Daniel (hebreo) 11 - DIOSPA QHELQACHISQ

Egiptota kuraj kamachejkuna, Siriata kuraj kamachejkuna ima

¹ Media suyupi kuraj kamachej Darío uj watataña kamachishajtin, noqa payta kallpacharqani, yanaparqanitaj.

² Kunantaj cheqa kajta willasqayki: Persia suyuta kinsa kuraj kamachejkunawanraj kamachenqanku. Paykunaj qhepankutataj tawa kaj kuraj kamachej kamachenqa. Payqa ñawpaj kuraj kamachejkunamantaqa aswan qhapaj kanqa. Chantá qhapaj kayninwan atiyniyoj kasqanta rikukuspa, Grecia suyoj contranta wajkunata oqharichenqa.

³ Chay qhepanta waj wapu kuraj kamachej rikhurenqa, suyunta jatunyachispataj, chayta kamachenqa munasqanta ruwaspa.

⁴ Chaywanpis suyun sumaj sayachisqaña kajtenqa, thuñisqa kanqa, chaymantataj tawaman t'aqasqa kanqa. Chay kuraj kamachejpa atiynenqa mana mirayninmanchu qosqa kanqa, nillataj suyunpis ñawpajta jina chhika atiyniyojchu kanqa, imaraykuchus t'aqasqaña kanqa, paypa cuentanmantataj wajkuna kamachenqanku.

⁵ Chantá uraynejmanta kaj kuraj kamachejqa may atiyniyojman tukonqa. Chaywanpis soldadonkunata kamachejkunamanta ujnin kaj chay kuraj kamachejmanta aswan atiyniyojman tukonqa, jinataj jatun atiyninwan tukuy suyuta kamachenqa.

⁶ Chantá mana unaymantachu iskayninku uj tratota ruwanqanku: Uraynejmanta kaj kuraj kamachejqa ususinta casarachenqa wichaynejmanta kaj kuraj kamachejwan, iskaynin suyukuna allinpi kawsanankupaj. Jinapis chay ruwasqankoqa qhasiman tukonqa, imaraykuchus chay warmi, churinkuna, qosan, jinallataj kamachinkunapis wañurachisqa kanqanku.

⁷ Chay tukuywanpis, kikin ayllunmanta ujnin kaj sayaykonqa, wichaynejmanta kaj soldadokunawan maqanakunanpaj. Chantá kuraj kamachejpa pukaranta jap'enqa, paykunawan maqanakuspataj, atipanqa.

⁸ Astawanpis, payqa Egiptoman kutirispa, wichaynejmanta kaj kuraj kamachejpa diosninkunata, metalmanta ruwasqa lantikunata, qorimanta, qolqe metalmanta ruwasqa valorniyoj imakunatawan apakaponqa. Chantá unay watata iskaynin suyukuna mana maqanakuspalla kawsanqanku.

⁹ Chay qhepata wichaynejmanta kaj kuraj kamachejqa uraynejpi kaj suyuman soldadonkunawan junt'aykonqa. Jinapis mana atipayta atispa, llajtanman kutiriponqa.

¹⁰ Chaywanpis wichaynejmanta kuraj kamachejpa churinkuna maqanakupaj wakichikonqanku, ashkha soldadotataj tantaykonqanku. Paykunamanta ujnintaj soldadonkunawan khuska uray kaj suyuman yaykonqa, mayuta wasaykoj yaku jina tukuyninta phiriykuspa. Chay suyupi sinch'ita maqanakuspataj, kamachina wasikama chayanqanku.

¹¹ Jinapi wichaynejmanta kuraj kamachejpa churinkuna suyunman yaykusqankurayku, uraynejpi kaj kuraj kamachejqa manchayta phiñarikonqa. Chantá chay ashkha soldadokunaj contrankuta maqanakoj rispa, paykunata atipaykonqa.

¹² Chay jinata atipasqanrayku mayta jatunchakonqa, chantá may chhika runakunatawan wañurachenqa. Chaywanpis atiynenqa mana unaypajchu kanqa.

¹³ Aswan qhepamanqa wichaynejmanta kaj kuraj kamachej ujtawan ñawpajmanta nisqa astawan ashkhata soldadokunata tantaykonqa. Jinaytawantaj mana unayninmanchu ujtawan maqanakoj sayaykullanqataj sumaj wakichisqa ashkha soldadokunawan.

¹⁴ Chaypacha, uraynejpi kaj kuraj kamachejpa contranta ashkha oqharikonqanku. Israelitakuna ukhumanta wakin millay runakunantin oqharikullanqankutaj, mosqoypi jina rikusqata junt'akunanpaj. Chaywanpis mana atenqankuchu.

¹⁵ Chantá wichaynejmanta kaj kuraj kamachej jamuspa, jark'achasqa llajtaj muyuyninpi jallp'a moqota oqharenqa, llajtatataj jap'enqa. Uraynejmanta kaj kuraj kamachejtaj mana imanaytapis atenqachu, nitaj aswan wapu kaj soldadonkunapis wichaynejmanta kaj kuraj kamachejta jark'ayta atenqankuchu.

