Deuteronomio 12 - DIOSPA QHELQACHISQ

Diosta yupaychana cheqaqa ujlla

¹ Kaymin kamachisqakuna, yuyaychaykuna ima kanku. Chaykunata qankunaqa kawsanaykichej p'unchaykama junt'anaykichejpuni tiyan, ñawpa tataykichejkunaj Tata Diosnin qosunkichej chay jallp'api.

² Chay jallp'aman yaykuspaqa, chaypi llajtayojkunaj lantinkuta, chantá yupaychananku cheqakunata phirinkichej. Jinallataj jatuchaj orqokunapi, lomakunapi, chantá thansarara sach'a urapi kajkunata ima phirillankichejtaj.

³ Altarninkuta thuñinkichej, yupaychana ruminkuta p'akinkichej. Yupaychana k'ullunkutapis ninawan ruphaykuchinkichej, diosninkoj lantintapis p'akirankichej. Ajinata ruwaspa, chaynejmanta lantinkoj sutinkuta chinkachinkichej.

⁴ Qankuna Tata Diosniykichejta yupaychaspaqa, ama chay llajtayojkuna jinachu yupaychankichej.

⁵ Tata Diosqa Israelpata tukuy ayllun ukhupi uj cheqata ajllakonqa, qankuna chayman rispa, paypa sutinta yupaychanaykichejpaj.

⁶ Qankuna chay cheqallapi uywa ñak'asqata jaywaspa Diosman q'olachinkichej, chantá jaywanatapis payman jaywallankichejtaj. Apallankichejtaj chunkamanta ujta payman qonaykichejpaj, ofrendakunata, nisqaykichejta junt'aspa jaywanata, sonqomanta qoyta munaspa ofrendata, chantá wakaykichejmanta, ovejaykichejmanta phiwi uñankuta ima.

⁷ Chayllapitaj Tata Diosniykichejpa ñawpaqenpi tukuy aylluykichejwan khuska mikhunkichej. Ajinata ruwankichej llank'aspa, imatachus tarisqaykichejmanta kusikuspa, imajtinchus Tata Diosniykichejmin yanapasunkichej.

⁸ Chay jallp'apeqa imaynatachus kunan ruwashanchej ama jinata ruwankichejchu. Kunanqa sapa uj munasqaykichejta ruwashankichej.

⁹ Tata Diosniykichej samariyta tarinaykichejpaj qosonqachej, chay jallp'aman manaraj chayankichejchu.

¹⁰ Jordán mayuta chimpajtiykichej, Tata Dios qankunaman qosonqachej, chay jallp'api tiyakunkichej. Chaypi Tata Diosniykichej muyuyniykichejpi kaj awqaykichejmanta kacharichejtin, mana manchachikuspa tiyakunkichej.

¹¹ May cheqatachus Tata Dios sutin yupaychasqa kananpaj ajllakonqa chayman, kamachisusqayman jina tukuy imata Tata Diosman jaywanaykichejpaj apankichej: Q'olachisqa jaywanapaj uywakunata, sapa chunkamanta ujta jaywanata, ikhaspa jaywanata, Tata Diosman nisqaykichejta junt'anaykichejpaj sumajnin kaj jaywanata ima.

¹² Tata Diosniykichejpa ñawpaqenpi raymita ruwaspa, wawaykichejkunawan, chantá kamachiykichejkunawan ima mayta kusikunkichej. Jinallataj qankunawan tiyakoj levitakunawanpis kusikullankichejtaj, imaraykuchus paykunaqa mana qankuna jina jallp'ata jap'inkuchu.

¹³ Allinta qhawakuychej Tata Diosman uywa ñak'asqata q'olachispa jaywanataqa ama munasqaykichej cheqapi jaywanaykichejmanta.

¹⁴ Manachayqa ima jatun ayllupichus Tata Dios uj cheqata ajllakonqa, chayllapi Tata Diosman jaywankichej. Chaypimá qankunaqa imatachus kamachisqayta ruwankichej.

¹⁵ Chaywanpis llajtaykichejpi munasqaykichejman jina uywata ñak'aspa aychata mikhuyta atinkichej, Tata Diosniykichej mirachipusunanpaj yanapasusqanman jina. Llimphupaj qhawasqa, chayrí mana llimphupaj qhawasqa kashaspapis, tukuyniykichej aychata mikhuyta atinkichej, taruka aychapis kanman jina.

