ruwanqa.

²² Paykunamanta ama manchachikunkichejchu, imaraykuchus Tata Diosniykichejqa qankunarayku maqanakonqa, nispa.

Tata Dios nin Moisés Canaanman mana yaykunanta

²³ Chaypachallataj Tata Diosmanta mañakorqani:

²⁴ Tukuyta Kamachej Tata Diosníy, kamachiyki kani, qantaj may jatun kayniykita, jinataj may jina atiyniyoj kasqaykitawan rikuchiwayta qallarerqanki. Mana janaj pachapi, nitaj kay pachapipis qan jina waj dios kanchu, chay jina t'ukunata ruwajqa.

²⁵ Mañarikuyki: Ama jina kaspa, Jordán mayuta chimparichillaway ari. Noqaqa chay jina sumaj jallp'ata, k'achitu orqorara jallp'ata, chantá Libanotawan ima rikuyta munani, nispa.

²⁶ Tata Diostajrí qankunarayku mayta phiñakuwarqa, manataj mañakusqayta uyariwarqachu. Aswanpis niwarqa: Kaykamalla. Amaña chaymanta astawan parlawaychu.

²⁷ Chaywanpis Pisga orqo pataman wicharispa, chaymanta qan wichaynejman, uraynejman, inti llojsimuynejman, inti yaykuynejmanwan ima qhawanki. Jordán mayutarí manapuni chimpankichu.

²⁸ Qanqa Josueta yachachispa, sumaj sut'ita kamachiy, sonqochay, kallpachaytaj, imaraykuchus paymin israelitakunata pusanqa. Payqa, kunan rikunki, chay jallp'ata paykunaman rak'enqa, nispa.

²⁹ Chay jinamanta, Bet Pegorpa chimpanpi kashan, chay vallepi qhepakorqanchej.