Deuteronomio 10 - DIOSPA QHELQACHISQ

Tata Dios israelitakunawan ujtawan tratota ruwan

¹ Chaypacha Tata Dios niwarqa: Qan kikiyki ch'eqospa, iskay p'alta rumita ruway, ñawpajta karqa, chaykunata jina. Jinallataj maderamanta uj cajonta ruwallaytaj chaykunata waqaychanapaj, chantá noqawan parlanaykipaj orqoman wicharimuy.

² P'akisqayki rumipi imachus qhelqasqa karqa, chayta noqa watej chay rumipi qhelqallasajtaj. Chaytataj cajonpi waqaychanki, nispa.

³ Jinata niwajtin, acacia k'aspimanta uj arcata ruwarqani. Ñawpajta jina ch'eqospa, p'alta rumikunatapis ruwallarqanitaj. Chaykunata oqhariykuspataj, ujtawan orqoman wicharerqani.

⁴ Chantá Tata Dios chay rumikunaman chunka kamachisqankunata qhelqallarqataj, tantasqa kashajtinchej orqopi nina chawpimanta imatachus parlamusorqachej, chaykunata. Chaymantataj chay rumikunata jaywawarqa.

⁵ Noqataj orqomanta urayk'amuspa, Tata Dios kamachiwasqanman jina, ruwasqay arcaman chay p'alta rumikunata churaykorqani. Kunankama chaypi kakushan, nispa.

⁶ Chantá israelitakunaqa Moseraman rinankupaj Berot Bené Yacanmanta purirerqanku. Chaypi Aarón wañuporqa, kikinpitaj ayanta p'amparqanku. Churin Eleazartaj cuentanmanta sacerdote kananpaj yaykorqa.

⁷ Chantá israelitakuna chaymanta puririspa, Gudgodaman chayarqanku, chaymantataj Jotbataman, maypichus ashkha yaku tiyan, chayman.

⁸ Chaypacha Tata Diosqa Leví jatun aylluta ajllakorqa Dioswan trato ruwasqa arcata apaykachanankupaj, jinallataj Tata Diospa ñawpaqenpi imachus ruwanankuta ruwanankupaj, chantá sutinpi israelitakunata saminchanankupaj ima. Chayta kunankama ruwashallankupuni.

⁹ Chayrayku levitakunaqa Tata Dios nisqanman jina, mana ayllu masinku jinachu jallp'ata jap'erqanku, imaraykuchus paykunaj chayaqenkoqa Tata Diosmin.

¹⁰ Noqaqa ñawpaj kutipi jina, tawa chunka p'unchayta, tawa chunka tutatawan orqopi kamorqani. Chay kutipipis Tata Dios uyariwaspa, manaña qankunata wañuchispa chinkachiyta munarqachu.

¹¹ Aswanpis pay niwarqa: Israelitakunata pusanaykipaj wakichikuy, ñawpa tatankukunaman tiluspa qonayta nerqani, chay jallp'ata jap'inankupaj, nispa.

Tata Dios imatachus munan

¹² Israelitakuna, qankunamanta Tata Diosniykichej imatataj mañakusunkichejri? Tata Diosqa kayllata ruwanaykichejta munan: Payta may jatun respetowan qhawanaykichejta, chantá kamachisqanta kasunaykichejta ima. Munallantaj payllata munakunaykichejta, tukuy sonqoykichejwan tukuy almaykichejwan ima yupaychanaykichejta.

¹³ Chantá pay munallantaj kunan kamachisqay kamachisqankunata, yachachiyninkunata ima junt'anaykichejta, tukuy imapi allin rinasuykichejpaj.

¹⁴ Kayta allinta yachaychej: Janajpis, janajmanta aswan pata kajpis, kay pachapis, kaypi imachus kajpis Tata Diosniykichejpatamin.

¹⁵ Chaywanpis Tata Diosqa qankunaj tataykichejta munakorqa, tukuy ayllu ukhumantataj paykunaj mirayninkuta ajllakorqa. Chaykunaqa qankuna kankichej, imaynatachus kunan rikushanchej, chay.

¹⁶ Chayrayku sonqoykichejmanta tukuy mana allin kajta wijch'uychej. Amataj mana uyarikuyta munaj k'ullu kaychejchu.

¹⁷ Tata Diosniykichejqa dioskunaj Diosnin, tukuy kamachejkunaj kamachejnintaj. Payqa kamachinanpaj mana pitapis tapunrajchu, jinallataj may atiyniyoj, manchachikunataj. Tukuyta uj rejllata qhawan, nitaj piwanpis lluk'ichikunchu.

¹⁸ Payqa wajcha wawapaj, warmisapapajpis justiciata ruwan. Jinallataj waj llajtayojkunata munakuspa, p'achata, mikhunata ima paykunaman qon.

¹⁹ Chayrayku waj llajtayojkunata munakuychej, qankunapis Egiptopi waj llajtayoj jina kasqaykichejta yuyarikuspa.

²⁰ Tata Diosniykichejta may jatun respetowan qhawaychej, pay sapallantataj yupaychaychej, payllatataj qhatikuychej. Tilunaykichej kajtenqa, paypa sutinta oqharispa tiluychej.

²¹ Payllamin yupaychanaykichejpaj jina, payllamin Diosniykichejqa, pichus rikushajtiykichej qankunarayku t'ukuna imakunata ruwarqa, chay.

²² Maypachachus ñawpa tataykichejkuna Egiptoman chayarqanku chaypacha, qanchis chunkalla karqanku. Kunanrí qankunata Tata Diosniykichejqa janajpi ch'askakunata jina, ashkhata mirachisunkichej.