¹⁶ Chaywanpis yawartaqa amapuni mikhunkichejchu, manachayqa yakuta jina jallp'aman suruchinkichej.

¹⁷ Trigoykichejmanta, vinoykichejmanta, chantá aceiteykichejmanta ima sapa chunkamanta ujta Diosman qosqaykichejmanta ama llajtaykichejpi mikhunkichejchu. Jinallataj wakaykichejmanta, ovejaykichejmanta phiwi uñantapis, Tata Diosman qonaykichejta nisqaykichejmanta, chantá munaspalla ofrendata qonkichej, chaykunatapis nillataj llajtaykichejpi mikhuyta atinkichejchu.

¹⁸ Chaykunataqa Tata Diosniykichejpa ñawpaqenpi, may cheqatachus pay ajllakonqa, chaypi mikhuyta atinkichej wawaykichejwan, kamachiykichejwan khuska, jinallataj qankunawan tiyakoj levitakunawanpis. Ajinata llank'aspa, tukuy imata tarisqaykichejmanta mayta kusikunkichej.

¹⁹ Chaywanpis chay jallp'api tiyakunaykichej p'unchaykama, ama levitakunamanta qonqakunkichejchu.

²⁰ Tata Diosniykichej nisqanman jina, jallp'aykichejta jatunyachejtin, sichus aychata mikhuyta munankichej chayqa, munasqaykichejta mikhuyta atillankichej.

²¹ Ichapis Tata Dios sutinta churananpaj ajllakusqan cheqa qankunamanta karupi kanman. Jina kajtenqa, Tata Dios qosusqaykichej wakamanta, ovejamanta ima ñak'aspa, munasqaykichejman jina mikhuyta atinkichej, maypichus tiyakushankichej chaypi imaynatachus kamacherqaykichej, chayman jina.

²² Chay aychataqa taruka aychapis kanman jina mikhuyta atinkichej. Jinallataj llimphupaj qhawasqa, chayrí mana llimphupaj qhawasqa kashajkunapis, tukuyniykichej mikhuyta atinkichej.

²³ Chaywanpis yawartaqa ni ima kashajtin mikhunkichejchu, imaraykuchus kawsayqa yawarpimin kashan. Ajinaqa amapuni yawarta aychawan khuskataqa mikhunkichejchu.

²⁴ Manachayqa yawarta jallp'aman yakuta jina suruchinkichej.

²⁵ Amapuni yawarta mikhunkichejchu, qankunapis wawaykichejkunapis kusiy kawsayta rikunaykichejpaj. Yawarta mana mikhuspaqa, Tata Diospa munasqanta ruwashankichej.

²⁶ Tata Diospaj ofrendata t'aqasqaykichejta payman qonaykichejta nerqankichej, chaykunatawan apankichej, Tata Dios maynejpichus uj cheqata ajllakonqa, chayman.

²⁷ Chaypitaj Tata Diosniykichejpa altarninpi q'olachispa jaywanata jaywankichej. Chay jaywasqaykichej uywakunaj yawarnintataj Tata Diosniykichejpa altarninman jich'ankichej. Aychatatajrí mikhuyta atinkichej.

²⁸ Tukuy kamachisqayta kasuychej, junt'aychejtaj. Sichus Tata Diospa munasqanman jina allin kajta, cheqan kajtataj ruwankichej chayqa, qankunata, wawaykichejtapis allinpuni risonqachej.

Lantikunata mana yupaychanamanta

²⁹ Maypachachus Tata Diosniykichej chay jallp'amanta runakunata wijch'ojtin, qankuna jap'isqaykichej, chay jallp'api tiyakunkichej.

³⁰ Jina kajtin, allinta qhawakunkichej amapuni paykuna jina ruwanaykichejmanta. Pajtataj niwajchej: Imaynatachus kay llajtayojkuna diosninkukunata yupaychaj kanku, ajinallatataj noqanchejpis yupaychanachej, nispa.

³¹ Tata Diosniykichejtaqa ama chay llajtayojkuna imaynatachus diosninkuta yupaychanku jinataqa, yupaychankichejchu. Chay llajtayojkunaqa imatachus Tata Dios mana rikuyta atinchu, chay imakunata ruwaspa diosninkuta yupaychanku. Paykunaqa wawankutapis ninawan q'olachispa diosninkuman jaywanku.

³² 32 (13.1) Kay tukuy kamachisqayta junt'aychejpuni, ama yapaspa, nitaj chaymanta imatapis qhechuspa.