Daniel (hebreo) 7 - DIOSPA QHELQACHISQ

Daniel mosqokun

¹ Babilonia suyupi kuraj kamachej Belsasar kamachiyta qallarisqan watapi, Daniel ujta mosqokorqa, chay mosqoypitaj tukuy imata rikorqa. Rijch'arispataj, mosqoypi jina rikusqanta qhelqarqa. Kaymin chay qhelqasqanqa:

² Noqa mosqoyniypi rikorqani mama qochata tukuynejmanta wayra qhollchoqeyachisqanta.

³ Chayllaman, mama qochamanta tawa jatuchaj animalkuna llojsimusqanku, sapa ujtaj waj jina rijch'ayniyoj kasqa.

⁴ Ñawpaj kaj leonman rijch'akusqa chaypis, anka lijrayoj kasqa. Qhawashajtillay, lijrankunata sik'iraspa, pampapi runata jina iskay chakimanta sayarichisqanku. Chaymantataj runaj yuyayninta payman qollasqankutaj.

⁵ Qhepa kaj animalqa jukumariman rijch'akoj phiña animal kasqa. Chay animalqa phawaykunanpaj jina sayashasqa. Siminpi kinsa wajtan tullu achurisqa kashasqa, uyarerqanitaj payman nishasqankuta: Riy, ashkha aychawan sajsamuy, nispa.

⁶ Kinsa kaj animalqa ch'ejchi leonman rijch'akusqa, wasanpitaj tawa lijrayoj kasqa. Chantapis tawa umayojllataj kasqa, paymantaj runakunata kamachinapaj atiyta qosqanku.

⁷ Chantá tawa kaj animalta rikorqani, chaytaj ancha mancharina jina kasqa, manchachikunapaj jinapuni, manchay kallpayojtaj. Jatuchaj fierromanta kirunkunawan tukuy imata chhikan chhikanta mithaspa mikhukapusqa, puchojtataj chakinwan sarurasqa. Kay tawa kaj animal mana chay waj animalkunaman rijch'akusqachu. Umanpipis chunka wajrayoj kasqa.

⁸ Chay wajrakunata qhawashajtiy, chawpinkumanta juch'uy wajrata p'utumojta rikorqani. Chantá chay juch'uy wajra wiñananpaj kinsa wajrakuna sik'irasqa kasqa. Chay juch'uy wajraqa runaj ñawinman rijch'akoj ñawiyoj kasqa, siminwantaj may jinata runaykachaspa parlasqa.

Diospa Juicion

⁹ Qhawashallajtiypuni, kamachina tiyanakuna churasqa kasqanku. Chantá Wiñaymantapacha Kajqa chaypi tiyarikusqa. Paypa p'achan rit'i jina yuraj kasqa, umanpi chujchantaj yuraj rit'i millma jina kasqa. Kamachina tiyanaj ruedankunapis lawraj nina jina kasqanku,

¹⁰ ñawpaqenmantataj uj nina mayu llojsisqa. Waranqa waranqa angelkuna munayninta ruwanankupaj wakichisqa kashasqanku, ñawpaqenpi sayashajkunataj mana yupay atina kasqanku. Chantá chay Juezqa juzgayta qallarinanpaj tiyaykusqa, qhelqakunataj kicharisqa kasqa.

¹¹ Ajinata qhawashaspapuni, noqa chay juch'uy wajrata uyarerqani mayta jatunchakuspa t'ukuna imakunata parlashajta. Chantá qhawashajtillayraj, manchachikuna animalta wañuchisqanku. Chaymantataj ukhunta mitharaytawan, ninaman choqaykusqanku q'olachisqa kananpaj.

¹² Ajinallatataj chay ujkuna animalkunamantapis kamachina atiyninkuta qhechusqanku. Chaywanpis wañunanku p'unchay chayamunankama, paykunata kawsajta saqellasqanku.

¹³ Chay tutapi mosqoypi jina rikusqayta qhawashaspallapuni, runaj churinman rijch'akojta phuyu chawpipi jamushajta rikorqani. Payqa, maypichus Wiñaymantapacha Kaj kasharqa, chayman risqa, paytataj Wiñaymantapacha Kajman qayllachisqanku.

