Colosenses 1 - DIOSPA QHELQACHISQ

Pablo napaykun

¹ Noqa Pablo kani, Diospa munayninrayku Jesucristoj kachan kanaypaj ajllasqa. Chantá wawqey Timoteowan ima,

² kay cartata qhelqaspa apachimuni, Colosas llajtapi pikunachus Cristopi atinikojkuna kanku, chaykunaman. Qankunaqa Diospaj t'aqasqa kasqaykichejrayku paypaj manchay munasqa kankichej. Chayrayku Tata Diosninchejpa qhasilla k'acha yanapaynin, sonqo tiyaykuynintaj qankunawan kachun.

Pabloqa Jesusta qhatejkunarayku Diosmanta mañapun

³ Tukuyta Kamachej Jesucristoj Tatan Dioswan parlarikuspa, qankunarayku mañapuyku. Jinallataj Tata Diosta pachis niykupuni,

⁴ imaraykuchus Cristo Jesuspi tukuy sonqo atinikusqaykichejta uyariyku. Chantapis Diospa tukuy ajllakusqankunata munakusqaykichejta uyarillaykutaj.

⁵ Qallariypi Jesuspa cheqa kaj sumaj willayninta uyarispa, yacharqankichej Diosqa qankunapaj may sumaj imakunata janaj pachapi waqaychashasqanta.

⁶ Chay sumaj willayta uyarisqaykichejqa tukuynejpi willasqa kashan. Chay runakunaqa chay sumaj willayta jap'ikusqankurayku waj jinaman tukuchisqa kashanku, imaynatachus qankunapis uyarisqaykichejmantapacha waj jinaman tukuchisqa karqankichej, ajinata. Qankunataj Diospa khuyakuyninmanta uyarispa, chaypacharaj cheqapuni kasqanta yacharqankichej.

⁷ Kayta munasqa ruwaj masiyku Epafras yachachisorqachej. Payqa Jesuspa sumaj kamachin jina qankunata yanapasorqachej.

⁸ Paymin willariwarqayku, Santo Espíritu sonqoykichejman munakuyta churasqanwan imaynatachus qankuna ujkunata munakusqaykichejta.

⁹ Chayrayku noqayku tukuy chayta uyarisqaykumantapacha Dioswan parlarikuspa, qankunarayku mañapuyku, Tata Dios munayninta allintapuni rejsichisunaykichejpaj, jinataj Santo Espíritu yuyayta, yachayta ima qosunaykichejpaj.

¹⁰ Ajinata mañapuyku Tukuyta Kamachej Jesuspa munasqanman jina purinaykichejpaj, chantá tukuy imapi Diosta kusichinaykichejpaj. Ajinamanta allin kajta ruwaspa kankichej, jinataj Diosta astawan astawan rejsinkichej.

¹¹ Mañapullaykutaj Diosqa may jina jatun atiyninwan qankunata kallpachananta, tukuy mana allin kajkuna qhatirejtin pacienciakunaykichejpaj.

¹² Ajinamanta jatun kusiywan Tata Diosta pachis ninkichej. Paymin qankunata ruwasorqachej qhapaj kamachiyninpi ajllakusqankunapaj wakichisqan chayaqeta jap'inaykichejpaj jina.

¹³ Diosqa laqhayaypi kamachejpa atiyninpi kawsashasqanchejmanta orqhospa, munasqa Churinpa kamachiyninman churawarqanchej.

¹⁴ Jinataj Diospa Churin cruzpi wañusqanwan pagaspa, kacharichiwarqanchej, juchanchejtataj pampacharqa.

Jesucristoqa tukuy kaj chhika patapi

¹⁵ Cristoqa mana rikukoj Dios imaynachus, ajinallataj. Chaytataj runaman rejsicherqa. Payqa manaraj Dios tukuy imata ruwashajtin, karqañapuni.

