Daniel (hebreo) 10 - DIOSPA QHELQACHISQ

Daniel mosqoypi jina mayupi rikusqan

¹ Persiamanta kaj Ciro kinsa watataña kamachishajtin, noqa Beltsasar nisqa Daniel mosqoypi jina ujta rikorqani. Chay junt'akunanpuni karqa chaypis, imatachus niyta munasqan mana sut'inchanapaj jinallachu karqa. Chay tukuywanpis, noqa mosqoypi jina rikusqaypi sumajta unancharqani, jinataj yachayta aterqani imatachus niyta munasqanta.

² Chaypacha noqa Daniel kinsa semana junt'ata manchay llakisqa kasharqani.

³ Mana sumaj mikhuyta nitaj aychatapis mikhorqanichu, nillataj vinotapis ujyarqanichu. Nillataj, kinsa semana junt'akunankama sumaj q'apashaj jawinawanpis jawikorqanichu.

⁴ Wata qallariy killapi, iskay chunka tawayoj p'unchaypi, Tigris nisqa jatun mayu kantupi sayasharqani.

⁵ Qhawarispataj, rikorqani uj runata, linomanta ruwasqa p'achayojta, may sumaj qorimanta ruwasqa chumpiwan chumpiykukusqata.

⁶ Ukhonqa topacio rumi jina lliphipirerqa, uyantaj lliuj lliuj jina k'ancharerqa. Ñawenqa nina lawray jina karqa. Makinpis, chakinpis bronce jina lliphipisharqanku. Parlasqantaj ashkha runaj parlasqankuman rijch'akorqa.

⁷ Mosqoypi jina rikhuriwajtaqa noqalla rikorqani. Noqawan kasharqanku, chay runakunarí ni imata rikorqankuchu, imaraykuchus mayta mancharikuspa pakakoj ayqerqanku.

⁸ Ajinata mosqoypi jina rikhuriwajta qhawaspa, sapallay kasharqani. Chantá kallpay pisiyarqa, uyaypis q'elluyarqa.

⁹ Chay runata parlajta uyarispataj, yuyayniy chinkawasqanrayku pampaman choqakorqani.

¹⁰ Chayllapi chay runa makinwan llankhawaspa, aysariwarqa. Chantá qonqorichiwaspa, makiywan pampaman tawnaykuchiwarqa.

¹¹ Chantá niwarqa: Daniel, Diospa manchay munakusqan kaj runa, allinta uyariway imatachus nisunayta: Sayarikuy, imaraykuchus Dios chaypajmin qanman kachamuwarqa, nispa. Chayta niwajtintaj, noqa mancharisqa kharkatitispa ima sayarerqani.

¹² Chantá niwarqa: Daniel, ama mancharikuychu. Qanqa ñawpaj p'unchaymantapacha, mana entiendey atina imakunata yachayta munaspa, Diosman k'umuykuyta yuyaychakorqanki. Chaymantapacha Diosqa mañakusqaykita uyarishasorqa, chayraykutaj noqa jamuni.

¹³ Jinapis, Persia suyuta qhawaj millay angelqa iskay chunka p'unchay junt'ata jark'awarqa. Chaywanpis angelkunamanta kuraj kaj ángel Miguel sutiyoj noqata yanapanawanpaj jamorqa. Chantá noqa sapallay Persiamanta kaj kamachejkunawan khuska qhepakorqani.

¹⁴ Noqa jamuni willasunaypaj qhepanejman llajta masiykikunaman imachus jamunanmanta. Imatachus rikusqaykeqa, chay p'unchaykunamantamin willashan, nispa.

¹⁵ Chayta nishawajtenqa, pampa qhawarisqa, ni imata parlarispa kasharqani.

¹⁶ Chantá runaman rijch'akojqa simiyta llankhariwarqa. Chantá, ñawpaqeypi kasharqa, chayman nerqani: Wiraqochíy, mosqoypi jina rikusqayqa mayta llakichiwan, mana kallpayojmantaj tukuchiwan.

¹⁷ Imaynatataj qanwan parlayta atiyman, kay jina mana kallpayoj kashaspa, samayniypis pisiyashawajtinri? nispa.

¹⁸ Chantá runaman rijch'akoj ujtawan llankhariwaspa, mosoj kallpata qowarqa.

¹⁹ Paytaj niwarqa: Ama manchachikuychu, nitaj llakikuychu. Diosmin munakusunki. Kallpachakuspa, sonqochakuy, nispa. Chantá pay parlashawajtillanraj, reparakorqani watejmanta kallpayoj kasqayta. Chantá nerqani: Wiraqochíy, parlaykuway, imaraykuchus watej kallpayta kutichipuwankiña, nispa.

²⁰ Chantá nillawarqataj: Yachankichu imaraykuchus watukusoj jamusqayta? Kunanqa Persia suyoj kamachejninta qhawaj angelwan maqanakoj kutisaj. Chaypachataj Grecia suyoj kuraj kamachejninta qhawaj angelñataj jamonqa.

²¹ Kunanrí imachus cheqa kaj qhelqapi qhelqasqa kashan, chaymanta willasqayki. Paykunaj contrankupi maqanakushajteyqa, ángel Miguel sapallan yanapawan, pichus qankunaj suyuykichej Israelta qhawan, chay.