¹⁴ Chantá payman qosqanku tukuy atiyta may jatunchasqa kananpaj, tukuy kaj chhikata kamachinanpaj ima, ajinamanta tukuy suyukunamanta kajkuna, tukuy parlayniyoj kajkuna ima kamachiyninpi kanankupaj. Chaymantapachataj wiñaypaj kamachenqa, kamachinantaj mana jayk'ajpis tukukonqachu.

¹⁵ Chantá noqa Daniel, chay tukuyta rikuspa, mayta llakikorqani sonqoypitaj pawichikorqani.

¹⁶ Chayrayku pikunachus chaynejpi sayarasharqanku, chaykunaman qayllaykuspa, ujnin kajta nerqani: Ama jina kaspa, kay tukuy rikusqayta sut'inchaway, nispa.

¹⁷ Paytaj kutichiwarqa: Kay tawa jatuchaj animalkuna tawa kamachejkunawan ninakunku. Paykuna tukuy kay pachapi kamachenqanku.

¹⁸ Chay qhepatarí Patapi Kaj Dios ayllunman kamachina atiyta qonqa, paykunataj wiñaypaj kamachenqanku, nispa.

¹⁹ Chantá noqa astawan tawa kaj jatun animalmanta yachayta munarqani. Chay animalqa waj jinapuni kasqa chay ujkunamanta nisqaqa, imaraykuchus rijch'aynenqa ancha manchanapuni kasqa. Kironqa fierromanta kasqa, sillunpis broncemanta. Jinataj tukuy imata mikhukapusqa, chhikan chhikanta mitharaspa, puchojtataj chakinwan sarurasqa.

²⁰ Munallarqanitaj astawan yachayta chay chunka wajrakunamanta, juch'uy kaj wajramantawan, mayqenchus ñawiyoj kasqa, runaykachaspataj jatuchaj imakunata parlasqa, chaymanta. Chay juch'uy wajra wiñananpaj, kinsa wajrakuna sik'isqa kasqanku, chay wajrataj chay ujkunamanta astawan jatunman rijch'awarqa.

²¹ Chantá qhawashajtiy, chay wajraqa Diospa ayllunpa contranta maqanakuspa, paykunata atipashasqa.

²² Chayllapi Wiñaymantapacha Kajqa ayllunpaj justiciata ruwananpaj chayamorqa, imaraykuchus Diospa ayllun kamachiyta jap'inankupaj p'unchay chayamusqaña.

²³ Chantá pay sut'inchawarqa: Tawa kaj animalqa tawa kaj suyuwan ninakun, chay suyutaj tukuy kay pachapi kamachenqa. Chantá chay ujkunamanta waj jina kaspa, paykunata oqoykonqa, saruraspataj phiriykonqa.

²⁴ Chay chunka wajrakunataj chunka kuraj kamachejkunawan ninakunku, chaykunataj chay suyupi kamachenqanku. Paykunaj qhepankutarí waj kuraj kamachejñataj rikhurimonqa. Chay kuraj kamachejtaj waj jinapuni kanqa, ñawpajta karqanku, chaykunamanta nisqaqa. Payqa chay chunka kuraj kamachejkunamanta kinsata chinkachenqa.

²⁵ Chantá janaj pachapi kaj Diospa contranta rimanqa, Diospa aylluntapis ñak'arichillanqataj. Jinallataj Diospa kamachisqankunata, rayminkunata ima waj jinaman tukuchiyta munanqa. Ajinamanta Diospa ayllun kinsa wata khuskanniyojta makinpi kanqa.

²⁶ Chantá payta juzganqanku, chay kuraj kamachejpa atiyninta qhechojtinkutaj, pay wiñaypaj chinkachisqa kanqa.

²⁷ Chantá kay pachapi kamachinapaj atiywan, kallpawan, jatunchasqa kaywan ima Patapi Kaj Diospa ayllunman qosqa kanqa. Paypa kamachiynenqa wiñaypaj kanqa, jinataj kay pachapi kaj chhika suyukuna payta kasonqanku, munaynintataj ruwanqanku, nispa.

²⁸ Kaypi willawasqan tukukun. Noqa Danielrí chay imakunapi yuyarispa, may phutisqa kasharqani, uyaypis waj jinaman tukorqa. Chaywanpis imatachus tukuy rikusqayta sonqollaypi jallch'arqani.