¹⁶ Paynejtamin Diosqa tukuy kaj chhikata ruwarqa: Janajpi kajkunata, kay pachapi kajkunatapis, mana rikukojkunata, rikukojkunatapis, kamachejkunata, kurajkunata, atiyniyojkunata ima. Tata Diosqa tukuy kaj chhikata Cristonejta ruwarqa, paypaj kananpaj.

¹⁷ Cristoqa, manaraj imapis kashajtin karqañapuni, paytaj tukuy ruwasqan maychus kananpi purinanmanta qhawashan.

¹⁸ Payllataj Iglesiaj uman jina, Iglesiataj ukhunmin. Paymin tukuy imaj qallariynin, payllataj wañusqakunamanta ñawpaj kaj kawsarimpoj, tukuy kaj chhika patapi kananpaj.

¹⁹ Chayqa ajina, imaraykuchus Tata Dios munarqa, pay imaynachus kasqan, ajinallataj Churinpis kananta.

²⁰ Tata Dios munallarqataj Churinnejta tukuy kaj chhika, janaj pachapi kaj, jinataj kay pachapi kaj ima paywan allinyachisqa kananta. Payllataj ajina kananpaj tukuy imata ruwarqa, Churin cruzpi wañuspa yawar jich'asqanrayku.

Cristo wañusqanrayku Dioswan allinyachisqa kanchej

²¹ Qankunaqa ñawpajta Diosmanta karunchasqa karqankichej. Mana allin kajta yuyasqaykichejrayku, chantá millayta ruwasqaykichejrayku ima Diospa awqanpuni karqankichej.

²² Kunantajrí Cristo runaman tukuspa wañusqannejta Dioswan allinyachisqaña kankichej. Ajinamanta Cristoqa Tata Diospa ñawpaqenpi llimphuta, mana juchayojta, nitaj ni imamanta juchachanata rikhurichisonqachej.

²³ Chaywanpis chay ajina kananpaj Cristopi atinikuspa sinch'ita sayanaykichej tiyan. Jinallataj Jesusmanta sumaj willayta jap'ikusqaykichejrayku imatachus tukuy sonqo suyashankichej, chaymanta mana karunchakunaykichejchu tiyan. Chay sumaj willayqa tukuynejpi willasqa kashan, noqataj chay sumaj willaymanta willaranaypaj churasqa kani.

Pabloqa mana judiokunaman kachasqa

²⁴ Kunanqa qankunarayku ñak'arishaspapis kusikuni. Ajinata kikin ukhuypi ñak'arispa, junt'ashani Jesucristoj Iglesianrayku imachus ñak'arinaraj kashan, chayta. Iglesiaqa Jesucristoj ukhunmin.

²⁵ Diostaj qankunaj allinniykichejrayku Iglesiata yanapanaypaj churawarqa, jinataj qankunaman willachisqanta maychus kajta willanaypaj.

²⁶ Chay willayqa wiñaymantapacha pakasqa karqa. Kunantajrí Diosqa ajllakusqankunaman chayta sut'inchanña.

²⁷ Paykunaman Dios rejsichiyta munarqa, Cristoj qhapaj kasqan, chantá jatun kaynin ima qankuna mana judío kajkunapajpis kasqanta. Chay pakasqa yachayqa kaymin: Cristoqa qankuna ukhupi kashan. Ajina kasqanraykutaj qankuna tukuy sonqo janaj pachaj jatun kayninpa lliphipiyninta jap'iyta suyashankichej.

²⁸ Chayrayku Cristomanta willayku tukuy runata yuyaychaspa, tukuy yachaywan yachachispa ima. Ajinata ruwayku tukuy runata Cristowan ujchasqa kawsakunapi yuyayninpiña kashajta rikhurichinaykupaj.

²⁹ Chaypajmin Cristoj atiyninpi atinikuspa, tukuy sonqoywan sinch'ita ruwashani. Cristoj atiynintaj noqapi sinch'ita llank'ashan.