¹⁶ Wichaynejmanta kaj kuraj kamachejqa ñawpajman rispa, munayninta ruwanqa, nitaj pipis contranpi sayaykoj kanqachu. Risqanpitaj may sumaj Israel suyuman chayanqa. Jinapitaj chay suyuta phiriyta munanqa.

¹⁷ Chantá uraynejpi kaj kuraj kamachejwan parlanakuspa, tukuynin suyuta jap'inanpaj wakichikonqa. Chaypajtaj chay kuraj kamachejwan uj tratota ruwanqa. Chay suyuta jap'iyta munaspataj, ujnin ususinta chay kuraj kamachejwan casarachenqa. Yuyaychakusqantajrí qhasi manakajman tukonqa.

¹⁸ Chaymantataj wichaynejmanta kaj kuraj kamachejqa Jatun qochaj kantunpi llajtakunaj contrankupiñataj maqanakonqa, chay llajtakunamantataj ashkhata atiyninpi jap'enqa. Chaywanpis waj atiyniyoj kamachej runaqa chay machu machu kayninta chinkachenqa, wichaynejmanta kaj kuraj kamachejtataj p'enqaypi rikhurichenqa.

¹⁹ Chantá chay kuraj kamachejqa llajtanpi sumaj jark'achasqa pukarankunaman kutiponqa. Jinallapi imanakuspa wañonqa, manataj pipis paymanta yuyarikonqachu.

²⁰ Chay kuraj kamachejpa cuentanmanta waj kuraj kamachejñataj sayarenqa, paytaj runankunata impuestota mañamojta kachanqa, suyunta qhapajyachinanpaj. Chantá mana unayninmanchu wañuchisqa kanqa, mana ch'ajwapichu, nitaj maqanakupichu.

²¹ Paypa qhepanta uj millay runa sayarenqa, pichus mana kuraj kamachejchu kanan karqa, chay. Paytajrí sajra yuyayninta mana sut'inchaspalla, misk'i simiwan ch'awkiyaspa kamachenqa.

²² Contranpi sayaykoj soldadokunata tukuyninkuta chinkachenqa, jinallatataj tratota ruwajtapis wañuchillanqataj.

²³ Q'otiyallanqataj paywan tratota ruwajkunatapis, chantá pisi soldadokunawan kashaspapis, atipanqa.

²⁴ Mana pejpa yuyasqallan aswan sumaj jallp'akunaman jap'ej yaykonqa. Payqa ni mayqen ñawpa tatankunaj ruwasqankuta ruwanqa. Soldadonkunaman maqanakupi qhechusqanmanta rak'iranqa. Chaymantataj wakichikonqa sumaj jark'achasqa llajtakunawan maqanakoj yaykunanpaj, chaytajrí mana unaypajchu kanqa.

²⁵ Chay millay kamachejqa atiyniyoj kasqanpi jap'ikuspa, uraynejpi kaj kuraj kamachejpa contranta ashkha soldadonkunawan maqanakoj yaykonqa. Uraynejpi kaj kuraj kamachejtajrí kutichikuspa, may ashkha soldadonkunawan maqanakoj sayaykonqa. Chaywanpis mana atipayta atenqachu, imaraykuchus kikin soldadonkunallanmantataj wakinkuna payta wasanchanqanku.

²⁶ Paypa wasinpi mikhojkunallataj payta wañuchenqanku. Soldadonkunataj atipasqa kaspa, ashkha wañuchisqa kanqanku.

²⁷ Chay iskaynin kuraj kamachejkuna paykunapura mana allin kajta ruwanakuyta yuyashaspa, khuska mikhunankupaj tiyaykonqanku. Chaypitaj llullata purajmanta ninakonqanku. Chaywanpis mana mayqenninkoj yuyasqanku junt'akonqachu, imaraykuchus manaraj tiempo chayamunchu.

²⁸ Chantá wichaynejmanta kaj kuraj kamachejqa, tukuy imata qhechusqanta apakapuspa, suyunman kutiponqa. Suyunman kutipoj jina, pay wakichikonqa, pikunawanchus Dios may llimphu tratota ruwasqa, chay runakunaj contranta sayaykuyta. Ajinamanta manaraj suyunman kutipushaspa, paykunata sonqo nanayta ñak'arichenqa.

²⁹ Chay tiempo chayamojtintaj, wichaynejmanta kaj kuraj kamachejqa uraynejpi kaj kuraj kamachejpa contranpi maqanakoj renqa. Chay maqanakupitajrí, mana ñawpajta jina atipayta atenqachu.

