Apocalipsis 8 - DIOSPA QHELQACHISQ

Qanchis kaj sello

¹ Maypachachus Cordero qanchis kaj sellota llik'erqa chaypacha, janaj pachapi kajkuna khuskan phanita jina ch'inlla karqanku.

² Chantá Diospa ñawpaqenpi qanchis angelkunata sayashajta rikorqani. Paykunamantaj qanchis trompetakunata qorqanku.

³ Chaymantataj waj ángel jamuspa, altarpa ñawpaqenpi sayarqa, qorimanta incienso q'oshñichina jap'irisqa. Chantá chay angelman ashkha inciensota qorqanku, pay Diospa tukuy ajllakusqankunaj mañakusqankuman yapaspa, kamachina tiyanaj ñawpaqenpi, chay qori altarpi jaywananpaj.

⁴ Chay angelpa incienso q'oshñichisqanqa Diospa ñawpaqenman wicharerqa, Diospa ajllakusqankunaj mañakusqankuwan khuska.

⁵ Chaymantataj angelqa incienso q'oshñichinata jap'ispa, altar patapi kaj ninawan junt'aykucherqa. Chaytataj kay pachaman jich'amorqa, chantá tukuynejpi qhon qhonkuna, lliuj lliujkuna, jallp'a ikhakuy ima karqa.

⁶ Chantá chay qanchis angelkuna sapa uj trompetanta waqachinankupaj wakichikorqanku.

⁷ Maypachachus ñawpaj kaj ángel trompetata waqacherqa chaypacha, chijchi para, ninawan, yawarwan ima chajrusqa kay pachaman urmamorqa. Chayrayku kay pacha kinsa t'aqasqamanta ujnin kaj t'aqa ruphaykorqa, jinallataj sach'akuna, chantá tukuy q'omer qhora ima.

⁸ Maypachachus iskay kaj ángel trompetata waqacherqa chaypacha, uj jatun orqo jina lawrashaj mama qochaman urmaykamorqa. Chayraykutaj mama qocha kinsaman t'aqasqamanta ujnin kaj t'aqa yawarman tukorqa.

⁹ Chayrayku mama qochapi kawsajkuna kinsaman t'aqasqamanta ujnin kaj t'aqa wañorqa, jinallataj barcokunapis kinsaman t'aqasqamanta ujnin kaj t'aqa phirisqa karqa.

¹⁰ Maypachachus kinsa kaj ángel trompetata waqacherqa chaypacha, janajmanta uj jatun ch'aska urmamorqa, nina jachon jina lawrarispa. Chay ch'askaqa mayukuna kinsaman t'aqasqamanta ujnin kaj t'aqaman urmarqa, jinallataj yaku juturikunamanpis.

¹¹ Chay ch'askaj sutinrí Ajenjo karqa. Chay ch'aska urmasqanraykutaj, yaku kinsaman t'aqasqamanta ujnin kaj t'aqa jayaman tukorqa. Jaya yakuta ujyasqankuraykutaj ashkha runakuna wañorqanku.

¹² Chantá tawa kaj angelñataj trompetata waqacherqa. Chaypachataj inti, killa, chantá ch'askakuna ima kinsaman t'aqasqamanta ujnin kaj t'aqa mana allinman tukorqanku, laqhayaporqankutaj. Chayrayku p'unchaypis, tutapis kinsaman t'aqasqamanta ujnin kaj t'aqa mana k'anchayniyojchu karqa.

¹³ Chaymantataj noqa janajpi phawashajta uj ankata rikorqani. Chay ankataj sinch'ita qhaparispa, nerqa: Kay pachapi tiyakojkunapaj llakiy, llakiy, ay may jina jatun llakiy kanqa, imaraykuchus kinsa angelkunaraj trompetankuta waqachinanku kashan, nispa.