Apocalipsis 9 - DIOSPA QHELQACHISQ

¹ Phishqa kaj angelñataj trompetanta waqachejtin, noqa janajmanta kay pachaman uj ch'askata urmamojta rikorqani. Chay ch'askamantaj ukhu pachaj llaventa qorqanku.

² Chantá chay ch'aska ukhu pachata kicharejtin, chaymanta q'oshñi llojsimorqa, imaynatachus jatun hornomanta q'oshñi llojsin jinata. Chay q'oshñitaj intita, kay pachata ima laqhayaykucherqa.

³ Chay q'oshñimantataj phinki phinkikuna llojsimuspa, kay pachaman junt'aykorqanku, paykunamantaj atiyta qorqanku runata atojsillu jina wach'inankupaj.

⁴ Chay phinki phinkikunaqa kamachisqa karqanku jallp'api kaj qhorata, ni ima q'omerta, nitaj ima sach'atapis ama imananankuta. Manachayqa runakunallata ñak'arichinanku karqa, pikunachus mat'inkupi Diospa sellonwan mana sellasqachu karqanku, chaykunata.

⁵ Chaywanpis mana runakunata wañuchinankuchu karqa, manachayqa phishqa killallata runata wach'ispa ñak'arichinanku karqa. Chay wach'isqa nanaytaj atojsilloj wach'isqan jina karqa.

⁶ Chay p'unchaypi phinki phinkikunanejta ñak'arichisqa runakuna wañuyta mask'anqanku, manataj wañuyta atenqankuchu. Wañuyta munanqanku chaypis, wañoyqa paykunamanta ayqenqa.

⁷ Chay phinki phinkikuna maqanakupaj wakichisqa caballokunaman rijch'akorqanku. Chaykunaj umankupitaj qori pillu jina churasqa karqa, uyankutaj runa uya jina.

⁸ Chujchankoqa warmej chujchan jina karqa, kirunkutaj leonkunaj kirun jina.

⁹ Ukhunkoqa fierromanta ruwasqa pechera jina karqa, lijrankoj laphaqeyasqantaj carretakunaj sonasqan jina, imaynatachus ashkha caballokuna maqanakoj imata jina phinkinku, ajina.

¹⁰ Chupankoqa atojsilloj chupan jina wach'inayoj karqa, chaywantaj phishqa killa junt'ata runakunata ñak'arichinankupaj atiyniyoj karqanku.

¹¹ Phinki phinkikunata kamachejqa ukhu pachaj angelnin karqa, sutintaj hebreo parlaypi Abadón, griego parlaypitaj Apolión. Chay niyta munan “chinkachej”, nispa.

¹² Ñawpaj kaj llakeyqa pasanña. Chaywanpis iskay llakiykunaraj chaypa qhepanta jamushan.

¹³ Chaymantataj sojta kaj angelñataj trompetata waqacherqa. Chantá qorimanta altarpa tawantin kantunmanta uj parlamojta uyarerqani, mayqenchus Diospa ñawpaqenpi kashan, chaymanta.

¹⁴ Chantá chay parlamojqa sojta kaj angelman, pichus trompetanta jap'isharqa, chayman nerqa: Éufrates jatun mayu qayllapi watasqa kashanku, chay tawa angelkunata phaskaramuy, nispa.

¹⁵ Jinataj chay tawa angelkunata phaskaraspa kacharerqa, runakuna kinsaman t'aqasqamanta ujnin kaj t'aqata wañurachinankupaj. Chay angelkunaqa chay phanipaj, chay p'unchaypaj, chay killapaj, chay watapaj runata wañuchinankupaj wakichisqa karqanku.

¹⁶ Chantá uyarerqani Abadonpa caballokunapi purej soldadonkukunaqa 200.000.000 kasqankuta.

¹⁷ Ajinata mosqoypi jina rikorqani caballokunata, chantá caballokunapi lloq'asqa kajkunata: Caballokunapi purejkunaj pecherankoqa nina jina puka karqa, zafiro rumi jina anqa, azufre jina q'ellu ima. Caballokunaj umankutaj leonkunaj uman jina karqa, siminkumantataj ninata, q'oshñita, chantá azufreta ima thoqaj kanku.

¹⁸ Runakunataj kinsaman t'aqasqamanta ujnin kaj t'aqa kay ñak'ariykunawan wañuchisqa karqanku: Caballokunaj siminkumanta llojsimoj ninawan, q'oshñiwan, chantá azufrewan ima.

¹⁹ Caballokunaj atiynenqa siminkupi, chupankupiwan karqa. Chupankoqa katarej umanman rijch'akorqa, chaywantaj runakunata wach'erqanku.

²⁰ Chaywanpis, pikunachus chay manchay ñak'ariykunawan mana wañorqankuchu, chaykuna millayta ruwasqankumanta Diosman mana kutirikorqankuchu. Manachayqa paykuna supaykunata yupaychallarqankupuni, jinallataj qorimanta, qolqe metalmanta, broncemanta, rumimanta, k'ullumanta ruwasqa lantikunata ima. Chay lantikuna mana qhawayta atinkuchu, nitaj uyariyta, nillataj puriytapis.

²¹ Chay runakuna manallataj saqerqankuchu runa wañuchiyta, layqanakuta, khuchichakuyta, suwanata ima, Diosman kutirikunankupaj.