³⁰ Manachayqa inti yaykuynejmanta soldadokuna barcokunapi jamuspa, paypa contranpi maqanakonqanku, paytaj manchachikuspa ayqenqa. Chaymanta may phiñasqa kaspataj, phiñakuyninta thasnonqa Diospa may llimphu tratoyojkunapi. Jinallataj pikunachus tratota wasanchajkunata t'inkachenqa.

³¹ Chaypachaqa paypa soldadonkuna Diospa Templonta millachikunaman tukuchenqanku, jinallataj sumaj jark'achasqa wasikunatapis. Diosman sapa p'unchay q'olachispa jaywanatapis sayachenqanku, cuentanmantataj millachikunata jaywanqanku.

³² Chay kuraj kamachejtaj misk'i simiwan, pikunachus tratota p'akerqanku, chaykunaj sonqonkuta suwanqa. Diosta munakojkunatajrí sinch'ita sayaspa, paywan churanakonqanku.

³³ Yachayniyojkunaqa ashkha runakunata yachachenqanku. Chay yachayniyojkunamantatajrí wakinta wañuchenqanku, wakintataj ruphachenqanku, wakinmantataj kapuyninkuta qhechonqanku, wakinkunatataj waj suyukunaman apanqanku. Chaywanpis chayqa mana unaypajchu ajina kanqa.

³⁴ Ajina ñak'arichisqa kashajtinku, wajkuna pisillata paykunata yanapanqanku, paykunaman k'askakojkunataj mana sonqomantachu k'askakonqanku.

³⁵ Chay yachayniyojkunamantataj wakinkuna qhatiykachasqa kanqanku. Ajina ñak'ariynejta paykuna llimphuchasqa, sumajyachisqa, yurajyachisqataj kanqanku.

³⁶ Wichaymanta kaj kuraj kamachejqa munasqanta ruwanqa. Maytapuni jatunchakonqa, jinataj tukuy dioskunamanta aswan kasqanta yuyakonqa. Cheqan kaj Diospa contrantapis manchay millayta parlallanqataj. Paytataj tukuy imapi allin renqa, Dios payta jasut'inankama, imaraykuchus imatachus Dios ruwanan karqa, chayta junt'anqapuni.

³⁷ Manchaytapuni jatunchakuspataj, chay kuraj kamachejqa ñawpa tatankunaj diosninkuta mana kasuta ruwanqachu, ni warminkunaj yupaychasqanku diosninkuta, nillataj waj dioskunatapis kasonqachu. Manachayqa paylla tukuymanta aswan kasqanta yuyakonqa.

³⁸ Aswanpis payqa pukarakunaj diosninta yupaychanqa. Ñawpa tatankunaj mana rejsisqan diosta qoriwan, qolqe metalwan, lliphipirej rumiwan, chantá ashkha valorniyoj imakunawan yupaychanqa.

³⁹ Ajinamanta karu suyoj diosninpa yanapayninwan mink'aspa, may sumaj jark'achasqa llajtakunata atipanqa, jap'enqataj. Pikunachus payman k'umuykukonqanku, chaykunata jatunpaj qhawanqa, kamachejkunapajtaj paykunata churanqa. Jinallatataj jallp'ata paykunaman rak'iraspa t'inkachenqa.

⁴⁰ Chantá tukukuy tiempo chayamojtin, uraynejmanta kaj kuraj kamachej wichaynejmanta kaj kuraj kamachejpa contranpi llojlla para yaku jina junt'aykonqa. Wichaynejmanta kaj kuraj kamachejtajrí kaymanta jinalla tukuy atiywan llojsenqa, uraynejmanta kaj kuraj kamachejpa contranpi maqanakunapaj carretakunawan, caballopi purej soldadokunawan, ashkha barcokunawan ima.

⁴¹ Israelpa may sumaj jallp'anmanpis yaykuykullanqataj, chaypitaj ashkha runakunata wañurachenqanku. Chaywanpis Edompi tiyakojkunawan, jinallataj Moabpi tiyakojkunawan, Amonpi tiyakojkunamanta kuraj ima makinmanta llusp'enqanku.

⁴² Chaywanpis pay waj suyukunamanpis atipaspa, yaykuykullanqataj, ni Egipto suyullapis llusp'enqachu.

⁴³ Chantá Egiptomanta qorita, qolqe metalta, tukuy k'acha valorniyoj tiyapuyninta apakaponqa. Chaymanta qhepamantaj Libiamanta, Etiopiamanta ima tukuy imankuta apakapullanqataj.

⁴⁴ Jinapi inti llojsimuynejmanta, wichaynejmantawan mana allin willaykunata uyarispa, wichaynejmanta kaj kuraj kamachej mancharenqa. Chaymanta may phiñasqa llojsenqa, ashkhata wañurachiyta munaspa.

⁴⁵ Chay kuraj kamachejqa toldonkunata sayaykuchenqa, mama qochawan, Diospaj t'aqasqa orqowan, chay chawpipi. Chaypitaj wañunan p'unchay chayamonqa, manataj pipis payta yanapaj kanqachu.