Daniel (hebreo) 12 - DIOSPA QHELQACHISQ

Tukukuy p'unchay

¹ Chantá Israel suyuta qhawaj angelkunata kamachej Miguel rikhurimonqa. Chaypachaqa may sinch'i llakiy kanqa. Chay jina llakeyqa runa kasqanmantapacha manapuni jayk'ajpis karqachu. Chaywanpis chaypachaqa Israel aylluykimanta pikunachus p'anqapi sutinku qhelqasqa kajkuna qhespichisqa kanqanku.

² Wañusqakunamanta ashkha kawsarimonqanku, ujkunaqa wiñayta kawsanankupaj, wakinkunataj wiñay p'enqaypi, phutiypitaj kanankupaj.

³ Chantá yachayniyoj runakunaqa janajpi k'anchay jina k'anchanqanku, ashkha runaman cheqanta ruwaspa puriyta yachachejkunataj wiñaypaj ch'askakuna jina lliphipirenqanku.

⁴ Qantajrí Daniel, kay imakunata sonqollaykipi jap'iy, tukukuy p'unchay chayamunankamataj chay p'anqata sellaykuy. Ashkha runakuna kayman jaqayman phawarenqanku, tukuy imamanta astawan yachayta munaspa, nispa.

⁵ Noqa Daniel qhawashaspa, waj iskay runakunata rikorqani, mayoj sapa chimpanpi sayashajta.

⁶ Ujnintaj taporqa linomanta p'achayoj runata, pichus yaku patapi sayashajta: Mayk'ajtaj kay t'ukuna imakuna tukukonqari? nispa.

⁷ Jinapi linomanta p'achayoj runa iskaynin makinta janajman oqharerqa, wiñaypaj kawsaj Diospa sutinpi tiluspataj, nerqa: Kinsa wata khuskanniyojkama, maypachachus Diospa ayllun phirisqa kanan tukukonqa chaypacha, kay tukuynin imakunapis tukukullanqataj, nispa.

⁸ Noqa imatachus nishajta uyarerqani chaypis, mana imatapis entienderqanichu. Chantá tapurerqani: Wiraqochíy, kay tukuy imamanta qhepaman imataj kanqari? nispa.

⁹ Paytaj niwarqa: Daniel, imaynachus kakunaykita kakullay, imaraykuchus kay imakunamanta ni pi yachananchu tiyan tukukuy p'unchay chayamunankama.

¹⁰ Willasqayman jina ashkha ñak'arenqanku, chaymantataj llojsenqanku allinchasqa, llimphuchasqataj. Millayta ruwaj runakunarí millayta ruwaspa purillanqankupuni, manataj imatapis entiendenqankuchu. Yachayniyoj runakunarí tukuy imata reparanqanku.

¹¹ Waranqa iskay pachaj jisq'on chunkayoj p'unchaykuna kanqa, Diosman sapa p'unchay jaywana kajta saqechisqankumantapacha Diospa Templonpi millachikunapaj jaywasqankumantawan.

¹² Kusikuyniyojmin kanqa, pichus 1.335 p'unchay junt'akunankama Diospi atinikuspa suyajqa.

¹³ Qantaj, Daniel, wañunayki p'unchaykama allinta kawsakuy. Qhepanejmantaj t'inkaykita jap'ikapunaykipaj kawsarimunki, nispa.